1 Паралипоменоно 26
26
Ракхибна́рья пэ По́рта
1Ѓа́да, сыр росчхудэ ракхибнарье́н пэ вудара́: Кореянэндыр Мешэлэмия, Кореёскиро чхаво́, чхавэ́ндыр Асафоскирэндыр. 2Чхавэ́ Мешэлэмияскирэ сыс: англатуно́ Заха́рия, яви́р Едиало, три́то Зевадия, шта́рто Яфниило, 3па́нджто Еламо, шо́вто Егоханано (Иегоханано), эфта́то Елиегоэнаё. 4Чхавэ́ Оведо-Эдомоскирэ сыс: англатуно́ Шэмаия, яви́р Егозавадо (Иегозавадо), три́то Иоахо, шта́рто Сахаро, па́нджто Нафанаило, 5шо́вто Амиило, эфта́то Исахаро, охто́то Пеульфаё, пал-дава́ со Дэвэ́л бахтякирдя́ лэс. 6Лэ́скирэ чхавэстыр Шемаиястыр бия́ндынэ адя́кэ-паць чхавэ́, савэ́ сыс барыдырэ́нца дро пэ́скиро ро́до; пал-дова́ со ёнэ сыс зоралэ́ мурша́. 7Чхавэ́ Шемаияскирэ сыс: Офни, Рефаило, Ове́до и Елзавадо, пша́ла лэ́скирэ, мурша́ зоралэ́, Елия и Семахия. 8Сарэ́ ёнэ сыс Овед-Эдомоскирэ чхавэ́ндыр; ёнэ, и лэ́нгирэ чхавэ́, и лэ́нгирэ пша́ла сыс лачхэ́ мануша́ кэ дова́ и сыс дрэ зор: лэн сыс Овед-Эдомостэ шовдэша́ дуй. 9Мешэлемиястэ сыс дэшуохто чхавэ́ и пша́ла, мануша́ таланытка. 10Хосостэ, чхавэ́ндыр Мерариноскирэндыр, чхавэ́ сыс: Шимри шэрало́ (надыкхи пэ дава́, со ёв на сыс англатуно́), нэ дад лэс чхудя́ шэралэса; 11Яви́р Хелкия, три́то Тевалия, шта́рто Заха́рия, сарэ́н чхавэ́н и пшалэ́н Хосостэ сыс дэшутрин. 12Ѓа́да, сыр росчхудэ ракхибнарье́н пэ по́рты пир чэкарьенгиро (семействэнгиро) шэралыпэн, кон сыс дрэ зор пэ буты́ кхэтанэ́ лэ́нгирэ пшалэ́нца, тэ дынаринэ́н дро Ра́скирэ-Дэвлэ́скиро Кхэр. 13И чхурдынэ́ ёнэ жре́биё, сыр тыкно́, адя́кэ и баро́, пир пэ́скирэ чэ́карья (семействы) пэ кажна по́рты. 14И выпыя жре́биё пэ васто́ко Шелемияскэ; и Захарияскэ, лэ́скирэ чхавэ́скэ, годьварэ́ юнкароскэ (советникоскэ), чхурдынэ́ жре́биё, и выгия́ лэ́скэ жре́биё пэ паш-рат; 15Овед-Эдомоскэ пэ паш-дывэ́с, а лэ́скирэ чхавэ́нгэ пашы́л пираля́. 16Шупимоскэ и Хососкэ пэ западо (пал паня́), пашы́л по́рта Шелехет, кай дром ґаздэ́лапэ, и кай ракхибна́рья проти ракхибнарье́ндэ. 17Кэ васто́ко сыс пир шов Леви́ты, кэ паш-рат сыс пир штар, кэ паш-дывэ́с пир штар, а пашы́л пираля́ пир дуй. 18Кэ западо пашы́л трэ́мо сыс пэ дром пир штар, пашы́л са́мо трэ́мо пир дуй. 19Ѓа́да, сыр росчхудэ ракхибнарье́н пэ по́рты чхавэ́ндыр Кореёскирэндыр и чхавэ́ндыр Мерарискирэндыр. 20Леви́ты, лэ́нгирэ пша́ла, дыкхнэ́ пал кучипэна Ра́скирэ-Дэвлэ́скирэ Кхэрэскир и пал кучипнаскирэ пираля́, кай чхувэ́нас отдынэ́ да́ры. 21Чхавэ́ Лаэданоскирэ, Герсоноскирэ чхавэ́скирэ – Лаэданостыр, чэкарьенгирэ (семействэнгирэ) шэралэстыр Лаэданостыр Герсонсконэстыр: Ехиэло (Иехиело). 22Чхавэ́ Ехиэлоскирэ сыс: Зефамо и Иоило, лэ́скиро пшал, дыкхнэ́ пал кучипнаскирэ пираля́ Ра́скирэ-Дэвлэ́скирэ Кхэрэскир, 23кхэтанэ́ Амрамоскирэ родоса, Ицгароскирэса, Хевроноскирэса, Озиилоскирэса. 24Шевуило, чхаво́ Гирсоноскиро, Мойза́скирэ (Моисеёскирэ) чхавэ́скиро, сыс шэрало́ дыкхибнари пэ кучипнаскирэ пираля́. 25Лэ́скирэ пшалэ́стэ Елизеростэ сыс: чхаво́ Рехавия, лэ́стэ чхаво́ Исаё, лэ́стэ чхаво́ Иора́мо, лэ́стэ чхаво́ Зихриё, лэ́стэ чхаво́ Шэломифо. 26Шэломифо и лэ́скирэ пша́ла дыкхнэ́ пал сарэ́ кучипнаскирэ пираля́ ваш отдынэ́ да́ры, савэ́ отдыя́ кра́ли Дави́до и шэралэ́ чэкарьенгирэ, и барыдыра́ пэ тысёнцы, и барыдыра́ пэ шэла́, барыдыра́ (командиры) халадэ́нгирэ. 27Дорэсыбнастыр пэ марибэ́н и заухтылыбнастыр (добычатыр) ёнэ дэ́нас пэ Ра́скирэ-Дэвлэ́скиро Кхэр тэ подрикирэн. 28И саро́, со отдыя́ проро́ко Самуи́ло, и Са́уло, чхаво́ Кисоскиро, и Авени́ро, чхаво́ Нироскиро, и Иоа́во, чхаво́ Саруяскиро, саро́ сыс отдыно́ сыс пэ васта́ Шэломифоскэ и лэ́скирэ пшалэ́нгэ. 29Ицгароскирэ родо́стыр: Хенания и чхавэ́ лэ́скирэ сыс чхудэ́ тэ дынаринэ́н Израильтянэнгэ, лыла́-чхиныбнарье́нца и сэндарье́нца. 30Хевроноскирэ кхэритконэ́ родо́стыр (племёстыр): Хашавия и лэ́скирэ пша́ла, мануша́ муршканэ́, тысёнцо эфташэла́ мануша́, савэ́ дыкхнэ́ пэ Израилё пир дая́ риг Иорданоскири кэ западо, пир сарэ́ рэ́нды пир свэ́нто буты́ Ра́скэ-Дэвлэ́скэ и пир дынарибэ́н крали́скэ. 31Хевроноскирэ кхэритконэ́ радостыр о Ерия (Иерия) сыс шэрало́ Хевронянэндэ, дрэ лэ́нгирэ ро́ды, дрэ стрэ́чы. Дрэ штардэшытко бэрш Давидо́скиро кралипэ́н лэн загиндлэ, и латхнэ́ машки́р лэ́ндэ манушэ́н муршканэн дрэ Иазе́ро Галаадоскиро, 32И лэ́скирэ пша́ла, мануша́ таланытка сыс дуй тысёнцы эфташэла́, ёнэ сыс шэралэ́ чэкарьенгирэ (семействэнгирэ). Лэн чхудя́ кра́ли Дави́до пэ Рувимоскиро ро́дыцо, и Гадоскиро, и пэ паш-ро́дыцо Манасия́скиро, пир сарэ́ Дэвлэ́скирэ рэ́нды и крали́скирэ рэ́нды.
Currently Selected:
1 Паралипоменоно 26: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
