1 Ko̱ri̱nto̱ 9

Kaal cik agano ki to̱ni̱a̱k cik Ki̱ri̱sto̱

1Abunna zin niga ming a̱gga̱yyu̱ kowo anna labak i̱llo̱i̱ gi̱i̱ ci adiryan kaale cik lo̱o̱tu̱. Ke̱e̱ni̱ anna to̱ni̱a̱t ci Manyi Ye̱su̱ Ki̱ri̱sto̱. Kicina anna Ye̱su̱ Manyitinna. E̱e̱ggi̱nnu̱ niga ol balik kuwahekkung kaviyak cik Manyi ke̱ bak elemannu zoz cinne. 2Ma wo̱ye̱ nu̱nu̱n ming iróng ol uggak aanya annit kize to̱ni̱a̱t ci Manyi Ye̱su̱, ke̱e̱ni̱ zin anna to̱na̱i̱t de̱de̱ ngatinno̱ng. Ma̱i̱je̱ niga, ka̱gga̱ anna aanyang annit kize to̱na̱i̱t cinne, eci niga a̱tu̱yyu̱ Ye̱su̱ go̱o̱le̱ ci kedemezung anna ngati keene to̱na̱i̱t cinne.

3Een necu zoz ci eelanna ngati ol wak adangnya. 4Abunna ming aanyet ol da̱i̱ne̱t. 5Een zoz ci een de̱de̱ ngatinna ming keeron ki ngaai cigga̱c a̱tu̱we̱ ko̱, ki i̱yo̱ko̱ to̱ni̱a̱ha̱ uggak ki gotonoggi Manyi ki Cephas. 6Imma anna ki Barnabas agano wo̱ye̱ ka̱li̱ngli̱ngnya̱ li̱ngli̱ngo̱n ci Manyi kar bo̱do̱k ki̱li̱ngli̱ngta̱ zoz ci elem cinna̱ng? 7I̱llo̱i̱ aciirenit ci a̱li̱ngli̱ng kar ku̱ru̱k o̱ro̱bi̱ya̱ ciginnek manyi. I̱llo̱i̱ e̱e̱t ci a̱li̱ngli̱ng manatoto kar ngatu iróng adak kaal cik a̱bbi̱rna̱ ma̱ne̱ neci. I̱llo̱i̱ e̱e̱t ci a̱li̱ngli̱ng angid tiin, kar ngatu iróng aam i̱ra̱ cik tiin ne̱ke̱.

8Iróng anna ka̱du̱wa̱ zoz necu i̱no̱ni̱nte̱ ci e̱e̱t ci diiri do̱, abarik gon lo̱ti̱nno̱wa̱ cik Musesi bu̱k a̱du̱wa̱ gon zoz necu ele. 9Eci e̱he̱rye̱ lo̱ti̱nno̱we̱ cik Musesi,#9:9 Muses: Baling okko Yosevo a̱da̱i̱, izeto dooli cik Israilo du̱cca̱k Masira, edeca e̱rki̱nya̱ cik e̱e̱ggi̱n obet we̱c (400). Atahala Ta̱mu̱ta̱dde̱n Muses kize e̱e̱t ci a̱lu̱ge̱ olli Israilo ngati e̱e̱ggi̱n du̱cca̱k Masire. Aanyik Ta̱mu̱ta̱dde̱n olli Israilo lo̱ti̱nno̱k ngati Musesi, nonno ci azi ol ne, Lo̱ti̱nno̱k cik Musesi. Abak i̱yo̱ko̱ da̱ Musesi e̱rki̱nya̱ i̱bbo̱ng co̱de̱ ki obet we̱c (1,400) bali ngen Ye̱su̱ ki̱ti̱rra̱i̱ ke̱. Ikeb Lu̱ge̱z 2-24. azi ne, “Ma ecebi utug ci tango ngati u̱u̱rte̱ labi zone.#9:9 Tang ngati u̱u̱rte̱ labi zone: A̱li̱ngli̱nge̱ Ya̱u̱di̱ tiin cigge̱k kiyotek kaal cik a̱di̱ngdi̱nge̱ kar kengerit lotulany labine.” Iróng Ta̱mu̱ta̱dde̱n ozoz zoz necu tiine cik u̱u̱rta̱ labi do̱.#Deuteronomy 25:4 10Abarik zoz necu bu̱k ozoz zoz cinna ele. E̱he̱rye̱ zoz necu zo̱ze̱ cinna, a̱li̱ngli̱ng e̱e̱ti̱ eev ma̱na̱ kar atin kuruba gi̱i̱ imma, okko e̱e̱ti̱ ci etted ma̱na̱ ko̱ orong kar kuruba gi̱i̱ imma. Abunna zin ming arike nege zi̱nze̱tti̱ cigge̱k, kar nege ku̱mu̱dda̱ da̱i̱ne̱t cigge̱k li̱ngli̱ngo̱ne̱ necu.

11Ming ki̱ye̱le̱u̱ng naga i̱ge̱t arizet ci Vongiz ci Ta̱mu̱ta̱dde̱no̱ orgene cunno̱ng, abunna zin niga ming aanyyet agit bu̱k kaal cik korongnya naga. 12Ming een zoz cinne̱ng de̱de̱ ci eelannu niga ol balik uwahekkung zoz ci Ta̱mu̱ta̱dde̱no̱, agano zin de̱de̱ ming eelannet niga agit bu̱k oroot. Abarik iróng zin naga korongnya ki̱ti̱za̱u̱ng. Kanimnya baiz cinna̱ng ko̱, gerza ming kanyahak no̱ngi̱tto̱n kaviyak cik Ki̱ri̱sto̱.

13A̱gga̱yyu̱ niga ol ne̱k a̱li̱ngli̱ng Ce̱e̱ze̱ wa Ta̱mu̱ta̱dde̱no̱#9:13 Ce̱e̱z wa Ta̱mu̱ta̱dde̱no̱: Anyak Ce̱e̱z wa Ta̱mu̱ta̱dde̱no̱ co̱de̱ ṯok Jerusalema, otodongek ol cik wawaco Ta̱mu̱ta̱dde̱n muci nginati ki bali ming a̱du̱wa̱ lo̱ti̱nno̱wa̱ cik Musesi ke̱. Aave Ta̱mu̱ta̱dde̱n Ce̱e̱ze̱ wa Ta̱mu̱ta̱dde̱no̱ Ngati A̱li̱le̱ Oroot di̱ngdi̱ngo̱nta̱. Alaan ci a̱ddi̱ki̱re̱ wawaco do̱ ci okko Ngati A̱li̱le̱ Oroot Ce̱e̱ze̱ wa Ta̱mu̱ta̱dde̱no̱, okko anyaha bi̱ye̱ cik unye mu̱nye̱n cik ollu ngu̱me̱ ci Ta̱mu̱ta̱dde̱no̱, e̱rki̱ta̱, lak co̱de̱. IkebLeviticus 16; I̱bu̱ru̱ 9:1-7. ko̱, ming amuda da̱i̱ne̱t cigge̱k kaale cik aanyik ol Ta̱mu̱ta̱dde̱n. Ovvo ol wak a̱li̱ngli̱ng i̱te̱le̱#9:13 I̱te̱la̱: Anyak i̱te̱le̱ reene ci Ce̱e̱z wa Ta̱mu̱ta̱dde̱no̱, nginti apahek olli wawaco Ta̱mu̱ta̱dde̱n wawac kar abunna enne alalnek nogo mu̱nye̱n. Anyak bo̱do̱k i̱te̱le̱ imma ci atuze olli wawaco lotagong ecito Ngati A̱li̱le̱ Ce̱e̱ze̱ wa Ta̱mu̱ta̱dde̱no̱ odohize nge̱rre̱t ki yo̱mo̱na̱ i̱i̱ ci lawinto. ci Ce̱e̱z wa Ta̱mu̱ta̱dde̱no̱, amuda nege da̱i̱ne̱t cigge̱k kaale cik atuve ol i̱te̱le̱ neci. 14Azi zin bo̱do̱k Manyi ne, anyik ol wak uwahek ol kaviyak cik abunna kurubta da̱i̱ne̱t cigge̱k li̱ngli̱ngo̱ne̱ necu.

15Abarik zin, ngen anna ki̱jji̱n e̱e̱t imma gi̱i̱ ci korongi ki ming a̱du̱wa̱ zoz ci Ta̱mu̱ta̱dde̱no̱ ko̱. Iróng anna keheri waraga cu kar aanycang kaal cik korongi. Ma nu̱nu̱n ming ka̱da̱i̱, iróng wo̱ye̱ ka̱jji̱nni̱ gi̱i̱ imma ci korongi udut kar e̱e̱ti̱ imma ki̱ki̱ya̱ kodong ele zo̱ze̱ necu. 16Ming kuwahek ol kaviyak cik abunna, iróng anna kodongi ele, eci een necu li̱ngli̱ngo̱n cinanni. O̱lle̱ nonga cigannik ming iróng anna kuwahek ol kaviyak cik abunna. 17Ming kuwahek ol zoz ci Ta̱mu̱ta̱dde̱no̱ gi̱i̱ ci orong zinin cinanni do̱, iróng zin agano ming kamuda o̱ro̱bi̱ya̱ ngati ka̱li̱ngli̱ngi̱ zoz ci kuwahek ol kaviyak cik abunna ko̱. Iróng zin een niko, eci Ta̱mu̱ta̱dde̱n ci aanya annit ku̱tu̱gu̱ li̱ngli̱ngo̱n necu. 18Karuba zin atin anna nya? Karuba zin atin gool ci kuwaheke kaviyak cik abunna ki̱zzi̱ rok gi̱i̱ ci a̱ru̱we̱ka̱ ol annita. Iróng zin anna Ka̱jji̱nni̱ nogo kar kanyca nege annit kaal cik agano ming aanya nege.

19Ma wo̱ye̱ nu̱nu̱n iróng anna ke̱e̱ni̱ du̱ca̱i̱t ci e̱e̱t imma lo̱o̱ta̱ ngatu ko̱, abarik ku̱tu̱gu̱ ele cinanni kize du̱ca̱i̱t ci ol do̱o̱k kar kanyaha ol cik meelek ki̱vi̱ta̱ ku̱tu̱we̱c Ye̱su̱ Ki̱ri̱sto̱. 20Imma ngati kaave ki ol wak een Ya̱u̱d kogonni anna zin ki nege, kar kanyahak nogo ku̱tu̱we̱c zoz ci Ye̱su̱. Imma ming kaave ki ol cik lo̱ti̱nno̱u̱, kogonni anna ki nege ming nu̱nu̱n iróng anna kelemi zoz ci lo̱ti̱nno̱u̱, kar kanyahak ol cik lo̱ti̱nno̱u̱ ka̱gga̱c zoz ci Ki̱ri̱sto̱. 21Imma bo̱do̱k ngati ka̱li̱ngli̱nge̱ ki ol wak iróng anyak lo̱ti̱nno̱k, kaave anna ki ci i̱llo̱i̱ lo̱ti̱nno̱k (ming nu̱nu̱n iróng anna kaave reena lo̱ti̱nno̱we̱ cik Ta̱mu̱ta̱dde̱no̱ abarik kazunne lo̱ti̱nno̱k cik Ki̱ri̱sto̱), kar kalaba ol wak iróng azunne lo̱ti̱nno̱k. 22Imma ming ka̱li̱ngli̱ngnya̱ ki e̱e̱t ci iróng a̱tu̱we̱ ju̱rru̱m, kobodane anna ele cinanni kar kanyahak nonno tu̱we̱ne̱t ci okkomi. Ku̱tu̱gu̱ anna kaal do̱o̱k kar ki̱ti̱ri̱z ol u̱gge̱ ki̱vi̱ta̱k Ki̱ri̱sto̱ kanyait tu̱we̱ne̱t ci okkomi. 23Kogonni anna kaal ne̱ko̱ do̱o̱k kar kaviyaha cik abunna katakuza ol do̱o̱k. Kar anna bu̱k kozol ki nogo ma̱yu̱we̱ne̱t ci Ta̱mu̱ta̱dde̱no̱.

24A̱gga̱yyu̱ niga ming ovvo ol a̱vi̱ri̱, a̱vi̱r ol do̱o̱k, okko zin e̱e̱ti̱ co̱de̱ ijar ol do̱o̱k. Imma zin bu̱k go̱o̱le̱ necu abunna ming a̱vi̱ri̱ kar ize oo kar ruba muci.

25Ming orong e̱e̱ti̱ kize ti̱i̱r, orong ming edemez enne ele arrak ngati a̱vi̱re̱ kar kize ti̱i̱r. Ogon enne niko kar ming anyak gi̱i̱ ci irawone ol kar enne kize oo. Abarik gon ol wak a̱vi̱r kar kurubta kaal, aruba gi̱i̱ ci iróng aave udut, ovvo ol wak a̱tu̱we̱ aruba gi̱i̱ ci atin aave udut. 26I̱yo̱ko̱ zin, iróng anna ka̱vi̱ri̱ ki i̱yo̱ko̱ e̱e̱ti̱ ci diiri ci a̱vi̱r gaganiko; iróng anna Pa̱u̱lo̱ kogonni ki e̱e̱ti̱ ci ogon kaal cik een kaalakreng. 27Korongi anna kedemez ele cinanni ko̱ kokkom kak kar kuwahek ol kaviyak cik Ta̱mu̱ta̱dde̱no̱ ju̱rru̱m. Kar atin anna ki nogo bu̱k kurubta ma̱yu̱we̱ne̱t ngati Ta̱mu̱ta̱dde̱no̱.

Currently Selected:

1 Ko̱ri̱nto̱ 9: tex

Highlight

Copy

Compare