Ta je Vejec 19
19
1E SO at ae ba ta ûnyi kʼ ame vheno anyin wisa,
Hon at ae hwali ifucin ke monu.
2E ca so he ka ba wâhmakhmeto ge at;
Ke ame he ka monu at ame he logot ge li can.
3Haba hwen monu anyin at, me ame ohwalö deny gethen;
Ke ame hmonyin hnyekon ko Iehova.
4Adre me bi hanen je lawaeny ae se ge omjeû:
Kʼ adre öûsâkâûöâ lahanen ka at ae ba ta ûnyi.
5Ame ca he ka ba hwaban ka at ame sit hofuc thoi:
Kʼ ame ca he bi ka so at ame ha thoi.
6E se hia adre me he ka sumat ge at ame ham gânâ:
Ke haba at ae kuia je bwihlany, me lawaeny thithö tavat hia.
7Adre me hûkotiâ at ae ba ta ûnyi hnen je liamekeiny më:
Kʼ ame ti he je lawaeny ka ûsâkâûö më,
E ame hnu hotudrin me je hofuc, ke hiʼ ödra bi.
8Haba at ae hu hnyekon, me ame ka betenge bi gan:
Ke ame he ka wâ so at ame tuö wâ ûnykûme.
9Ame ca he ka ba hwaban ka at ame sit hofuc thoi:
Kʼ ame he bi ka hia at ame ha thoi.
10E ca ûcû bi ka at ae monu he ka kap sot,
Ke ti ca ûcû bi ka athnyaba he ka muso ta je than.
11Haba hna wâ wia hnen at, me ame obecâ anyin hmonyin;
Ke hnân ohmanenangâ e, he ka onuâ hna hanyâûâ,
12Haba wathethot anyin than, me helâ me liona ame kuku;
Ke haba anyin betenge, me helâ me dân hau hon hnaonying.
13Haba nokon ae monu me wale hmakiny kamen:
Ke ame khukhula bala bi je iwatretra anyin momo.
14Haba uma me omjeû, me wale jekhoû ûnyi ge lakamen:
Ke ûnyi ga Iehova âiân a momo wâ wia.
15Haba hwakecin ūsēnyin me ame okûâ mokut hnying ae gan;
Ke ame he ka mekihnânem at ame höciâ huliwa.
16Haba at ame tuö hnanyibu, me ame ka tuö hanon bi:
Ke haba at ame khâlânden hnyi deny gethen, me ame he ka mok.
17Haba at ame betenge ge at ae theduoc, me ame më ham kö Iehova,
Ke e ame he ka bi hwaban hnen hna ânyâ ae so.
18Nâ thö nokom, e me tiga hu geju bi;
Ke u me ca he ka ip hnyi hnyekom he ka ohia e.
19Ame he ka hu hwaban ka at ae gan wathethot:
Anyin a u je ne omelo e, me hamâm he ka ânyâ hmeto bala.
20Long ju ûhnenamö, me kap ju hna ûne,
Mʼ u me he ka metâ hnyi obiny.
21E se hia ûnykûme eû hnyi hnyekon at;
Ke ame he ka tethmâ musi anyi Iehova,
22Haba weny at, me betenge:
Ke so at ae theduoc hon at ae thoi.
23Haba ot kö Iehova, me wale hnân möt:
Kʼ ame he ka laba sekon wale at ae hu e;
Ame ca he hulo ka senâ e.
24Haba ūsēnyin, me ame odilâ hnyamen hnyin mini,
Ke ame höcö he ka ohmeto e ka hnyi hnyimen.
25Kot dö at ame ûhiö, me ame he ka nâ wâ wia hnen at ae ba hnyekon:
Ke nâ thö at ame wâ ûnykûme, me e ame he ka wâhmakhmetoâ metâ.
26Haba at ame fuc bebehu ka kamen, ke obâ degecâ hinyen,
Me wale nokon a at ame okûâ hmehma me haikongo.
27Nokuk lö, soju long hwa ûne
U ka he ka labö omono thibut je ifucin wâ ûnykûme.
28Haba at ohnatho ke at ae ûnyi baû, me ame hlumâ hna owisa:
Kʼ ame utâ hulo ge hnyimen tavat ae kong.
29Adre hia but penapena hna owisa hobi kâu tavat ûhiö,
Ke je hna kot hobi kâu jön tavat ae monu.
Currently Selected:
Ta je Vejec 19: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society