Numera 28
28
1KE haba Iehova ame ha kö Mose, ki habe, 2Hûna thö ka lakon Isaraela me ha ködra, ka habe, Haba hut könya, wale jeû hobi kâu je hut a an hnen meic me me bo so könya, me wale ûnyi öbun e he ka tuö he ka hudo könya hnyi je ûen adre thu. 3Ke u me he ka ha ködra, ka habe, Walang hut a an ge meic öbun e he ka hudo kö Iehova; a je lakon mamoe baga a khaca hunainy ae ba hnyikongon, ûse lo hnyi ke bong me ke bong, hnân hudiny leû hnyi ta ogo bong hia. 4U me he ka hudo ke nokon mamoe hnyi hnyomakatu, ke u me he ka hudo ke nokon mamoe hnyi sahac; 5ke khaca omer salawa adre ûhaniken me wakaco adre kokot a ke keihen a vakiny hin, me hnân hudiny han. 6Wale hudiny leû hnyi ta ogo bong hia, waleji adre hûna hnyi bucen Sinai me me bo so, a hut a an ge meic kö Iehova. 7Ke haba hudiny ic, me ke keihen a vakiny hin hnân bi hanen nokon mamoe a khaca: u me he ka hingâlâ but waina ae hwege kö Iehova hnyi dok ae kap hnân hudiny ic. 8Ke haba nokon mamoe a loiny me u me he ka hudo hnyi sahac: helâ me hudiny han hnyi hnyomakatu u me he ka hudo e, ke helâe hudiny ic, me hut a an ge meic ae bo so kö Iehova.
9Ke haba hnyi bong sabath, me lo li nokon mamoe baga ae ba hnyikongon a khaca hunainy, ke lo li omer salawa hnân hudiny han adre ûhaniken me wakaco, me hudiny ic a hanen: 10haba ûnyi e me hudiny leû hnyi ta je sabath hia, ke ca ha bi hudiny leû hnyi ta ogo bong, ke hudiny ic a hanen.
11Ke haba hnyi hnyimakan anyibun je tehi me öbun e he ka hudo hudiny leû kö Iehova: a lo li nak bolok, ke khaca mamoe baga, ke seven ta lakon mamoe baga ae ba hnyikongon, a khaca hunainy; 12ke kun ta omer salawa adre ûhaniken me wakaco hnân hudiny han hnân bi hanen ke bolok me ke bolok; ke lo li omer salawa adre ûhaniken me wakaco hnân hudiny han, a hanen mamoe baga a khaca; 13ke khaca omer salawa adre ûhaniken me wakaco hnân hudiny han, a hanen nokon mamoe a khaca; hnân hudiny leû ae bo so, hut a an ge meic kö Iehova. 14Ke haba je hudiny ic gadra, me hafiny hin waina hnân bi hanen ke bolok, ke ke keihen a kuniny hin hnân bi hanen mamoe baga, ke ke keihen a vakiny hin hnân bi hanen mamoe: wale hudiny leû hnyi je tehi hnyi huna. 15Ke khaca got baga hnân hudiny hulö, he ka hudo kö Iehova; ke ca ha bi hudiny leû adre hudo bala, me hudiny ic a hanen e.
16Ke haba hnyi tehi a bân hnyi bong a fortininy, me adre me he ka ânyâ paseka kö Iehova. 17Ke hnyi bong a fiftininy tehi eling, me adre me he ka bijeû: adre me he ka han areto adre ca levenâ hnyi je bong a seven. 18Ke haba hnyi bong a bân, me ame he ka hu ûkhacaköu ae kap; kʼ öbun e ca he ka ânyâ huliwa ae hmak: 19ke öbun e he ka hudo hut a an ge meic, a hudiny leû kö Iehova; wale lo li nak bolok, ke khaca mamoe baga, ke seven je lakon mamoe a khaca hunainy: a je meno ae ba hnyikongudrin: 20ke haba je hudiny han a hanen, me, salawa adre ûhaniken me wakaco: öbun e he ka hudo kun ta omer hnân bi hanen ke bolok, ke lo li omer hnân mamoe baga; 21u me he ka hudo ûsa khaca omer he ka ve bi hanen je lakon mamoe a seven; 22ke khaca got baga hnân hudiny hulö, me me bi hwaban anyibun möt. 23Öbun e he ka hudo e, a tha e me hudiny leû adre hudo hnyi hnyomakatu a hudiny leû ae hmâ bala. 24Ke öbun e be ka hudo helâe hnyi je bong a seven, wale han he ka bi hanen hut a an ge meic kʼ ame bo so kö Iehova: adre me he ka hudo e a tha e me hudiny leû ae hmâ, me hudiny ic a hanen. 25Ke haba hnyi bong a seveniny öbun e he ka hu ûkhacaköu ae kap; ke öbun e ca he ka ânyâ huliwa ae hmak.
26Helâe minya hnyi bong bongon je wan a bân, öbun ka he ka hudo hudiny han ae teb ûnyi kö Iehova, hnyi anyibun bijeuâ je wik, me öbun e he ka hu ûkhacaköu ae kap; kʼ öbun e ca he ka ânyâ huliwa ae hmak: 27ke öbun e he ka hudo hudiny leû ae bo so kö Iehova; a lo li nak bolok, ke khaca mamoe baga, ke seven lakon mamoe baga a khaca hunainy; 28me hudiny han a hanen e, wale salawa adre ûhaniken me wakaco, kun ta omer hanen bolok a khaca, ke lo li omer hanen mamoe baga a khaca, 29a ûsa khaca omer he ka ve bi hanen lakon mamoe a seven; 30ke khaca got baga, hnân bi hwaban anyibun möt. 31Öbun e he ka hudo e a tha e me hudiny leû ae hmâ, me hudiny han a hanen (a je meno ae ba hnyikongon) tha e me je hudiny ic a hanen e.
Currently Selected:
Numera 28: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society