Popular Bible Verses from Притчы 13

Share

Кон кумплинэлапэ (малынэлапэ) годэ́ манушэ́нца, явэ́ла годо́, нэ кампания (малыпэн) дылыниньконэнца хасякирэ́ла лэс.

Кон пририкирэла пэ́скиро муй, одова́ ракхэ́ла пэ́скиро джиибэ́н, нэ кодова́, саво́ отпхандэла буґлэс пэ́скиро муй, одова́ хасёла.

Кон жалинэла пэ́скири ран, одолэ́скэ нанэ дро́го древа́н чхаво́, нэ конэ́скэ исын дро́го ёв, одова́ сыклякирэ́ла кэ дукха́ тыкнал лэс.

Ужакирибэ́н, со на янэ́ла нисо́, кэрэ́ла адя́кэ, со ило́ дукхала, нэ ке́ли зорало́ мангипэ́н кэрэ́лапэ дро чачипэ́н, тэды джиибэ́н пхэрдёла радыма́са.

Чачипэ́н ракхэ́ла одолэ́н, савэнгиро дром исын бидошэ́нгиро, нэ фуипэ́н равэла тэлэ́ [хасякирэ́ла-р.с.] грэхитконэ́ манушэ́с.

Миштыпэ́н, со ману́ш дорэсэ́ла бипатывакирэ рэндэ́ндыр, тыкнёла, нэ кон кэрдя́ буты́ пхарэ́с, одолэскиро миштыпэ́н барьёла.

Пхутькирибнастыр джа́ла чинга́рд, нэ, кон кандэ́ла, сыр лэ́скэ дэ́на годыпэ́н, одова́ исын годо́.

Лачхо́ ману́ш ячкирэ́ла мэкно́ миштыпэ́н (наследство) лэ́скирэ-чхавэ́нгирэ чхавэ́нгэ, нэ барвалыпэ́н грэхитконэ́-манушэ́нгиро приракхэлапэ ваш чачунэ́ манушэ́нгэ.

Годо́ чхаво́ шунэ́ла, сыр дад сыклякирэ́ла лэс чачипнаскэ, нэ кон исын напатывакиро кэ яви́р, ёв на шунэ́ла, сыр сыкавэ́на банг лэ́скэ.

Чорорипэн и ладж пэрэ́на пэ манушэ́стэ, саво́ вычхурдэла илэ́стыр дова́, пал со сыклякирэ́на лэс. Нэ кодова́, саво́ прилэ́ла лэс, ке́ли лэс бангякирэна зоралэ́с, явэ́ла дрэ паты́в.