Vygiiben 24

Devél Déla Zakóno Mojzáske

1I phendiá Jov Mojzáske: “Džá upré ke Raj Devél, tu i Aaróno, Nadavo i Aviudo i eftadešá Izrailjoskire phurydyrá, i kerén šerésa (pokloninenpe) durál. 2I Mójza, mek jekhdžinó te poddžál ke Raj Devél, a jone mek te na poddžan, i manušá mek te na ĥazdénpe lésa.” 3I javdiá Mójza, i piriphendia manušénge saré lavá Rástyr-Devléstyr i saré zakóny. I otphendlé saré manušá dre jekh zan, i phendlé: “Saró, so phendiá Raj Devél, kerása.” 4I začhindiá Mójza saré lavá Rástyr-Devléstyr, i, uštyi pe ránko, čhudiá tel bérga altárjo (žertvieniko) i dešudúj bará, pir dešudúj Izrailjoskire ródycy; 5i bičhadiá Izrailjoskire čhavéndyr ternen, i jone jandlé céla shačkiribena, i zamardé guruvorén (tiel'cen) vaš mírno svénto dyibén (žértva) Ráske-Devléske. 6Mójza lyjá paš rat, čhudiá dre tahtaja, a javire pašésa občhudiá altárjo; 7i lyjá zavietoskiri lylvarí, i progindia zoralés (dyjá upré) manušénge, i phendlé jone: “Saró, so phendiá Devél, kerása i javása te kandas.” 8I lyjá Mójza rat, i obryzgindia manušén, rakirí: “Ĥáda, isyn zavietóskiro rat, savó Raj Devél kerdiá tuménca pir saré dalé lavá.” 9Tén'ci gijá upré Mójza i Aaróno, Nadavo i Aviudo i eftadešá Izrailjoskire phurydyrá, 10i dykhné jone Izrailjoskire Devlés; i tel Léskire ĥerá sys vari-so, so podžalas syr butý kerdy žužé sapfirostyr, i sys jasno, syr kokoró bolybén. 11I Jov na protyrdyjá Péskiro vast pe vykedyné Izrailjoskire čhavénde: jone dykhné Devlés, i xané, i piné. 12I phendiá Raj Devél Mojzáske: “Džá upré ke Me pe bérga; i jav odój, i Me dáva túke baruné skrižáli (tablicy), i Zakóno i priphenybená (dešatune), savé Me čhindjom te sykliakires lénge.” 13I uštyjá Mójza Isusósa (Johošuasa), péskire pomogibnaskiresa, i gijá Mójza pe Devléskiri bérga, 14a phurydyrenge phendiá: “Jačénpe adái, paka ame risjovasa ke tumé; ĥáda, Aaróno i Oro isyn tuménca; kóli javéla tuménde réndo, mek te javél ke jone.” 15I gijá upré Mójza pe bérga, i učhakirdiá óbloko bérga, 16i Ráskire-Devléskiri sláva zakerdia bérga Sinajo; i učhakiréla la óbloko šov dyvesá, a pe eftáto dyvés khardiá Raj Devél ke Pe Mojzás oblokostyr. 17Bicialy sys sláva Ráskire-Devléskiri pe bergákiro vučipén angíl Izrailjoskire-čhavéngire jakhá, syr jag, saví shačkiréla. 18Mójza zagijá dre maškirál óbloko, i gijá upré pe bérga; i sys Mójza pe bérga štardešá dyvesá i štardešá ratia.

Currently Selected:

Vygiiben 24: ROMBALTR

Highlight

Copy