Numera 27
27
1KE ame o but je hlu laku Zelofeada, nöku Hefera, nöku Gileada, nöku Makir, nöku Manase, a je lap anyi Manase nöku Josefa: ke walang ien lakon je hlu, jia Mala, me Noa, me Hogela, me Mileka, me Tireza. 2Ke ödrin e tot hnyi hnyimakö Mose me Eleazara at bihut, me hnyi hnyimakan je than me ûkhacaköu hia hnyi hwanumen uma ûkhacaköu, me ha, ka habe, 3A mokcu kamöhmun hnyi hnyebuba, ke e ame ca tha tot me tavat adre me bi tot kö Iehova unyin lahiö Kora: ke so bi e ame moko anyin hulö bi, ke ba nokon baga. 4Geû adre me he ka ohia ien kamöhmun hnyi wanben anyin lap, anyin ae ba nokon baga? Ha ihmun bi unyin je liamekeiny me cica. 5Ke Mose ame hom hodrin hofuc kö Iehova. 6Ke Iehova ame ha kö Mose, ka habe, 7E wisa hofuc hwan je hlu laku Zelofeada: e hnathu u me he ka ha idrin unyin je liamekeiny me kamödrin; ke u me he ka hna ködrin iny kamödrin. 8Ke u me he ka ha ka lakon Isaraela, ka habe, A ne mokcu ke at ke ba nokon baga, me öbun e he ka hna iny ka nokon hlu. 9Ke ame ne ba nokon hlu, me öbun e he ka ham iny hnyei ka je liamekeiny mē. 10Ke ame ne ba liamekeiny mē, me öbun e he ka ham iny hnyei ka je liamekeiny me kamen. 11Ke ame ne ba liamekeiny me kamen, me öbun e he ka ham iny hnyei ka je ûtangköu mē, a iny biju: ke wale hnanyibu adre owisa hobi kâu lakon Isaraela, hoton hna hûna hnö Iehova kö Mose.
12Ke Iehova ame ha kö Mose, ka habe, Öliâ thö bucen eang a Abarima, me u me wâ hnyei waleji oge ham ka lakon Isaraela. 13Ke u ka hia but wâ e, me u me he ka he minya ka tha mokut me lakâmâm, helâ me Arona a tuhâm: 14anyin a obe hanyâûâ hok hofuc hnyi hnyebuba Zin, waleji hnyi hna iwatretra hnen ûkhacaköu, he ka okabi nya hnyi an hnyi hnyimaködra. (Wale an Meriba e Kadesi, hnyi hnyebuba Zin.) 15Ke Mose ame ha kö Iehova, ka habe, 16E na he Iehova Khongon je hanon tavat hia, ka otilâ ke at hon ûkhacaköu, 17me me didrut hnyi hnyimaködra me dit hmetu hnyi hnyimaködra, me lili ödra e helē, me ohmetu ödra, me me ca he ûkhacaköu anyi Iehova ka helâ me hnahat mamoe ae ba at ame tuö. 18Ke Iehova ame ha kö Mose, ka habe, U me he ka hum Josua nöku Nuna, at ae so hanon, ke ip hnyamâm hon; 19me otilâ e hnyi hnyimakö Eleazara at bihut, me ûkhacaköu hia; me hûna kâu hnyi hnyimaködra. 20Ke u me he ka ip hon e hanen ânyâm hmanenang, me me löng hoton hnen ûkhacaköu hia a lakon Isaraela. 21Ke e ame he ka tot hnyi hnyimakö Eleazara at bihut, ke hamen he ka hnö hobi kâu hnyi hna owisa hnen Urim hnyi hnyimakö Iehova: ke adre me he ka he hoton hnen hna ha, kʼ adre me he ka hmetu hoton hnen hna ha, a e me lakon Isaraela hia a tha ödra mē, wale ûkhacaköu hia. 22Ke Mose ame ânyâ helâ me hna hûna hnö Iehova; me e ame hum Josua me otilâ e hnyi hnyimakö Eleazara at bihut me ûkhacaköu hia: 23me e ame ip li hnyamen hon, me hûna kâu, helâ ma hna ha hnö Iehova a deny Mose.
Currently Selected:
Numera 27: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society