Ta je Vejec 8
8
1HAWA, ame ca hongot bi metâ,
Ke fuc goranyai wâhmakhmeto?
2E ame tot hon je dok ae gorany hnyi gethen,
Ke hnyi je dok ame iouny hnyin je gethen;
3Hnyi je homagöule, hnyi hna dit ka hnyi taun,
Ke hnyi hna dit ka hnyi je hwanuma, e ame kuku, ka habe,
4Tavat lö, inya oge me hawʼ öbun, Ke hobi kâu lakon at bi ifucik.
5Öbun tavat ae ba hnyekubun lö, Wâhmakhmeto ju wâ wia;
Ke öbun tavat ae monu, wâ ûnykûme ju öbun.
6Long ju, anyin oge me he ka ha ta je hofuc ae beönua;
Oge me he ka khong li esongodik he ka ha ta je hofuc ae wisa.
7Anyin ame he hnyimök ka ha hnathu;
Ke ikiki hulo ka li esongodik.
8E wisa hia ta je hofuc ûnyi hnyi hnyimök;
E ba ke ong hwali me monu hnyin.
9E ti manen hia ka at wâhmakhmeto,
Ke wisa bi ka tavat adre me wâ metâ.
10Kap ju hnok hna ûne ke ca kap sileva bi;
Ke metâ, hon gol ae so.
11Anyin ae so metâ hon ta je penina;
Ke ca ûcû më ta je ûnyi hia adre me wedra.
12Inya, a metâ, oge hia but ip wâ tremangâ hnân dok oge me laba hnyin,
Oge me elâm wia wâhmakhmeto, ke hna ânyâ ae ûcû.
13Haba ot kö Iehova, me wale he ka hmiân hulo:
Ke haba bi gan, ke begörany, ke gethen ae kong,
Ke hnyem ae hwali, me wale je hûkö-tiânök.
14E unyik wâ bongon, me ûne ae wisa:
Inya bi wâhmakhmeto; e hu manik.
15Haba je than me adre me musi bi ûnyi gak,
Kʼ ame owisa hnen ta je taben.
16Ûnyi gak ame musi je taben,
Me tavat ae beönua, me tavat owisa hia eang hmelen.
17Inya oge me betenge gadra adre me hnyok könya;
Kʼ adre me he ka ō nya tavat adre me elâm hwegiö nya.
18E unyik omejeû, me hmanenang;
Eke, je omjeû ae tethmâ, me hwakecin ae wisa.
19E so anyik wan hon gol, eke, hon gol ae so;
Me anyik troban, hon sileva ae so.
20Inya oge me vheno gethen ae wisa,
Hnyi wanben je gethen owisa:
21Mʼ oge me he ka otreni ödra ge omjeû adre me hnyok könya,
Mʼ oge me he ka öunöngötâ umödra je uma omjeû.
22Iehova ame tren inya, hnyi hwân deny je gethen,
Ke tiga ba anyin huliwa kâû adrem.
23Adre otilö nya kâû adrem bala, hnyi hwân,
Hnyi ûen ae tiga ba bi hmeledrany.
24Adre hnöku nya, ke tiga ba bi dok ae dit;
Hnyi ûen ae tiga ba pupua ae unöngöt ge köiö.
25Adre hnöku nya ke tiga ca otilâ ta je bucen,
Ke tiga ba bi je dok ae hut:
26Hnyi ûen ae tiga ca op kânâ, me hnyot,
Me sesâiny kânâ a bân, eang hmelen.
27Hnyi ûen e ame penapena drany, inya but ling:
Hnyi hnen hna tuluto wathelaba hon köiö:
28Hnyi ûen e ame otethmâ ta je ûlâ ethö:
Me hwegiâ je pupuainy dok ae dit:
29Hnyi ûen e ame bi hnyigöulen köiö
Me me ca he je köiö ka hanyâûâ hnen hna hûna:
Hnyi ûen e ame bi taben hmeledrany:
30Oge me laba unyin ling, inya ke taben huliwa:
E ame senyin gak hnyi je bong,
Ke oge me hobâ bala hnyi hnyimakan;
31Me hobâ hnyi hmeledrany adre me labā;
Ke haba anyik senyin ae gan wale unyin lakon tavat.
32Anyin a wale, lakuk lö ling nya ju walang ang:
Anyin ae hnahic tavat adre me tuö dek ta je gethen.
33Long ju hna ûne, me metâ but,
Ke ca höcö bi.
34Hnahic hnen at ame hling nya,
At ame hmâkâ hnyi je homagöulek hnyi ta ogo bong,
At ame tue hnyi uthwanumök.
35Anyin a haba at ame ö nya, me ame wâ möt,
Kʼ ame he ka hu gan ibetengiö ûnyi ga Iehova.
36Ke haba at ame haû bi gak, me e ame okongoâ hanon bi:
Ke haba tavat adre me hûkötiö nya, me adre me hnyok mok.
Currently Selected:
Ta je Vejec 8: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society