Buk wa To̱ni̱a̱u̱ 12

Pirnanet ci ol wak a̱tu̱we̱

1Imma i̱i̱te̱ne̱ neci, akate alaani He̱ro̱di̱#12:1 Alaan He̱ro̱d: Awu ol He̱ro̱d cu azi ne, He̱ro̱d Agirippa. Een enne ngerrti do̱le̱c ci He̱ro̱d wa A̱ddi̱ki̱re̱. IkebBuk wa To̱ni̱a̱u̱ 12:1-23. Okko He̱ro̱d wa A̱ddi̱ki̱re̱ een alaan koor bali a̱rri̱ta̱i̱ Ye̱su̱ ke̱. IkebMa̱te̱yo̱ 2:1-8; Lu̱ka̱ 1:5. Bali vu̱rrta̱ ming okko He̱ro̱d wa A̱ddi̱ki̱re̱ a̱da̱i̱, ize ngerinne He̱ro̱di̱ Antipas alaan. Een enne alaan i̱i̱te̱ne̱ bali a̱gga̱me̱k Joni Ye̱su̱ ba̱ti̱ti̱mo̱ ke̱. IkebMa̱te̱yo̱ 14:1; Marko 6:14; Lu̱ka̱ 3:1; Buk wa To̱ni̱a̱u̱ 4:27. i̱gi̱d ol wak a̱tu̱we̱ arik lagam. 2Aanyik aciir ciginnek ku̱ru̱we̱t Je̱mi̱s wa een gotoni Jon ko̱ nya̱tu̱ba̱ta̱ ka̱da̱k. 3Baling okko enne acin atalne olli Ya̱u̱do̱, odola zin orong ka̱gga̱m Peturu bu̱k. A̱gga̱m zin nonno i̱i̱te̱ne̱ wa adahe olli Ya̱u̱do̱ kwo̱o̱r wa Umunet wak iróng Amukcari.#12:3 Kwo̱o̱r wa Umunet wak iróng Amukcari: Adak olli Ya̱u̱do̱ kwo̱o̱r necu gwo̱o̱nya̱ turgerem, aadane nege i̱i̱te̱n bali eelanne Ta̱mu̱ta̱dde̱n ji̱ji̱ti̱gge̱k Masira. Aara nogo ngati e̱e̱ggi̱nne̱ du̱cca̱k. Akane kwo̱o̱r I̱i̱te̱ne̱ wa Va̱rda̱ngi̱nto̱. IkebLu̱ge̱z 12:17-20. 4Baling eceb enne nonno aarik lagam, kar zin kanyik aciir cik e̱e̱ggi̱n omoto ki torkonom kebeit nonno. Orong He̱ro̱di̱ kar kanyaha Peturu orgen ci ollu do̱o̱k ming e̱de̱cca̱ I̱i̱te̱n wa Va̱rda̱ngi̱nto̱#12:4 I̱i̱te̱n wa Va̱rda̱ngi̱nto̱: A̱a̱dda̱ olli Ya̱u̱do̱ i̱i̱te̱n bali arike ji̱ji̱ti̱gge̱k bi̱ye̱ tatuget cigge̱k kar Ta̱mu̱ta̱dde̱n ka̱va̱rda̱ng ce̱e̱zi̱ cigge̱k lo̱o̱ce̱ ci Masiro ke̱. Een i̱i̱te̱n cu i̱i̱te̱n bali adahe nege umunet balik iróng amukcari ke̱. Een i̱i̱te̱n cu ci i̱ye̱la̱ i̱i̱te̱n ci a̱kku̱nne̱ atin Ye̱su̱ ki Nyoon ci Ta̱mu̱ta̱dde̱no̱, eci bi̱ye̱ta̱ ciginnek utunyca mu̱nye̱n cigga̱c. IkebLu̱ge̱z 12:17-28; Marko 14:12; Lu̱ka̱ 22:7; Jon 1:9-35; 1 Ko̱ri̱nto̱ 5:7; 1 Peturu 1:19. atidic.

5Baling ngen Peturu aave lagama, alawek olli ke̱le̱ci̱o̱ nonno Ta̱mu̱ta̱dde̱n oroot.

Eelai Peturu

6Imma bali ba̱a̱l ming ngen alaani He̱ro̱di̱ kanyahak nonno lo̱ki̱ko̱ ke̱, adunge bali Peturu orgene ci aciir cik een rama, e̱ce̱bje̱ enne ziiye cik een rama, ovvo bo̱do̱k aciiri uggak ebek aran ci lagamo. 7Ataman niko, i̱ki̱ya̱ anjilo ci Manyi atukul lagam kize voor per. Otomowe enne Peturu kar abunna ingazi, kar kizek ne, “Tinga je̱e̱na̱ ataman!” Ki nginti i̱i̱na̱ ziiya ngati Peturu niko.

8Iizek zin anjilo nonno ne, “Burucek ru̱u̱ma̱ni̱ ki caava cigunnek.” U̱tu̱gu̱ Peturu ki ming a̱du̱wa̱k anjilo nonno ke̱. Kar bo̱do̱k Anjilo kizek nonno ne, “Dima ru̱u̱m wa malkinto kar zin nuwan.”

9Unu zin Peturu anjilo niko. Abarik zin Peturu ngen ka̱gga̱ ming een zoz ci a̱du̱wa̱ anjilo ko̱ de̱de̱, i̱no̱n enne azi ne een i̱yo̱ko̱ o̱no̱zzo̱k. 10Ozoroc nege aciir wak e̱e̱ggi̱n o̱o̱tti̱ ki wak anuwonik ebekce ko̱, kar zin ki̱vi̱ta̱k aran wa adimanai ziiye. Baling ovvo nege azuca, o̱o̱we̱ arani neci do̱, kar zin nege koot. Ming ovvo owo goola do̱yo̱i̱t utungek anjilo nonno lo̱o̱c dakdak.

11Bali vu̱rrta̱, i̱ki̱ya̱ Peturu a̱gga̱ zoz neci, kar kize ne, “I̱yo̱ko̱ zin ka̱gga̱wa̱ anna ming een Manyi ci i̱tto̱na̱ anjilo cinne ki̱ki̱ya̱ keelawa annit azzine cik He̱ro̱di̱ ki kaal do̱o̱k balik gerzek orong olli Ya̱u̱do̱ ogonika annit ke̱.”

12Baling a̱gga̱ Peturu zoz neci do̱o̱k, uk zin enne ce̱e̱ze̱ ci Ma̱ri̱ya̱ e̱e̱ti̱ Joni, een zara uggak cik Joni, Marko. Een necu nginti alutene ol cik a̱tu̱we̱ meelek kar kalayo. 13Baling arawa Peturu ce̱e̱z ci Ma̱ri̱ya̱, oṯokṯowan aran, kar zin du̱ca̱i̱ti̱ ci nga̱a̱ye̱ een zara Rhoda uk orong koo aran. 14Baling a̱gga̱ enne muluk ci Peturu, atalo zin enne oroot, abarik i̱mi̱re̱ iróng ngen oo aran, kar kegereny kize ne, “Aave Peturu arana!”

15A̱nne̱k ol nonno ne, “Adaki i̱nne̱t ngamoni.” Baling adang enne nogo a̱nne̱k ne, een de̱de̱, kar zin nege kizeto ne, “Een i̱yo̱ko̱ anjilo cinne.”

16Ma̱i̱je̱ Peturu ngen oṯokṯowan aran niko, baling ovvo nege oo aran kar kicinnet nonno, a̱ma̱li̱ltte̱ zin o̱o̱tti̱ cigge̱k. 17A̱nne̱k Peturu nogo ne, ijaktte li̱i̱m, kar zin koobek nogo gool ci aarane Manyi nonno lagama. Kar kizek nogo ne, “U̱du̱kta̱k Je̱mi̱s#12:17 Je̱mi̱s: Een Je̱mi̱si̱ cu gotoni Ye̱su̱ kar kize ddi̱ki̱ryo̱i̱t ci ol wak a̱tu̱ Ye̱su̱ Jerusalema. Eher enne waraga ci Je̱mi̱si̱. IkebBuk wa To̱ni̱a̱u̱ 12:17; 15:12-21; 18-19; Ga̱la̱ti̱a̱ 1:9. Anyak bo̱do̱k Je̱mi̱s imma ci bali een gotoni Jon kar kize to̱ni̱a̱t ci Ye̱su̱, wa bali a̱ru̱k He̱ro̱di̱ ka̱da̱k. IkebBuk wa To̱ni̱a̱u̱ 12:2. ki gotonogget zoz cu.” Kar zin enne kuk ngamani.

18Bali nge̱rre̱t, ming ovvo aciiri balik ebekce lagama ke̱ ingazi, u̱ku̱lte̱k je̱e̱n, kar kizeto ne, “Nya ci a̱ku̱k Peturu!” 19Baling aanyik He̱ro̱di̱ ol ciginnek koronggit nonno kar iróng amuda nonno. U̱cu̱b zin enne aciir balik ebekce ke̱ kar kaanyik nogo ku̱ru̱kte̱ ka̱da̱i̱to̱.

Daiz ci He̱ro̱di̱

Kar zin He̱ro̱di̱ kitinga lo̱o̱ce̱ ci een Ju̱de̱ya̱ kuk rok orog ci een Kesarea kar ka̱vvu̱ nginati do̱yo̱i̱t. 20Iróng bali He̱ro̱di̱ ki olli Tyre ki Sidon abak ju̱rru̱m; i̱vi̱ta̱ ol kar ka̱vvu̱to̱ ki nonno nga̱to̱de̱. Baling ovvo nege a̱gga̱wo̱ ki Blastus wa een du̱ca̱i̱t ci alaano, kar zin nege ki̱jji̱nne̱t zoz ci anyaha gano, eci nege i̱ri̱yo̱ gon lo̱o̱c ci He̱ro̱di̱.

21Imma i̱i̱te̱ne̱ ci ovvo nege arumo, i̱ti̱m He̱ro̱di̱ ru̱u̱ma̱ni̱ ciginnek alaanzetu, a̱vvu̱ zin enne lecera kar kozozik ol. 22Egerenyit zin ol, azi ne, “Een necu muluk ci ta̱mu̱ta̱dde̱no̱, iróng een e̱e̱t ci diiri!” 23Ataman niko, eci He̱ro̱di̱ iróng a̱di̱ngdi̱nga̱n Ta̱mu̱ta̱dde̱n, aanyik zin anjilo ci Manyi nonno ka̱gga̱m morizi, kar u̱lu̱ta̱ kadait nonno ka̱da̱k.

24Ma̱i̱je̱ zoz ci Ta̱mu̱ta̱dde̱no̱ otorye odohize kuzuca ol cik meelek.

25Baling e̱de̱cca̱ Barnabasi ki Saul li̱ngli̱ngo̱n ci anyike nege ol cik a̱tu̱we̱ muci Jerusalema, i̱mi̱rtte̱ zin oot Antiyokte ki Jon wa een zara uggak Marko.

Currently Selected:

Buk wa To̱ni̱a̱u̱ 12: tex

Highlight

Copy

Compare