Numera 20
20
1KE ame o but lakon Isaraela, wale ûkhacaköu hia, ka hnyi hnyebuba Zin, hnyi tehi a bân; kʼ ame labā Kadesi hnen tavat; ke ame mokcu eling Miriama, mʼ adre me konâm e. 2Ke ba köiö hobi kâu tavat, mʼ adre me ûkhacaköu me tot kö Mose me Arona. 3Me ame ivinö tavat me Mose, me ha, ka habe, Ohmun na tha mokcu ehac me je liamekeiny möhmun hnyi hnyimakö Iehova! 4Ieû gabu obe hom ûkhacaköu anyi Iehova ka hnyi hnyebuba eang, mʼ öhmun e he ka mok e, me je halehmun? 5Ke ieû gabu obe hum ohmun ûhehmun Aigupito, he ka hum ohmun ka hnyi dok eang ae kong? haba dok ang me dok ae ba hatungen, me wan ometâ, me vine, me rimona, ke ba köiö hnân ic. 6Ke haba Mose me Arona ödru me he ûhedru unyin ûkhacaköu ka hnyi hwanumen uma ûkhacakoû, me ta ju hnyikânâi: me ame manen dut hmanenangi Iehova ködru. 7Ke Iehova ame ha kö Mose, ka habe, 8Hom dö uci, ke ûkhacaköuâ tavat, a u, me Arona liamekeiny möu, ke öbu me he ka fuc ka kic hnyi hnyimaködra, me ame he ka ham köien; ke u me he ka oâ köiö ûnyi hnyi kic hobi ködra: ke u me he ka habelen ûkhacaköu, me haledra omeno. 9Ke Mose ame hom uci ûnyi hnyi hnyimakö Iehova, hoton hnen hna hûna. 10Ke haba Mose me Arona ödru me ûkhacaköuâ tavat cicö kic, me ha ködra, ka habe, Löng ju, öbun tavat bi tot; ohmu me he ka oâ köiö köbun ûnyi hnyi kic eang? 11Ke Mose ame inâ hnyamen goranyai, me olo kot kic ge uci: kʼ ame patrutrua köiö ae gan, me ame ic ûkhacaköu me haledra omeno. 12Ke Iehova ame ha kö Mose me Arona, ka habe, Anyin a öbu me ca labageju könya he ka okabi nya hnyi hnyimakan lakon Isaraela, awe, öbu me ca he ka hom ûkhacaköu eang ka hnyi hnyei oge hia but ham ködra. 13Haba köiö ang me an Meriba: anyin ame ivinö lakon Isaraela me Iehova, ke adre okabâ e gan.
14Ke haba Mose ame kunâ je ûthûmetu ûheny Kadesi ka thaniny Edoma, he ka ha, ka habe, Walang hofuc ho Isaraela a liamekeiny möu, ka habe, E khanö u ta je vec a o köhmun: 15a gʼ ame he Aigupito ai lakamöhmun: 16ke ohmun e tenge kö Iehova, me ame löng hohmun, me kunâ angela, me hum ohmun ûheny Aigupito: ke wâ bi ohmun ang hnyi Kadesi, a taun hnyi obiny em hnyei: 17ö u hnʼ ohmun he ka he hnyi wanben em: kʼ ohmun e ca he ka he hnyi ta hnyei, me hnyei vine, kʼ ohmun e ca he ka ijem köiö ûnyi hnyi je an: ohmun e he ka he thibi hnyi cit gethen anyin than, kʼ ohmun e ca he ka saû ka hnyi ke keihen metâ me me, ke ne o but ohmun e he ka hna but hnyigöulem. 18Ke Edoma ame thu kâu, ka habe, U me ca he ka gethen eang unyik, wâ oge nye oâ köu hele vat. 19Ke ame ha kâu lakon Isaraela, ka habe, Ohmun e he ka he hnyi hna cit gethen: ke ohmun ka ijem me halehmun köiö a belem, me oge me he ka bi hwaban: u na hnö nya he ka he, ke ba ke ûnyi oge me he ka ânyâ. 20Ke e ame thu, ka habe, U me ca he ka gethen eang. Me Edoma ame hawâ tavat ae se hia he ka vat mē, me hnyam ae hwege. 21Ke höcö Edoma he ka hna Isaraela ka he hnyi iny: me me saû thö Isaraela gan.
22Ke adre me hna Kadesi; kʼ ame o hnyi bucen Hora lakon Isaraela, a ûkhacakoû hia. 23Ke Iehova ame ha kö Mose me Arona hnyi bucen Hora, hnyi baten hnyei Edoma, ka habe, 24Adre me he ka hum Arona ka lakamen: ke e ame ca he ka hnyi he ka hnyi hnyei waleji oge ham ka lakon Isaraela, can hnöbu hna hanyâûâ hok hofuc hnyi an Meriba. 25Hum Arona me nokon a Eleazara, me hum ödru ka hnyi bucen Hora: 26me uny jut ûkhaû Arona me okhauö Eleazara a nokon: kʼ adre me he ka hum Arona ka lakamen, kʼ ame he ka mokcu eling. 27Ke Mose ame ânyâ helâ me Iehova ame hûna: ke ödrin e öliâ bucen Hora hnyi hnyimakan ûkhacaköu hia. 28Ke Mose ame uny jut je ûkhaû Arona, me okhaûo Eleazara a nokon; me ame mokcu Arona eling hon bucen: ke ame utut hmetu Mose me Eleazara ûhedru hon bucen. 29Ke e khana but ûkhacaköu hia a ga mok Arona, me haba lap Isaraela hia adre me tenge thungaû thöte ta je bong, ca Arona.
Currently Selected:
Numera 20: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society