Притчы 13
13
Соломоно́скирэ Годыпэна
1Годо́ чхаво́ шунэ́ла, сыр дад сыклякирэ́ла лэс чачипнаскэ, нэ кон исын напатывакиро кэ яви́р, ёв на шунэ́ла, сыр сыкавэ́на банг лэ́скэ. 2Ману́ш чалякирэла лачхипна́са сы́рбы пхабатыр пэ́скирэ уштэндыр, нэ напатяибнаскирэ дия́ чалякирэнапэ нахратыматыр. 3Кон пририкирэла пэ́скиро муй, одова́ ракхэ́ла пэ́скиро джиибэ́н, нэ кодова́, саво́ отпхандэла буґлэс пэ́скиро муй, одова́ хасёла. 4Кирнэ-масэ́нгиро ману́ш тырдэлапэ тэ хал, нэ нисо́ на дорэсэ́ла, нэ добусовэнгиро (старательно) ди явэ́ла барвало́. 5Чачуно́ ману́ш древа́н на камэ́ла хохаибэ́н, нэ надэвлытко ману́ш лыджа́ла пэс намиштэс и дорэсэ́ла ладж. 6Чачипэ́н ракхэ́ла одолэ́н, савэнгиро дром исын бидошэ́нгиро, нэ фуипэ́н равэла тэлэ́ [хасякирэ́ла-р.с.] грэхитконэ́ манушэ́с. 7Исын ману́ш, саво́ сыкавэ́ла пэс, хай, ёв исын барвало́, нэ нисо́ нанэ лэ́стэ. Исын ману́ш, саво́ сыкавэ́ла пэс сы́рбы ёв исын чороро́, нэ лэ́стэ исын баро́ барвалыпэ́н. 8Ману́ш могинэ́ла тэ дэл пэ́скиро барвалыпэ́н пал джиибэ́н сыр сымады́ (залого), нэ чороро́ на шунэ́ла, сыр сыкавэ́на банг лэ́скэ. 9Чачунэ́-манушэ́скиро дуд (свэ́то) хачола радыма́са, а фуе́-манушэ́скиро момолы́тко (свети́льнико) мурдёла. 10Пхутькирибнастыр джа́ла чинга́рд, нэ, кон кандэ́ла, сыр лэ́скэ дэ́на годыпэ́н, одова́ исын годо́. 11Миштыпэ́н, со ману́ш дорэсэ́ла бипатывакирэ рэндэ́ндыр, тыкнёла, нэ кон кэрдя́ буты́ пхарэ́с, одолэскиро миштыпэ́н барьёла. 12Ужакирибэ́н, со на янэ́ла нисо́, кэрэ́ла адя́кэ, со ило́ дукхала, нэ ке́ли зорало́ мангипэ́н кэрэ́лапэ дро чачипэ́н, тэды джиибэ́н пхэрдёла радыма́са. 13Кон на прилэ́ла кэ годы́ лав, исын хасибны́тко, нэ кон кутякирэла кэ дар припхэныбэ́н, одова́ дорэсэ́ла мазу́ри (награда). 14Годэ́-манушэ́скиро лав исын джиибна́скири ґаны́нг, соб (кай) тэ рисён криг мэрибнаскирэ фэлятыр. 15Кон ґалёла миштэ́с, кодова́ исын манушэ́нгэ пир ило́, нэ напатяибнытко ману́ш пхарэ́с дживэ́ла. 16Барэ́-годя́киро ману́ш кэрэ́ла саро́ джиныбнаса, нэ дылыно́ сыкавэ́ла маму́й пэ́скиро дылныпэ́н. 17Фуй ману́ш, саво́ бичхадо́ заня́са (вестяса), пэрэ́ла дро пхарипэ́н, нэ патяибны́тко вестя-бичхаибнаскиро (посло) янэ́ла састыпэн. 18Чорорипэн и ладж пэрэ́на пэ манушэ́стэ, саво́ вычхурдэла илэ́стыр дова́, пал со сыклякирэ́на лэс. Нэ кодова́, саво́ прилэ́ла лэс, ке́ли лэс бангякирэна зоралэ́с, явэ́ла дрэ паты́в. 19Ке́ли зоралы́ мысля кэ вари-со кэрэ́лапэ кэ ко́нцо (кэ яго́ро), дава́ гудлякирэла ило́, нэ дылынэскэ на пир ило́ тэ джал криг фуипнастыр. 20Кон кумплинэлапэ (малынэлапэ) годэ́ манушэ́нца, явэ́ла годо́, нэ кампания (малыпэн) дылыниньконэнца хасякирэ́ла лэс. 21Фуипэ́н родэ́ла грэхитконэ́ манушэ́н, нэ чачунэ́ манушэ́нгэ отплэскирэлапэ палэ лачхипна́са. 22Лачхо́ ману́ш ячкирэ́ла мэкно́ миштыпэ́н (наследство) лэ́скирэ-чхавэ́нгирэ чхавэ́нгэ, нэ барвалыпэ́н грэхитконэ́-манушэ́нгиро приракхэлапэ ваш чачунэ́ манушэ́нгэ. 23Бут маро́ исын пэ чхучэ́ фэ́лды чорорэ́ манушэ́нгирэ, нэ, кай на ухты́лла (на́доси) чачипэ́н машки́р манушэ́ндэ, одо́й явэ́ла хасибэ́н. 24Кон жалинэла пэ́скири ран, одолэ́скэ нанэ дро́го древа́н чхаво́, нэ конэ́скэ исын дро́го ёв, одова́ сыклякирэ́ла кэ дукха́ тыкнал лэс. 25Чачуно́ ману́ш ха́ла чалэ́с, кицы́ лэ́скиро ди камэ́ла, нэ фуе́-манушэ́нгиро кужум (жэлудко) явэ́ла тэ бокхалёл.
Currently Selected:
Притчы 13: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
