Numera 8
8
1KE haba Iehova ame ha kö Mose, ka habe, 2Ha thö kö Arona, ka habe, U ka he ka vâc je lamepa, ame he je lamepa a seven ka umumelam hnyi hnyimakan taben lamepa. 3Me Arona ame ânyâ eling; kʼ ame vâc je lamepa hnyi hnyimakan taben lamepa, helâ me Iehova ame ha kö Mose. 4Ke walang hna huliwan taben lamepa, a gol adre huliwan ge hama; wale taben ke ne o but je vongon adre huliwan ge hama: e ame ânyâ taben lamepa hoton tulut a omanenâ Iehova kö Mose.
5Ke Iehova ame ha kö Mose, ka habe, 6Hom dö tavat Levi ûnyi hnyi wanben lakon Isaraela, me obosoi ödra. 7Ke walang hnâm hna he ka ânyâ ködra, mʼ adre me he ka bo so: u ma duköiʼ ödra ge köien obosoâ, kʼ adre me he ka giâ je unyidra hia, me hneû anyidra je ûkhaû, me obosoi ödra. 8Ke adre me he ka hom nak bolok, me hudiny han, a salawa ae so adre ûhaniken me wakaco, ke u me he ka hom ke nak bolok hnân hudiny hulö. 9Ke u me he ka hom at Levi ka hnyi uma ûkhacaköu: ke u me he ka ûkhacaköuâ tavat, a lokon Isaraela hia: 10ke u me he ka hom tavat Levi ka hnyi hnyimakö Iehova: ke hamen lakon Isaraela he ka ip je hnyamödra hon je at Levi; 11kʼ ame he Arona ka hajijingâ tavat Levi hnyi hnyimakö Iehova hnân hudiny hajijing unyi ge lakon Isaraela, mʼ adre me he ka hnân hobi kâu huliwa anyi Iehova. 12Ke hamen tavat Levi he ka ip je hnyamödra hon ban li bolok: ke u me he ka hudo khaca hnân hudiny hulö, me khaca hnân hudiny leû, kö Iehova, me me bi hwaban möt anyin tavat Levi. 13Ke u me he ka otilâ je at Levi hnyi hnyimakö Arona me lakon, me hajijingi ödra hnân hudiny hajijing kö Iehova. 14Ke u me he ka ke ip tavat Levi helâe ûnyi hnyi wanben lakon Isaraela: ke hnân hobi könya tavat Levi. 15Ke hwaban dö e ame he tavat Levi ka didro he ka huliwa hnyi uma ûkhacaköu: ke u me he ka obosoi ödra, me hajijingi ödra hnân hudiny hajijing. 16Anyin adre ham muʼ ödra könya ûnyi hnyi wanben lakon Isaraela; oge me hum ödra hobi könya, hnyi hnen je nokon a bân hia, a je atö hia hnyi lakon Isaraela. 17Anyin a hobi könya je atö hia unyin lakon Isaraela, a tavat me omeno: oge me okabi ödra hobi könya hnyi bong waleji oge me kot hnyin je nokon a bân hia hnyi hnyei Aigupito. 18Ke oge me hom tavat Levi hnân bi hnen je nokon hia a bân unyin lakon Isaraela. 19Oge me ham muâ tavat Levi kö Arona me lakon, ûnyi hnyi wanben lakon Isaraela, he ka ânyâ huliwa anyin lakon Isaraela hnyi uma ûkhacaköu, me bi hwaban möt anyin lakon Isaraela: me me ca he ka mok lakon Isaraela, e ka hakekeny lakon Isaraela ka hnyi dok ae kap. 20Ke haba Mose, me Arona, me ûkhacaköu hia anyin lakon Isaraela, me adre me ânyâ helâe ka tavat Levi: hoton hna hûna hnö Iehova kö Mose ge tavat Levi: ame ânyâ ködra helâe hnen lakon Isaraela. 21Ke haba tavat Levi adre me obosoi ödra bi ûnyi hnyi hulö, me hneû anyidra je ûkhaû; ke haba Arona ame hajijingi ödra hnân hudiny hajijing hnyi hnyimakö Iehova; ke Arona ame bi hwaban anyidra möt me obosoi ödra. 22Ke hwaban e, haba tavat Levi adre me didrö ka hnyin uma ûkhacaköu he ka hnyi huliwa hnyi hnyimakö Arona me lakon: hoton hna ha hnö Iehova kö Mose ge at Levi, ödra adre me ânyâ helâe ködra.
23Ke Iehova ame ha kö Mose, ka habe, 24Walang bongon tavat Levi: haba hwân hnyi twente faiv je hunaidra me gan hon e adre me he ka didrö he ka labö huliwa hnyi uma ûkhacaköu: 25ke e ka fifte je hunaidra me adre me he ka bi obiny anyidra huliwa, kʼ adre me ca he hmetu ka hnyi huliwa; 26ke adre me he ka labö huliwa tha ödra me je liamekeiny mödra hnyi uma ûkhacaköu, he ka tuö je hanymen, kʼ adre me ca he ka hnyi ânyâ huliwa. U ma he ka ânyâ helâe ka at Levi ge je hanymödra.
Currently Selected:
Numera 8: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society