Дание́лё 3
3
Сувнакуно́ Идоло
1О кра́ли Навуходоносо́ро кэрдя́ идолоскиро муй (статула) сувнака́стыр вучипна́са шовдэша́ куня́ (логти), шов куня́ буґлыпнаса и чхудя́ лэс пэ фэ́лда Деир, дава́ дрэ Вавилонытконэ – тхэмэскири провинцыя. 2И бичхавэлас о кра́ли Навуходоносо́ро тэ скэдэл сатрапэн, штэтоскирэ барыдырэ́н (наместникэн), шэралэ́ ран, советникэн (юнкарэн), ракхибнаскирэн пэ кучипэ́н (сокровишчо), сэндарьен, шэратунэ сэндарьен, и сарэ́н барыдырэ́н провинцыякирэн, соб (кай) ёнэ тэ явэ́н пэ высвэнцыныбнаскиро моменто ваш идоло, саво́ чхудя́ о кра́ли Навуходоносо́ро. 3И скэдынэ́пэ э сатрапы, лэ́нгирэ штэтоскирэ барыдыра́, шэралэ́ рая, юнкары, ракхибнаскирэ пэ пиралы́ ваш казна, сэнда́рья, шэратунэ сэнда́рья, и сарэ́ барыдыра́ пир округа пэ высвэнцыныбнаскиро ваш идолоскэ, и ёнэ тэрдинэ́ анги́л идоло, саво́ чхудя́ о Навуходоносо́ро. 4Тэ́ньци о нэвипэ-пхэныбнаскиро (глашатаё) задыя го́дла: “Тэ пхэнэ́лапэ тумэ́нгэ, э манушы́тка на́цыи (народы), кхэри́тка ро́ды (пле́ми) и екхэ-чибакирэ ирья́ (чиба́/ чибья́), 5со дро дова́ часо, сыр тумэ́ шунэ́на зан (глос) рогоскири (трубакири), свиролькакири, лутакири, гусленгири, псалтирьякири, цымбалэнгири и сарэ́ яви́р-музыкакири, соб (кай) тумэ́ тэ пэрэ́н тэлэ́ и тэ дэн паты́в сувнакунэ́ идолоскэ, савэ́с чхудя́ о кра́ли Навуходоносо́ро; 6и кон на пэрэ́ла тэлэ́, и на дэ́ла паты́в, то екха́тыр (сра́зу) явэ́ла чхурдыно́ дро бов, росхачкирдо яга́са.” 7Палдава́, ке́ли сарэ́ мануша́ шундлэ́ зан рогоскири, свиролькакири, лутакири, гусленгири, псалтирьякири и сарэ́ яви́р-музыкакири, то пынэ́ сарэ́ манушы́тка на́цыи, кхэри́тка ро́ды, екхэ-чибакирэ ирья́ (чиба́/ чибья́), и дынэ́ паты́в сувнакунэ́ идолоскэ, саво́ чхудя́ о Навуходоносо́ро кра́ли.
Дание́лё и Лэ́скирэ Мала́ на Кандынэ Крали́с
8Палдава́ дро дасаво часо подгинэ́ вари-савэ́ Халдеендыр и допхэндлэ пэ Юдэ́ндэ. 9Ёнэ пхэндлэ́ крали́скэ Навуходоносороскэ: “Джив дрэ вэки, о кра́лё! 10Ту, кра́лё, дыя́н припхэныбнытко стату́то, соб (кай) кажно ману́ш, кон шунэ́ла зан рогоскири, свиролькакири, лутакири, гусленгири, псалтирьякири, цымбалэнгири и сарэ́ яви́р-музыкакири, тэ пэрэ́л одова́ ману́ш тэлэ́, и тэ дэл паты́в сувнакунэ́ идолоскэ; 11и кон на пыя́ тэлэ́ и на дыя́ паты́в, мэк тэ явэ́л чхурдыно́ дро бов росхачкирдо яга́са. 12Нэ мурша́ Юдытка, савэ́н ту чхудя́н упра́л пэ рэ́нды Вавилонытконэ-тхэмэ́скирэ: Шэдрахо, Мешахо и Авед-Него; кодолэ́ мурша́ на кандынэ́ тыро́ припхэныбэ́н, о кра́лё, ёнэ на дынаринэна тырэ́ дэвлорэ́нгэ и на дэ́на паты́в сувнакунэ́ москэ (идолоскэ), саво́ Ту чхудя́н.” 13Тэ́ньци Навуходоносо́ро дрэ холы́ и дро мижэхипэн пхэндя́ тэ янэ́н Шэдрахос, Мешахос и Авед-Негос. И яндлэ́ одолэ́ муршэ́н кэ кра́ли. 14О Навуходоносо́ро пхэндя́ лэ́нгэ: “Ци исын чачо́ дава́, со тумэ́, о Шэдрахо, Мэшахо и Авед-Него, на дынаринэна мирэ́ дэвлэнгэ, и на дэ́на паты́в сувнакунэ́ москэ, саво́ Мэ чхудём? 15Акана́, ко́ли тумэ́ скэдынэ́ сан, сыр сыго тумэ́ шунэ́на зан рогоскири, свиролькакири, лутакири, гусленгири, псалтирьякири, цымбалэнгири и сарэ́ яви́р-музыкакири, тэ пэрэ́н тумэ́ тэлэ́, и тэ дэн тумэ́ паты́в сувнакунэ́ москэ, со мэ кэрдём. Мишто́. Нэ ко́ли тумэ́ на дэ́на паты́в, то тумэн екха́тыр (сра́зу) чхурдэна дро бов, росхачкирдо яга́са. И саво́ дэвэл жа зракхэ́ла тумэн мирэ́ вастэ́стыр?” 16И отпхэндлэ́ Шэдрахо, Мэшахо, Авед-Него и ракирдэ́ э крали́скэ Навуходоносороскэ: “Амэ на сам бангэ́ тэ отпхэнас ту́кэ пэ дава́. 17Амаро́ Дэвэ́л, Савэ́скэ амэ дынарина́с, исын зорало́ и зракхэ́ла амэн бовэстыр, росхачкирдэ яга́са, и тырэ́ вастэ́стыр, о кра́лё, Ёв зракхэ́ла. 18Ко́ли тэ на явэ́л дова́, то явэ́ла ту́кэ ґалыно, о кра́ли, со тырэ́ дэвлэнгэ амэ на ласам тэ дынарина́с и сувнакунэ́ москэ (идолоскэ), саво́ ту чхудя́н, тэ на бандякирасапэ.” 19Тэ́ньци о Навуходоносо́ро пхэрдия холя́са, э мина москири лэ́стэ парудяпэ пэ Шэдрахостэ, Мешахостэ и Авед-Негостэ, со ёв замангдя тэ хачкирэ́н бов дро эфта́ (битринэ́нгиро дэш) мо́лы зоралэды́р, сыр ґарэдыр росхачкирэнас лэс, 20а самонэ зоралэ́ муршэнгэ пэ́скрэ халадэндыр припхэндя́ тэ пхандэн Шэдрахос, Мешахос, и Авед-Негос и тэ чхурдэ́н лэн дро бов росхачкирдэ яга́са.” 21Тэ́ньци сыс пхандлэ сыс адалэ́ мурша́ дро тэлатуно и упратуно урибэ́н лэ́нгиро, дрэ шэрэскирэ тюрбаны и дрэ яви́р лэ́нгиро урибэ́н, и сыс чхурдынэ́ андро бов, росхачкирдо яга́са. 22И сыр зорья́са сыс крали́скиро припхэныбэ́н, и бов сыс росхачкирдо сыс древа́н, паро ягакиро замардя́ одолэ́ манушэ́н, савэ́ чхурдэнас Шэдрахос, Мешахос и Авед-Негос. 23А кадалэ́ трин мурша́, Шэдрахо, Мешахо и Авед-Него, пынэ́ пхандлэ дро бов росхачкирдэ яга́са. 24О кра́ли Навуходоносо́ро дивиндяпэ и уштыи сыго, пхэндя́ сэндарьенгэ пэскирэнгэ: “Амэ чхурдасас тринэн манушэ́н спхандлэн дро яг? Ёнэ отпхэндлэ́ о крали́скэ: “Адя́кэ чачо́, о кра́лё! 25Пэ кадава́ ёв раки́рла: “Акэ, мэ дыкха́ва штарэн наспхандлэн муршэ́н, савэ́ псирна машкира́л яг, нанэ лэ́нгэ дош; э мина штартонэскири подджа́ла сыр Дэвликанэ Чхавэскири.” 26Тэ́ньци подги́я о Навуходоносо́ро кэ яго́ро (краё) бовэскиро, саво́ сыс росхачкирдо яга́са, и пхэндя́: “Шэдрахо, Мешахо и Авед-Него, писха́рья Дэвлэ́скирэ Най Вучэдырэскирэ! Джа́н яври́ и явэ́н пашылэды́р!” Тэ́ньци Шэдрахо, Мешахо и Авед-Него выгинэ́ андрэстыр ягатыр. 27И скэдынэ́пэ сатрапы, э штэтоскирэ барыдыра́, э шэралэ́ рая хэладэнгирэ, и сэнда́рья крали́скирэ, и дыкхнэ́, со муршэнгирэ маса́ яг на чиладя́, бала́ на обхачинэ пэ шэрэ́, урибэ́н на парудяпэ, и нисаво́ похтан хачкирдо лэ́ндыр на кхандэлас. 28Тэ́ньци Навуходоносо́ро пхэндя́: “Бахтякирдо́ тэ явэ́л о Дэвэ́л Шэдрахоскиро, и Мешахоскиро и Авед-Негоскиро, Саво́ бичхадя́ Янголо́с Пэ́скирэс, и зракхця́ писхарье́н Пэскирэн, савэ́ рикирдэ патяибэ́н дрэ Лэ́стэ и на кандэнас о припхэныбэ́н крали́скиро, и отдынэ́ лэ́нгирэ маса́ ягакэ, соб (кай) тэ на дынаринэ́н и тэ на бандякирэнпэ нисавэ дэвлэскэ, апри́ч лэ́нгирэ Дэвлэ́стэ! 29И ма́ндыр дэ́лапэ припхэныбэ́н, соб (кай) кажнонэ́ нацыятыр, кхэритконэ́ родо́стыр и екхэ-чибакирэ ирьятыр (чибатыр / чибьятыр), кон пхэнэ́ла на́лачхо лав пэ Дэвлэ́стэ Шэдрахоскирэ, Мешахоскирэстэ и Авед-Негоскирэстэ, тэ явэ́л кодова́ ману́ш чингирдо пэ котэра́, и кхэр лэ́скиро тэ кэрдёлпэ дрэ руи́ны, пал-дова́ со нанэ явирэ Дэвлэ́с, Саво́ адя́кэ сашты́ тэ зракхэ́л.” 30Тэ́ньци о кра́ли ґаздыя́ упрэдыр Шэдрахос, Мешахос и Авед-Негос дро Вавилонытко тхэм. 31[4.1-ю.о.] О Навуходоносо́ро кра́ли сарэ́ манушытконэ́ нацые́нгэ, кхэритконэ́ родэ́нгэ и екхэ-чибакирэ ирьенгэ (чибэнгэ/ чибьенгэ), кон дживэ́ла пэ сари́ пхув: “Тэ явэ́л бутэды́р рама́нё (миро) тумэ́нгэ! 32[4.2] ‘Гертыка (знаме́нии) и ди́вы, савэ́ кэрдя́ упра́л ма́ндэ Най Вучэдырэскиро Дэвэ́л, сашты́ тэ пхэна́в мэ тумэ́нгэ. 33[4.3] Со сыр барэ́ Лэ́скирэ ґертыка́ и сыр зоралэ́ исын Лэ́скирэ ди́вы! О Кралипэ́н Лэ́скиро – кралипэ́н ве́чно, и зоралыпэ́н Лэ́скиро – родо́стыр дро ро́до.”
Currently Selected:
Дание́лё 3: ROMBALT
Highlight
Share
Compare
Copy
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
