Ta je Vejec 9
9
1HABA metâ ame hia but op umen uma,
A hia but delâ anyin je hmolom a seven:
2A hia but hlingâ haleny ta je meno; a hia but ûhaniken anyin waina;
A hia but laulau.
3A hia but kunâ anyin wahlu, kʼ ame hongot
Hon je dok ae gorany hnyi taun, ka habe,
4Ewa at ae ba hnyekon, saû ju ang:
Ke haingen ka at ae ba ûnykûme, ka habe,
5Ai Öbun, me hnyi an ök jeû,
Me ijem anyik waina oge me ûhaniken.
6Soju, öbun tavat ae ba hnyekubun, mʼ öbun e möt;
Me vheno gethen deny wâ ûnykûme.
7Haba at ame thawâ at ame hlumö at, me ame he ka hmehma bi;
Ke haba at ame nâ at ae kong, me ame he ka hu monu.
8Ca nâ at ame hlumö at, wâ e nye he ka hmiön u:
Nâ thö at ae metâ, me e ame he ka betenge gam.
9Nâ thö at ae metâ, me e ame he ka metâ tot:
Nâ thö at ae wisa, me e ame he ka bihanen anyin ûne.
10Haba ot kö Iehova, wale hwân metâ:
Ke haba he ka khana At ae Kap, wale wâhmakhmeto.
11Anyin ame he ka osehia bongom ta je bong ûnyi gak,
Me ame he ka bihanen je hunainy ânyâm möt.
12U je ne metâ, hobi köu bi metâ:
U je ne hlumö at me, u me he ka hake wâ troban.
13Haba momo ae monu ame fuc bebehû;
E at ae ba hnyekon, ke ca khana ta je ûnyi.
14E ame laba hnyi hwanumen umen uma,
Hon tap hnyi je dok ae gorany hnyi taun,
15He ka hawâ tavat adre me he,
Wale adre me he wisa hnyi dedra je gethen;
16Ewa at ae ba hnyekon, hamen he ka saû eang:
Ke haingen ka at ae ba hnyekon, ka habe,
17E hnebwia köiö adre venâu,
Ke kese bi jeû adre an duöngâ.
18Ke e ca khana a wale hnen ta je komok;
Me haba tavat adre me më laba hnyi umen uma walʼ ödra bi hnyi je dok a diliny hedis.
Currently Selected:
Ta je Vejec 9: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society