Ио́во 40
40
Рай Дэвэ́л Лэ́ла тэ Пхучэл Иовостыр
1[6] Тэ́ньци отпхэндя́ Рай Дэвэ́л Иовоскэ рискирибна́скирэ балвалятыр (вихростыр) и пхэндя́: 2[7] “Подпхандэпэ и яв скэдыно́ сыр мурш; Мэ ява́ва тэ пхучав ту́тыр, а ту явэ́са тэ отпхэнэс ма́нгэ: 3[8] Ци пхагирэса ту, чачэс, Миро чачипэ́н? Ци явэ́са ту зоралэ́с тэ обсэндинэс Ман, соб (кай) ту тэ явэс чачакирдо? 4[9] Ци сан ту зорало́ адя́кэ, сыр Мэ сом? Ци исын ту́тэ дасави́ зан сыр громостыр? 5[10] Тэ́ньци гожакир пэс барипнаса и кучипнаса, урипэ дро райканыпэн и шук. 6[11] Вычхув сари́ пэ́скири холы́, подыкх пэ кажнонэ́стэ, кон исын пхутькирдо и тэлякир лэс; 7[12] Подыкх пэ сваконэстэ, кон пхуцёла, чхув тэлэ́ лэс; штакур тэлэ́ фуе́ манушэ́н пэ лэ́нгирэ штэ́ты. 8[13] Гарав лэн кхэтанэ́ дро пра́хо, и чхакир лэ́нгирэ муя́ чораханэ́с, 9[14] тэды Мэ адя́кэ-паць приджинава тут, со тыро́ чачо́ васт могинэ́ла тэ ракхэ́л тут. 10[15] Дыкх акана́ пэ бегемотостэ, савэ́с Мэ создыём сыр и тут: ёв ха́ла чар сыр гурув. 11[16] Ѓа́да, дыкх, саво́ зоралыпэ́н исын дрэ лэ́скирэ ґэрьякирэ стаця, и сави́ зор исын дрэ лэ́скирэ-пэрэскирэ маса́. 12[17] Ёв бандькирэла порьяса сыр кедроса, а жылы пэ лэ́скиро пэр зоралэ́с кходэ. 13[18] Лэ́скирэ кокалы́ исын сы́рбы бронзытка трубы, а лэ́скирэ пашварэ исын сы́рбы састырины (жэлезины). 14[19] Ёв исын най зоралэды́р, конэ́с Дэвэ́л создыя́: екх Ёв, Саво́ создыя́ лэс, дэ́ла ра́да тэ янэл пашэдыр Пэ́скири курта́ла кэ ёв. 15[19] Бэ́рги, кай броинэна сарэ́ фэлды́тка мурдала́, дэ́на хабэ́н лэ́скэ. 16[20] Ёв пасёла тэл лотоскирэ кашта́, кай гаравэна лэс тришчына (троснико) и дрич (болото). 17[21] Лотоскирэ кашта́ учхакирэна лэс пэ́скирэ зэрьяса, лэс обчхувэна вербы паш рэкицы. 18[22] Мэк рэка (лэнь) ґаздэ́лапэ пане́са, нэ ёв исын штыл: ёв исын зоралэ́с тэрдо́, мэк кокоро́ Иорда́но (Ёрдано) тэ чхувэлпэ дро лэ́скиро муй. 19[23] Кон дэ́ла ра́да тэ лэл лэс анги́л лэ́скирэ якха́? Ци кон пусавэла лэ́скэ дро накх фэлякирэ спицаса?
[Шэро́ 41-ю.о.]
20[24] Ци вытэрдэса ту Левиафанос нанглэса, и ци притасавэса ту лэ́скири чиб шэлэса? 21[41.1-ю.о.] Ци дэ́са ра́да ту тэ вчхувэс шэло тришчынатыр дрэ лэ́скирэ рутхуня (ноздри)? 22[2] Ци явэ́ла дава́ Левиафано бут тэ мангэ́л тут, соб (кай) ту тэ потангинэс Лэс? Ци явэ́ла ёв тэ ракирэ́л ковлэс ту́са? 23[3] Ци явэ́ла ёв тэ кэрэ́л штама (доракирибэ́н) ту́са? Ци лэ́са ту лэс сыр писхари́с пэ усады (сак)? 24[4] Ци явэ́са ту тэ броинэс лэ́са сыр чирикляса? Ци дэ́са ра́да ту тэ пхандэс лэс ваш пэ́скирэ-штубакирэ раклорьенгэ? 25[5] Ци явэ́на тэ кофаринэн лэ́са тырэ́ дро́га мала́? Ци явэ́на тэ роскэрэн лэс ку́пцы (тылга́рья) машки́р пэ́стэ? 26[6] Ци дэ́са ра́да ту тэ пусавэс дрэ лэ́скири цы́па марибнытконэ́ бустяса? Ци чилавэса ту лэ́скиро шэро́ мачхарьенгирэ бустяса? 27[7] Чхув пэ́скиро васт е́кхвар пэ лэ́стэ; ри́пир дава́ марибэ́н; на кэр буты́р дава́.
Currently Selected:
Ио́во 40: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
