Numera 35
35
1KE haba Iehova ame ha kö Mose hnyi dok ae tha hon hnyi Moaba hnyi baten Joridano wale Jeriko, ka habe, 2Huna thö ka lakon Isaraela, mʼ adre me he ka ham ûnyi hnyi idra je taun he ka labā, ka at Levi; kʼ öbun e he ka ham minya ka at Levi je utkânâ igigilö je taun. 3Me me he ka hu je taun gadra he ka labā; ke haba je utkânâ igigilö je taun, me hnân hobi kâu haledra je kau, me anyidra ta je omjeû, me haledra je meno hia. 4Ke haba utkânâ igigilö je taun, wale öbun e he ka ham ka at Levi, me ame he ka hwân hnyi hna up hagin vetoiny taun ke ne o but ka hnyi khaca thauzan kubit igigilö. 5Ke öbun e he ka tuluto hoton je taun, tu thauzan je kubit e deiö, ke tu thauzan je kubit ka hnyi hwaiöu, ke tu thauzan je kubit e jio, ke tu thauzan je kubit ka hnyi hwadrö, kʼ ame he ka mokut taun hnyi wanben. Wale je utkânâ hobi ködra igigilö je taun. 6Ke haba je taun öbun e he ka ham ka at Levi, me wale je taun a siks hnân lubaduöng, wale öbun e he ka ip hobi kâu at ûhlingö hnân he ka kec ka hnyin: ke öbun e he ka ham minya ködra fâte tu ta je taun. 7Ke haba je taun hia öbun e he ka ham ka at Levi, me ûsa fâte eit ta je taun: öbun e he ka ham e me utkânâ igigilö a 8Ke öbun e he ka ham je taun ûnyi hnyi hnyei iny lakon Isaraela, kʼ öbun e he ka hom gânâ ûnyi hnyi hnyei ae gan; kʼ öbun e he ka hom ûhnyûkongo ûnyi hnyi hnyei ae ûhnyûkong: adre me he ka ve ham je taun ka at Levi hoton je idra ae hu gadra.
9Ke Iehova ame ha kö Mose, ka habe, 10Ha thö ka lakon Isaraela, ka habe, Öbun ka he ka hanyâûâ Joridano ka hnyi hnyei Kanana, 11me öbun e he ka kû ke je taun hnân je tauniny lubaduöng hobi köbun; me me he ka kec ka hnyin at ûhlingö wale at ame hlingâ at a utöteta. 12Haba je taun eling me hnân kec ka hnyin can at ame he ka bi hwaban; me me ca he ka mok at ûhlingö kʼ adre tiga ca lelö e ka hnyi hnyimakan ûkhacaköu he ka owisa e. 13Ke haba je taun eling öbun e he ka ham, me wale siks ta tauniny lubaduöng hobi köbun. 14Öbun e he ka ham kun ta taun hnyi hoton Joridano, ke öbun e he ka ham minya kun ta taun hnyi hnyei Kanana; wale je tauniny lubaduöng. 15Ke hnân hobi kâu lakon Isaraela, me atkanyua, me tavat adre me tha laba medra, je taun eling a siks hnân lubaduöng hnyin; me me he ka kec ka hnyin tavat hia adre me hlingâ at a utöteta. 16Ke ame ne hia but kot moko e ge ut fao, awe, at ûhlingö e; ke adre me he ka hlingâ at ûhlingö. 17Ke ame ne kot moko e ge veto hnyi hnyamen, a ûnyi hnân I hlingâ at, kʼ ame ne mokcu, awe, at ûhlingö e: ke adre me he ka hlingâ at ûhlingö. 18Ke ame ne kot e ge uto hnyi hnyamen, a ûnyi hnân hlingâ at, me ame mokcu, awe, at ûhlingö e; ke adre me he ka hlingâ at ûhlingö. 19Ke hamen at bi hwaban komok he ka hlingâ at ûhlingö: e ka ûkhanö mê e ame he ka hlingâ. 20Ke ame ne dâ e hnyi hnen hna hûkötiâ, kʼ ame ne mokut iyâûâ me lûâ, me me mokcu; 21kʼ ame ne kot e ge hnyamen hnyi hmönyin, me me mokcu: me adre he bi ka hlingâ at a ûkhulup; at ûhlingö e: kʼ ame he at a bi hwaban komok ka hlingâ at ûhlingö, e ka ûkhanö mē. 22Ke ame ne ie dâ e ke ca hmönyin bi, kʼ ame ne lûâ ke a ca mokut iyâûâ, 23ame ne ge veto, a ne ûnyi hnân hlingâ at, ke a ca wâ bi e, kʼ ame khûâ me aat dö, kʼ ame mokcu at, ke ca iwahnaihmiony mē ehac, kʼ ame ca elâm he ka okongoâ: 24awe, ame he ûkhacaköu ka owisa gadru, a at hlingâ at, me at ame bi hwaban komok, hoton je hna owisa eang: 25ke ame he ûkhacaköu ka omelö at ame hlingâ at ûnyi hnyi hnyamen at ame bi hwaban komok, ke ame he ûkhacaköu he ka ohmeto e ka hnyi tauniny lubaduöng, waleji e ame kec ka hnyin: ke e ame he ka laba eling ke ne o but ame mokcu at bihut ae beönua, at adre hû ge wakaco ae kap. 26Ke ame ne he at ame hlingâ at ka dit hanyâûâ hnyigöulen tauniny lubaduöng, waleji e ame kec kâu; 27kʼ ame ne wâ e hnen at ame bi hwaban komok hnyi hoton hnyiʼ göulen tauniny lubaduöng, kʼ ame ne hlingâ at ûhlingö hnen at ame bi hwaban komok, awe, e ame ca he ka hulö ge dren: 28anyin ae ûcû kâu he ka laba hmâ hnyi tauniny lubaduöng, ke ne o but ame mokcu at bihut ae beönua: ke hwaban imekiny at bihut ae beönua, me ame he at ûhlingö ka hmetu ka hnyi iny hnyei. 29Haba ta je ûnyi e me wale hnanyibuiny owisa köbun hnyi anyibun ta je dö hnyi je hnyababun hia. 30Haba at ame hlingâ at, me adre me he ka hlingâ thibi at ûhlingö ge hofuc hwan hnyat ohnatho: kʼ ame ca he at a khaca ka ohnatho ge ke at mʼ adre me he ha hlingâ e. 31Ke haba khaca, öbun e ca he ka kap hwaban möt anyin at ûhlingö ae ûcû he ha mok: e hnathu adre me he ka hlingâ. 32Ke ca he öbun ka kap hwaban möt anyin at ame kec ka hnyi tauniny lubaduöng, me me laba hmetu bi hnyi iny hnyei, ke ne o but imekiny at bihut. 33Waleling mʼ öbun e ca he ka okongoâ hnyei öbun e labā: anyin a haba dra, me, wale ûnyi ame okongoâ hnyei: ke e ca khanʼ ödra he ka bi hwaban melen hnyei unyi hnyi dra adre hingölö hnyin, ke so bi ûnyi ge dren at ame hingâlâ. 34Ke ca he öbun ka okongoâ hnyei öbun e laba hnyin, ke inya oge me laba hynin: anyin a inya Iehova oge me laba hnyi wanben lakon Isaraela.
Currently Selected:
Numera 35: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society