Ta je Vejec 2
2
1NÖKU K lö, u je ne he ka kap hok ta je hofuc,
Me ip unyâm anyik ta je hnanyibu;
2Mʼ u ma tevehlöng metâ,
Me hnyokâ he ka wâhmakhmeto;
3Eke, u je ne hawâ metâ,
Me hongot ka wâ ûnykûme;
4U je ne elâm e helâ me sileva,
Me elâm e helâ me tang omjeû adre ikhâlâ;
5Awe, u me he ka wâhmakhmetoâ hwakecin ot kö Iehova,
Me khanö u bi Khong.
6Anyin a Iehova ame ham metâ;
Ke ûnyi hnyi hnyimen ame o wâhmakhmeto me wâ ûnykûme:
7E ame ip metâ ae so hobi kâu tavat ae wisa,
E thibi becin tavat adre me he, ke ba hnyikongudra;
8Me me he ka wâ je gethen deny hna owisa,
Me tuö gethen deny anyin wakap.
9Me u me he ka wâ ûnykûme wisa, me hna owisa,
Me ûnyi ae ûcû, me je gethen hia ae so.
10Anyin ame he metâ ka dit eû hnyi hnyekom,
Kʼ ame he ka senem bi ka hanom wâhmakhmeto;
11Ame he ka ō u hnen ûnykûme,
Kʼ ame he ka tuö u hnen wâ ûnykûme:
12Me me omeli u ûnyi hnyi gethen ae kong,
U nyi ge at ame ûkhin fuc;
13Tavat adre me hna degecâ je gethen deny wisa,
Me vheno bi je gethen deny menekholom;
14Tavat adre me senyin he ka ânyâ hulo,
Me hobâ hwegien hwakecin ae kong;
15E hâû dedra ta je gethen,
Ke ödra hwali hnyi anyidra je gethen:
16Me he ka tuö u ge momo kanyua,
Wale momo kanyua, at ame fuc ûtakû;
17At ame hna degecâ at ûne kâu ke tiga hlu,
Me hnying hna ûhihinyköu me Khongon:
18Anyin ame ihnyöng ka hnyi mok umen bi uma,
Me deny ta je gethen ka ta je komok:
19Ame ca hmetu ke at ge tavat adre me he kâu,
Kʼ adre me ca he ka o hmetu ka hnyi je gethen deny möt:
20Me u me he ka vheno je gethen deny tavat ae so,
Me tuö je gethen deny tavat ae wisa.
21Anyin ame he tavat ae wisa ka labā hnyei,
Kʼ ame he tavat ae ba hnyikongudra ka mō.
22Ke adre me he ka subâ degecâ tavat ae kong ûnyi hnyi hnyei,
Ke adre me he ka ve degecâ tavat iyawo ûnyi hnyin.
Currently Selected:
Ta je Vejec 2: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society