1 Ko̱ri̱nto̱ 16

Muci ci ol wak a̱tu̱we̱

1I̱yo̱ko̱ zin zo̱ze̱ ci alutane ol o̱ro̱bi̱ya̱ cik eelanne ol wak a̱tu̱we̱ gonoggi Jerusalema, abunna ming ogonnu zoz necu go̱o̱le̱ bali ka̱du̱wa̱ke̱ ol wak a̱tu̱we̱ ke̱le̱ci̱a̱nya̱i̱ cik Ga̱la̱ti̱a̱ ke̱. 2Imma i̱i̱te̱ne̱ wa een Dominika,#16:2 I̱i̱te̱ne̱ wa een Dominika: Eci ngati olli Ya̱u̱do̱ akane i̱i̱nya̱ cik biranocak ngatinne̱ng i̱i̱te̱ne̱ ci een oo kar kuṯurei i̱i̱te̱ne̱ ci een turgerem biranoca, nonno ci een I̱i̱te̱n wa Yu̱bze̱nto̱. Kovvo naga Tenneti kikeb i̱i̱nya̱ cigga̱c biranocak do̱ ngati olli Ya̱u̱do̱. Kazi naga ne I̱i̱te̱n wa Yu̱bze̱nto̱ ci een i̱i̱te̱n ci een torkonom kar i̱i̱te̱n ci annu I̱i̱te̱n wa Yu̱bze̱nto̱ ko̱ kawu naga kize i̱i̱te̱n turgerem. Kawu naga bo̱do̱k i̱i̱te̱n cinne̱ng oowu ko̱ kize Dominika icima I̱i̱te̱n ci Lawinto ming ka̱a̱da̱ naga i̱i̱te̱n bali ingane Ye̱su̱ daiza. abunna e̱e̱ti̱ ming aarik o̱ro̱bi̱ya̱ u̱gge̱ cik agano ki nonno, kar karik abanyit kize ja̱mi̱te̱n, adaz zee ming kokko anna ka̱kku̱ni̱, karuba o̱ro̱bi̱ya̱ ne̱ko̱ ulutai, i̱llo̱i̱ o̱ro̱bi̱ya̱ u̱gge̱ bo̱do̱k cik oowanu niga. 3Ming kuk anna kuzucaung, kokko keherik ol wak atahaltau niga ko̱ waraganya cik we̱e̱ta̱k kar ko̱o̱tte̱ muci cuggo̱k rok ol wak a̱tu̱we̱ Jerusalema. 4Ming acinnu agano ming kokko anna bu̱k, korkorya atin anna ki nogo.

Kaal cik orong Pa̱u̱lo̱ ku̱tu̱gu̱zze̱

5Ming kokko go̱o̱le̱ ci lo̱o̱c ci een zara Macedonia, kokko atin ki̱vo̱na̱nnu̱ng, 6kar ka̱vvu̱t ki i̱ge̱t arrak do̱yo̱i̱t, icima kedeca tagiz#16:6 Tagiz: Een icu i̱i̱te̱n ci e̱rki̱to̱ okkomi kak ming olli Israilo orong keronit eci ngatinne̱ng aṯile ta̱mu̱, alali kar bo̱do̱k a̱ppwa̱ ngooti oroot. Iróng i̱bo̱ ngatu owo. Imma Tenneta e̱rki̱te̱ cu, een ci odoi looci. do̱o̱k, kar eeltawang go̱o̱le̱ ci kokkoye. 7Iróng korongi kuk kicinung ngati ulla kadiranung goola, kar kedecek. Korongi karik zinin cinanni ka̱vvu̱ta̱ ki i̱ge̱t do̱yo̱i̱t, ming aanya Manyi gool, ogon atin niko. 8Ma̱i̱je̱ arrak korongi ka̱vvu̱ ngatu Ephesusa zee ki̱ki̱ya̱ I̱i̱te̱ne̱ wa Pentakosi,#16:8 I̱i̱te̱n wa Pentakosi: A̱kku̱ I̱i̱te̱ni̱ wa Pentakosi ko̱ i̱i̱nya̱we̱ cik e̱e̱ggi̱n moten tu̱r vu̱rrte̱ ci I̱i̱te̱n wa Va̱rda̱ngi̱nto̱, baling uk Ta̱mu̱ta̱dde̱n a̱va̱rda̱ng ce̱e̱zi̱ cik olli Israilo balik e̱e̱ggi̱nne̱ nege du̱cca̱k Masire ke̱. Imma I̱i̱te̱ne̱ wa Pentakosi, anyaha olli Ya̱u̱do̱ da̱i̱ne̱t cigge̱k wak e̱e̱ggi̱n o̱o̱tti̱ etteda manine kar kanycik Ta̱mu̱ta̱dde̱n Jerusalema kar ka̱a̱dda̱ i̱i̱te̱n ci anyik Ta̱mu̱ta̱dde̱n lo̱ti̱nno̱k Muses biye ci een Sinai. A̱a̱dda̱ Kiristian I̱i̱te̱n wa Pentakosi bali a̱kku̱na̱k Vongizi ci A̱li̱le̱ ol wak a̱tu̱ Ye̱su̱ i̱i̱te̱ne̱ neci. IkebNambars 28:26-31; Buk wa To̱ni̱a̱u̱ 2:1-4. 9eci kanyai gool ci a̱ppwe̱ ngatu kar arrak ki̱li̱ngli̱ng li̱ngli̱ngo̱n ci Ta̱mu̱ta̱dde̱no̱, ming wo̱ye̱ nu̱nu̱n amarina ol cik meelek niko ko̱.

10Ming uzucaung i̱ge̱t Ti̱mo̱te̱yo̱, a̱gga̱mtta̱ nonno talninta. A̱li̱ngli̱ng enne li̱ngli̱ngo̱n ci Manyi Ye̱su̱ ki i̱yo̱ko̱ anna ko̱. 11Ma anyikku e̱e̱t imma ngatinno̱ng kutubur nonno. Abarik i̱tto̱nta̱ nonno labak kar enne ki̱ki̱ya̱ kobodan. Kere zin anna nonno ki gonoggi wak orkora bu̱k ko̱.

12I̱yo̱ko̱ zin zo̱ze̱ ci obod ki Apollos, gotonet tu̱we̱nta̱, kilalek anna nonno oroot abunna ming i̱vo̱nnu̱ng enne ki gonogget tu̱we̱nta̱. Aarnek enne we̱t i̱yo̱ko̱ niko, abarik a̱kku̱na̱kku̱ng atin enne ming orong zinin cinne.

Zoz ci Pa̱u̱lo̱ vu̱rrto̱

13A̱vvu̱t ju̱rru̱m be̱i̱nta̱. Ibilet okkomit kak tu̱we̱nte̱ cunno̱ng. Abunna ming e̱e̱ggi̱nnu̱ ol wak animnyu zoz, kar okkomit kak. 14U̱tu̱gu̱z kaal do̱o̱k rezinta.

15Abunna ming a̱gga̱yyu̱ Stephanas ki dooli ciginnek arrak cik elemi zoz ci Ta̱mu̱ta̱dde̱no̱ o̱rge̱ ci een Achaia, kar zin kaarttek zi̱nze̱tti̱ li̱ngli̱ngo̱n ci eelanne nege olli Ta̱mu̱ta̱dde̱no̱. Kilalekkung gotonogga ki ngonogga tu̱we̱nta̱, 16abunna ming o̱ngo̱o̱li̱nnu̱ lo̱ddi̱ki̱re̱ cik ogon ki nege, kar uggak ku̱tu̱gu̱zzo̱ ki i̱yo̱ko̱ ming ogonnu niga ko̱. 17Katalne anna oroot, eci Stephanasi ki Vortunatus ki Achaicus a̱rra̱yya̱ annit ngatu. Eci ogon ki ci een i̱ge̱t e̱le̱tti̱ cik a̱vvu̱na̱kka̱ng. 18Aanycik nege zinin cinanni katalo ki cuggo̱k bu̱k. Abunna ming irezzu ol cik ogon ki nege.

Zawinet ci Pa̱u̱lo̱ vu̱rrto̱

19Izayung zin ol wak a̱tu̱we̱ do̱o̱k lo̱o̱ce̱ ci een Asia. I̱tto̱na̱ zin bo̱do̱k Akuila ki ngaa cinne Priscilla ki ol wak a̱tu̱we̱ alute ce̱e̱ze̱ cinne̱ng ming ovvo nege ala Ta̱mu̱ta̱dde̱n ko̱ zawinet, izayung zin zare cik Manyi Ye̱su̱. 20I̱tto̱na̱kku̱ng ol wak a̱tu̱ Manyi ko̱ do̱o̱k zawinet cinne̱ng zare cik Ta̱mu̱ta̱dde̱no̱.

21Keheri anna Pa̱u̱lo̱ ele zawinet cu a̱tte̱ cinanni.

22Ming iróng e̱e̱ti̱ imma irez Manyi Ye̱su̱, anyik to̱ri̱ne̱t ki̱tta̱k nonno. Anyik bai Manyi ki̱ki̱ya̱ ataman.

23Anyik bai deten ci Manyitinna Ye̱su̱ ka̱vvu̱ ngatinno̱ng.

24Kirezi anna ol do̱o̱k zare cik Ye̱su̱ Ki̱ri̱sto̱. Nonno nenen amen.

Currently Selected:

1 Ko̱ri̱nto̱ 16: tex

Highlight

Copy

Compare