Ta je Vejec 4
4
1LAKUK lö, long ju hna ûne hnen at ae hu lakon,
Tevehlöng ju me wâhmakhmetoâ
2Anyin a inya oge me nâ soi öbun;
Ca hna dogecâ bi anyik hnanyibu.
3Anyin a inya nöku cica ehac,
Iny mita me oûnykûm a khaca ko bai,
4Ke e ame nö nya, me ha könya, ka habe,
Kât ju hok ta je hofuc ge hnyekom;
Tuö ju anyik ta je hnanyibu me u me mot:
5Bi metâ thö, bi wâhmakhmeto thö;
Ca hnying bi, ke ca saû bi ge ta je hofuc ûnyi hnyi hnyimök:
6Ca hna degecâ bi, me e ame he ka tuö u;
Betenge ju gan, me e ame he ka omeli u.
7E beönua metâ: bi metâ thö:
Eke, bi wâhmakhmeto thö, tha e me ta je ûnyi u je hom.
8Oûnyihnathoâ thö e, me e ame he ka ogöranyi u:
Kʼ ame he ka oganö u, u ka he ka delûâ e.
9E ame he ka obicö u ge korona ae hmanenang,
Me ham köu hnabinybak ae mec.
10Nokuk lö, long ju, me kap ju hok ta je hofuc;
Me me se hia ta je hunainy ânyâm möt.
11Oge nö u hnyi deny metâ;
Oge me su u hnyi je gethen deny wisa.
12U ka he, ame ca he ka hnek hnâm ta je hna okca;
Ke u je ne wadring u me ca he ka haû.
13Kât hmâ ju hna ûnö; ca hna:
Tuö ju e; anyin a wale melâm.
14Ca dit ka hnyi gethen deny tavat ae monu,
Ke ca he hnyi gethen deny tavat ae kong.
15Sâkâû but gan, ca vheno e;
Hwio thö ûnyi hnyin, ke ie he thö.
16Anyin adre me ca mokut ödra ka ca ânyâ hulo;
Ame hia but hnödra bemokut ödra ka ca othöâ keihen.
17Anyin adre me han aretoiny hulo,
Me ijem wainainy ûokonguny.
18Ke haba gethen deny tavat ae wisa me helâ me melam ae hadröngöc,
Ame melam tot ke ne o but jebigö.
19Haba gethen deny tavat ae monu me helâ me menekholom:
Adre me ca wâ bi ûnyi adre thö hnyin.
20Nokuk lö, long ju hok ta je hofuc;
Ta ju hnyikönyâm ka hok ta je uthofuc.
21E so e me ca he ka hia hnyi hnyimâkâm,
Tuö ju ta je ûnyi e eû hnyi wanben hnyekom.
22Anyin a wale melen tavat adre me wâ ta je ûnyi e,
Me tang hwegien unyin hia.
23Ti tuö wia ju hnyekom;
Anyin ame o but möt ûnyi e.
24Degec ut hwali ûnyi hnyi hnyimâm,
Ke ûsâkâûöâ but möu li esongot ae ûkhin fuc.
25Bwele wisa ju li emâkâm,
Ke so ame he wan li emâkâm ka bwele cici u.
26Okhabalavâ deny li cam,
Me me tethmâ dem ta je gethen hia.
27Ca saû bi ka hnyi ke keihen metâ me me:
Oc ut cam ûnyi hnyi hulo.
Currently Selected:
Ta je Vejec 4: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society