Псалм 116
116
[114-р.с.] 1Мэ рикирава сыр Дро́гима Рас-Дэвлэ́с дро ило́, пал-дова́ со Ёв шунэ́ла мири́ зан и миро мангипэ́н Лэ́скэ: 2пал-дова́ со Ёв причхудя кан кэ мэ; мэ ява́ва тэ кхарав Лэс дрэ дывэса́, пака мэ джива́ва. 3Мэрибэ́н сы́рбы шэлэнца обчхудя́ трусця́л ма́ндэ, и люноскирэ дукха́ пынэ́ пэ ма́ндэ, ма́нгэ яця́ пхаро́ и мэ пыём дро ду́хо (фа́но): 4тэ́ньчи мэ кхардём Ра́скирэ-Дэвлэ́скиро лав: ‘Мэ зоралэ́с манга́ва Тут, Раё Дэ́вла, зра́кх миро ди.’ 5Рай Дэвэ́л исын лачхэ́-дескиро и чачипна́скиро, и амаро́ Рай Дэвэ́л исын лачхэ́-илэ́скиро. 6Рай Дэвэ́л приракхэла простонэн: мэ яцём бизорья́киро; и Ёв зракхця́ ман. 7Рисёв тэ откхинёс пэ́скэ, миро ди; пал-дова́ со Рай Дэвэ́л бахтякирдя́ тут. 8Пал-дова́ со Рай Дэвэ́л выракхця миро ди мэрибна́стыр, мирэ́ якха́ ясвэндыр, и мирэ́ ґэра́ пэрибнастыр. 9Мэ ява́ва тэ псирав анги́л Растэ-Дэвлэ́стэ пэ пхув, кай дживэ́на.
[ПСАЛМО 115-р.с.]
10[1] Мэ патяндыём, палдава́ мэ и пхэндём: “Ман зоралэ́с притасавэнас” 11[2] Мэ сы́гэс пхэндём пэ́скэ: “Сарэ́ мануша́ исын хоханэ́.” 12[3] Со́са мэ отда́ва палэ Ра́скэ-Дэвлэ́скэ пал саро́ лэ́скиро баро́ лачхипэ́н ма́нгэ? 13[4] Мэ ґазда́ва тахта́й (чаша) пал дова́, со Ёв зракхця́ ман и кхара́ва Ра́скирэ-Дэвлэ́скиро лав. 14[5] Мэ кэра́ва пир пэ́скири совла́х анги́л Растэ-Дэвлэ́стэ какана́, сыр Лэ́скирэ мануша́ скэдэ́напэ. 15[6] Пхаро́ исын Ра́скирэ-Дэвлэ́скирэ якхэнгэ тэ дыкхэ́н мэрибэ́н Лэ́скирэ свэнтонэнгиро. 16[7] О, Раё Дэ́вла, мэ чачэс, сом Тыро́ писха́ри, мэ сом Тыро́ писха́ри, Тырэ́-бутярнэнгиро чхаво́: Ту роспхандян мирэ́ пе́нты (кхурья́). 17[8] Мэ яна́ва Ту́кэ свэ́нто дыибэ́н (жэ́ртва) парикирибнаса, соб (кай) тэ парикирэ́н Ту́кэ, и мэ ява́ва тэ кхарав Ра́скирэ-Дэвлэ́скиро лав. 18[9] Мэ кэра́ва пир пэ́скири совла́х Ра́скэ-Дэвлэ́скэ акана́, сыр Лэ́скирэ мануша́ скэдэ́напэ, 19[10] дрэ трэмы Ра́скирэ-Дэвлэ́скиро Кхэр машки́р ту́тэ, Ерусалиме. Аллилуя!
Currently Selected:
Псалм 116: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
