2 Ko̱ri̱nto̱ 1

Zawinet ci Pa̱u̱lo̱

1Annita Pa̱u̱lo̱ ci bali atahala Ta̱mu̱ta̱dde̱n kize to̱ni̱a̱t#1:1 To̱ni̱a̱k: E̱e̱ggi̱n ol ne̱ko̱ cik i̱tto̱n Ye̱su̱ doize cinne kar koot ke̱de̱me̱zi̱t ol zoz cinne kar bo̱do̱k kanyik nogo doiz ci otowe nege kuulo cik lo̱rye̱nta̱k kar kangaruc ol mo̱ri̱zo̱we̱ bu̱k. ci Ye̱su̱ Ki̱ri̱sto̱,#1:1 Ye̱su̱ Ki̱ri̱sto̱: Azi keng cik zar cik een Ye̱su̱ ko̱ ne i̱ti̱ri̱zze̱t Ta̱mu̱ta̱dde̱n agita. Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. kar ki̱li̱ngli̱ng zoz cinne, keheri waraga cu ki Ti̱mo̱te̱yo̱ wa een gotonet tu̱we̱nta̱.

Keherika waraga cu ol wak ke̱le̱ci̱a̱k#1:1 Ke̱le̱ci̱a̱: Een ke̱le̱ci̱a̱ ol cik a̱tu̱ Ye̱su̱ Ki̱ri̱sto̱ kar ku̱lu̱te̱ nga̱to̱de̱ ngati alawe Manyi. o̱rge̱ ci een Ko̱ri̱nto̱, ki ol wak a̱tu̱ zoz ci Ta̱mu̱ta̱dde̱no̱ lo̱o̱ce̱ ci Achaia.

2Anyik Ta̱mu̱ta̱dde̱n Be̱e̱ti̱nna̱ ki Manyi Ye̱su̱ Ki̱ri̱sto̱ ka̱a̱nyu̱ng de̱ti̱ne̱t ki gano ka̱vvu̱to̱ ngatinno̱ng.

Anyike Pa̱u̱lo̱ Ta̱mu̱ta̱dde̱n zany

3Abunna kinnat Ta̱mu̱ta̱dde̱n Be̱e̱ti̱ Manyi Ye̱su̱ Ki̱ri̱sto̱. Een Baba Ta̱mu̱ta̱dde̱n ci e̱de̱tte̱, eelannet agit odohize. 4Eelannet ming i̱ta̱i̱t kaala cik gerzek, abunna ming keela ol u̱gge̱ cik anyak no̱ngi̱tto̱n cik a̱u̱ce̱ ko̱ bu̱k, eelante bali aanyyet Ta̱mu̱ta̱dde̱n agit ke̱. 5Kozol naga piryanzet ci Ki̱ri̱sto̱ wa atahalai oroot, kar bo̱do̱k kozol bunnat ci eelannet enne agita oroot. 6Kapirnanna naga abunna ming a̱ti̱ri̱zu̱ng Ta̱mu̱ta̱dde̱n, ming eelannet Ta̱mu̱ta̱dde̱n, abunna keelannung, kar ka̱a̱nyu̱ng nimenet no̱ngi̱tto̱n cik kapirnanna naga ko̱. 7Karikku̱ng naga i̱ge̱t zi̱nze̱tti̱ cigga̱k oroot, eci ka̱gga̱ naga ozolu niga piryanzet cinna, kar zin bo̱do̱k ozolu talninet cinna.

8Gotonogget ki ngonogget tu̱we̱nta̱, korongnyya abunna ming a̱gga̱yyu̱ pirnanet bali kapirnanna naga lo̱o̱ce̱ ci een Asia. Kapirnanna pirnanet ci a̱u̱ce̱ oroot, kize ojon daizi. 9Abarik kizetta ne ko̱o̱tta̱ daiza. Iróng zin ngen ka̱tu̱yya̱ e̱le̱tti̱ cigga̱k, abarik kaartiyya zi̱nze̱tti̱ Ta̱mu̱ta̱dde̱n wa ingane ol daiza. 10I̱ti̱ri̱zze̱t Ta̱mu̱ta̱dde̱n agit daiza, ooganet atin enne agita. Karike zin naga nonno zi̱nze̱tti̱ kar enne ki̱ti̱ri̱ze̱ta̱, 11ki i̱yo̱ko̱ ming eelannetu niga ngati alawakket Ta̱mu̱ta̱dde̱n. Ovvo atin ol cik meelek anyike Ta̱mu̱ta̱dde̱n zany zo̱ze̱ ci lawinet cunno̱ng ngatinna̱ng.

Utuhu Pa̱u̱lo̱ zinin

12Katalninna gi̱i̱ye̱ co̱de̱ baize cinna, i̱ye̱le̱kke̱t zi̱nze̱tti̱ cigga̱c kabakta baiz ci abunna ki̱ti̱ri̱ztta̱ ol ju̱rru̱m, ommogje baling ngen kabak ki i̱ge̱t ke̱. Aanyyet Ta̱mu̱ta̱dde̱n deten ci kabahe, iróng een genyize ci lo̱o̱tu̱. 13Eci iróng naga keherakkung zoz imma ci iróng niga ikebju icima a̱gga̱yyu̱. Kar zin anna korongi, 14ki i̱yo̱ko̱ ming a̱gga̱yyu̱ zoz cinna̱ng lo̱lo̱i̱t ko̱, ovvo atin niga a̱gga̱yyu̱ do̱o̱k kar atin niga odongit e̱le̱tti̱ zo̱ze̱ cinna̱ng, kar naga bo̱do̱k kodongta e̱le̱tti̱ zo̱ze̱ cunno̱ng i̱i̱te̱ne̱ ci Manyi Ye̱su̱.#1:14 I̱i̱te̱ne̱ ci Manyi Ye̱su̱: Oob zoz necu zoz ci okko Ye̱su̱ obodak lo̱o̱c, kar Ta̱mu̱ta̱dde̱n ketted lo̱ki̱ko̱ ci ol wak aruge ki wak a̱da̱i̱to̱. Ikeb buk ci To̱ni̱a̱u̱ 2:20; 1 Ko̱ri̱nto̱ 5:5; 2 Ko̱ri̱nto̱ 1:14; 1 Te̱se̱lo̱ni̱ka̱ 4:13-18; 2 Te̱se̱lo̱ni̱ka̱ 2:2; 2 Peturu 3:10.

15Ka̱gga̱wa̱ zin anna zoz ci atalninnu niga ngatinna̱ng, korongi zin arrak ki̱vo̱nnu̱ng, kar atin Ta̱mu̱ta̱dde̱n ka̱mu̱yu̱ng lak rama. 16Ming okko anna kokko lo̱o̱ce̱ ci een zara Macedonia kar bo̱do̱k ming kokko anna koboda nginati. Kar atin eeltawang o̱ro̱bi̱ya̱i̱ cik kowoye rok lo̱o̱c ci een Ju̱de̱ya̱. 17Ma baling kodola zinine cinanni korongi ki̱vo̱nnu̱ng ke̱, kodola de̱de̱, iróng kogonni kiwagon ol wak a̱ba̱nne̱ zi̱nze̱tti̱.

18Ki i̱yo̱ko̱ ming ka̱tu̱ Ta̱mu̱ta̱dde̱n eci ogon kaal cik een de̱de̱, iróng zin anna kanyai zi̱nze̱tti̱ ram, ming ku̱du̱wa̱ zoz iróng bo̱do̱k kuhu zoz neci. 19Eci annit ki Ti̱mo̱te̱yo̱ ki Silas cik kuwahekkung zoz ci Ye̱su̱ Ki̱ri̱sto̱ Ngerrti Ta̱mu̱ta̱dde̱no̱ wa een zoz cinne de̱de̱, iróng abaci. Ogon zoz ci een de̱de̱, iróng anyak zi̱nze̱tti̱ ram. 20U̱du̱wa̱ Ye̱su̱ zo̱zzo̱k cik Ta̱mu̱ta̱dde̱no̱ do̱o̱k een de̱de̱. Ka̱di̱ngdi̱nga̱n zin gon naga nonno ngati ka̱nne̱ke̱ ne Amin. 21Abarik, i̱yo̱ko̱, aanyyet Ta̱mu̱ta̱dde̱n enne eliya agit ki i̱ge̱t do̱o̱k kibilet kokkomit kak ngati Ki̱ri̱sto̱. Ta̱mu̱ta̱dde̱n ele ci ahalaneta. 22Aarik zin enne bo̱do̱k Vongiz ci A̱li̱le̱ ka̱vvu̱ baize cinna, kize baayenit ci a̱gga̱we̱ ol ke̱e̱ggi̱n naga ol cik Ta̱mu̱ta̱dde̱no̱, kar abunna ka̱gga̱, kurubta atin zoz ci u̱du̱wa̱ enne obod ki agit do̱o̱k.

23Korongi Ta̱mu̱ta̱dde̱n kize bbacait cinanni, abunna ming kaave reena ngatinno̱ng, iróng ka̱mi̱re̱ rok Ko̱ri̱nto̱. 24Iróng naga ke̱e̱ggi̱nna̱ ol cik kodongnyya e̱le̱tti̱ kar ki̱ye̱ltte̱u̱ng zoz ci a̱tu̱yyu̱ Ta̱mu̱ta̱dde̱n. Ka̱li̱ngli̱ng naga do̱o̱k nga̱to̱de̱ abunna ming atalninnu, eci anyakku tu̱we̱ne̱t ci okkomi.

Currently Selected:

2 Ko̱ri̱nto̱ 1: tex

Highlight

Copy

Compare