Ta je Vejec 7
7
1NÖKUK lö, tuö ju hok ta je hofuc,
Ke ip ju unyâm hnok ta je hna hûna.
2Tuö ju hnok je hna hûna, mʼ u me möt bi;
Ke anyik hnanyibu helâ me wan li emâkâm.
3Ca ju ka hnyi je banyâm;
Sihnalimen ju hnyi laulauiny hnyekom.
4Ha thö ka metâ, ka habe, Hanik u;
Ke hawâ thö wâhmakhmeto me ha, ka habe, Waek:
5Me me tuö u ge momo kanyua,
A atkanyua ame ûtakû ge hwan ta je hofuc.
6Anyin a oge me selat hnyi hna pewan,
Hnyi mamalaminy umök uma;
7Me oge me wâ unyin tavat ae ba hnyekudra,
Ke wâ bi eû unyin je thoth
Ke hidröu ae ba hnyekon,
8Kʼ ame he hnyi gethen hakekeny hnyekhutuiny momo,
Me e ame vheno gethen ka hnyi umen uma;
9Wale hnyi hauhaotreng, hnyi sahac,
Hnyi hnyinghet ae lit, ke menekholom hmonyin.
10Me wâ bi, ke momo ame ûkhanö më,
Kʼ ame khavâ khaûen momo hnyi gethen, ke hnyok thoi.
11A momo ae fuc bebehu, ke beânyâ weny;
Kʼ ame ca laba li can hnyi hnyaban:
12Haba ûen ang, me eû hnyi gethen, haba eâu me eû hnyi je hnaudrâ,
Kʼ ame tue hnyi ta je hnyekhutiny,
13Me haba momo ame kât e, me ûcimhnyimak më,
Kʼ ame ca hmehma bi hnyimakan, kʼ ame ha kâu, ka habe,
14E bi unyik je hudiny ole;
Oge hia but thamuâ anyik ta je khöbi hnyi bong ang.
15Anyin a wale oge me o but he ka ûkhanö möu,
He ka elâm hnyimâkâm, me oge me ō u ju.
16Oge hia but ulolo je kubö hon hnök hna mokut,
Mano ae se se hia hnalimen ûnyi Aigupito.
17Oge hia but hû hnok hna mokut Ge muro, me aloe, me kinamo.
18Aiö u, ame he ka sekutu ge ibetengiö ke ne o but ame lany do,
Ötu me he ka hobâ ibetengiö.
19Anyin ae hia but baga hnyi uma,
E a he but ka hnyi dok ae sâkâû:
20A hia but hom tang mone;
Ke e ame he ka hmetu e ka bekhot ut tehi.
21Ke haba momo ame osaûâ e hnen anyin ta je hofuc ae iyawâ,
E ame lelö e hnen ûtakûiny li esongodiny.
22Me ame ie he hoton,
Helâ me bolok adre me he ka hlingâ,
Ke helâ me at ame monu, wale adre ca, mʼ adre me nâ e:
23Ke ne o but adre me dâoâ akiny ge fana;
Helâ me meno ame logot ka hnyi hnewe,
Ke ca khana a gʼ adre me mekiny.
24Ta je lakuk lö, ling nya ju walang ang,
Ke tevehling ju ta je hofuc ûnyi hnyi hnyimök.
25Ca saû bi hnyekom ka hnyi deny je gethen,
Ca he monu bi hnyi deny ta je gethen.
26Anyin a e ame othöâ tavat ae se hia adre me aat ut gan:
Eke, haba ta je haniny me utbavat ae hwege.
27Gethen ame he hedis ai umen uma,
Ame ihnyöng ka hnyi je hnyeuleny mok.
Currently Selected:
Ta je Vejec 7: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society