Ta je Vejec 6
6
1NÖKUK, u je ne tot me hwaban hânâm,
Ke u je ne ûkhöû hnyam hobi kâu atkanyua,
2Wale u je nuc u hnen ta je hofuc ûnyi hnyi hnyimâm,
Me hnok ut hnen ta je hofuc ûnyi hnyi hnyimâm.
3Walang ûnyi u me he ka ânyâ, nokuk, me omeli u bi,
Anyin a u je o ka hnyi hnyamen hânâm;
He thö, oûhnyûkongi u bi, ke ûjengö thö hânâm.
4Ca he ka mokut, Me ta mokut.
5Okhulu u but helâ me zebi hnyi hnyamen at hnuk meno,
Ke meno ame gâ ûnyi hnyi hnyamen at ame töu hnewe.
6Ūsēnyin lö, he thö ka wahajö;
Wâ ju ta je hwakecin, mʼ u ma metâ but:
7Ke ba at owisa kâu,
Ke ba homakan, ke ba at ame muso,
8Ke ame penapena an jeû hnyi honivakeny,
Kʼ ame sukhöûnö an jeû hnyi ûen menu.
9Ūsēnyin lö, u me he ka mokut ke ne o but kehö?
Ie ûen u me he ka höhöi thö ûhem hnyi hna mokut?
10Më na mokut ju, më na ta mokut,
Më na hûkâlâ li hnyamâm me mokut leleû:
11Waleling me me o köu theduoc helâ me ioiny at hûgûnâ,
Ke ba jeu, helâ me at ame hom omjehen vat.
12Haba at ae ûnyi baû, a at ânyâ hulo;
Me e ame hwege hnyimen;
13E ame atmemâkâ, kʼ ame fuc hnen li can.
E ame kû hnen je banyen;
14Eû hnyi hnyekon hwali, kʼ ame labö vak ûnyi ae kong;
E ame okûâ iwatretra.
15Anyin a wale ame he ka ie o ûokonguny kâu;
E ame he ka ie oamamâ but, ke ba eny.
16Walang ta je ûnyi a siks ame ikiki gan Iehova;
Eke, e hu seven e ame hmiân, ka habe,
17Bi gan, me bohmen at ame thoi,
Me li hnyam ame hingâlâ dra ae ba hnyikongon;
18Me hnyok ame ûnykûme bibihwakeoin ae kong,
Me li can ame wadring ka hnyi hulo;
19Me at bi fuco wale at ame ha je thoi,
Me at ame okûâ iwatretra ka hnyat me lakeiny.
20Nokuk lö, tuö ju hna hûna hnen kâmâm,
Ke ca degec bi hna ûne hnen hinyâm:
21Ca bala ju hnyi hnyekom,
Kinyâ ju hnyi nyem.
22U je ne he, e ame he ka su u;
U je ne mokut, e ame he ka tuö u;
U je ne hmak hmetu, e ame be ka ûhnenamö möu.
23Anyin a haba hna hûna, me wale lamepa; ke haba hnanyibu, me wale melam;
Ke haba hna nâ me me metâ, me wale gethen deny möt:
24He ka tuö u ge momo ae kong,
Ûnyi ge ûtakûiny bohmen momo kanyua.
25Ca behnyekom eû hnyi hnyekom anyin hmanenang;
Ke so ame ca omonu u hnen bademakan.
26Anyin a ong jeû thibi âu ka at, can momo hnyi gethen:
Ke haba âiân ke baga wale at ame bi ûnyi monu, ame noc hanu ae ûnyi hnathu.
27Hawa, e khana at he ka hok meic ka hnyi ûlainy,
Kʼ ame ca he ka hiâ anyin ûkhaû?
28Hawa, e khana at ka uto je walep ae möt,
Kʼ ame ca he ka hiâ li hnyeûcan?
29Ke helâe at ame he ka âiân ke at;
Ame ca he ka ba hwaban ka at ame kâlâ momo e.
30Adre me ca labö hmiödra at venöu, ame ne venöu bi
Me me sekon hnyekon, anyin ae mekihnânem:
31Ke ödra ka kât e, e ame he ka oseven bi hwaban;
E ame he ka ham hia onyen umen uma.
32Ke haba at ame bi ûnyi monu me momo, e at ae ba hnyekon;
E ame ânyâ ke ûnyi wale ame he ka ohia hanon bi.
33E ame he ka hu aat, me hmehma;
Ke adre me ca he ka kot degecâ hna haikongoâ e.
34Anyin u haba ciâ, wale at ame ohmönyinâ at;
Ke e ame ca he ka betenge hnyi bong bi hwaban.
35E ba hwaban e ame he ka kap,
Ke u je ne ham kâu ta je bwihlany ae se hia, me e ame ca he ka so hmetu bi.
Currently Selected:
Ta je Vejec 6: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society