1 Ko̱ri̱nto̱ 10

Aarta e̱le̱tti̱ ta̱mu̱ta̱dde̱ne̱te̱ wak adimanai azzine

1Gotonogga ki ngonogga tu̱we̱nta̱, korongnyung i̱ge̱t abunna ming a̱gga̱yyu̱ gi̱i̱ bali ogonik Ta̱mu̱ta̱dde̱n ji̱ji̱ti̱gga̱c balik annu Muses ke̱. A̱bu̱ng bali nogo di̱i̱z zee kettedit nyatapar labak. 2E̱e̱ggi̱n nege do̱o̱k nuyak cik Musesi, a̱gga̱mto̱zi̱k zin nogo ba̱ti̱ti̱mo̱ di̱i̱za̱ ki nyatapara.#10:2 Ba̱ti̱ti̱mo̱ di̱i̱za̱ ki nyatapara: Ikeb zoz ci di̱i̱zo̱ ming etted liila buwe ci Lu̱ge̱zo̱ 14:10-29. 3Adait nege do̱o̱k da̱i̱ne̱t cik Vongizak a̱vvu̱ ta̱mu̱-kenga, 4kar kuudet maam cik aanyik Ta̱mu̱ta̱dde̱n nogo. Iyowa maama ne̱ke̱ biya,#10:4 Iyowa maama ne̱ke̱ biya: Eela Ta̱mu̱ta̱dde̱n Muses kiyowai maam biya lak rama. IkebLu̱ge̱z 17:1-7; Nambars 20:2-17. een bee neci Ki̱ri̱sto̱. 5Abarik zin kaale ne̱ko̱ do̱o̱k, iróng zin Ta̱mu̱ta̱dde̱n atalne ngati ol cik meelek ngatinne̱ng; imma zin zo̱ze̱ necu, a̱da̱i̱to̱ zin wazin neci ol cik meelek kazantozik e̱le̱tti̱ cigge̱k balal.

6Ma kaala ne̱ko̱ ogone ko̱ kar kize de̱mzi̱ne̱t ci aanyet agit kegenyit, kar iróng naga kogon kaal cik gerzek ki bali ji̱ji̱ti̱gga̱c ke̱. 7Ma a̱di̱ngdi̱nga̱nnu̱ to̱do̱yyo̱k wak e̱e̱ggi̱n ta̱mu̱ta̱dde̱ne̱t wak adimanai azzine ki bali ol uggak ngatinne̱ng ke̱. Azi Waraga ci Ta̱mu̱ta̱dde̱no̱ zo̱ze̱ ci obod ki nogo ne, “A̱vvu̱to̱ ol lo̱o̱ta̱ kar kadakto bak aude, imma vu̱rrta̱ u̱tu̱gu̱zzo̱ a̱li̱ya̱kze̱t.”#Lu̱ge̱z 32:6 8Iróng zin abunna ming kabak naga baiz ci a̱li̱ya̱kze̱ti̱nu̱ ki bali ming ogon ol uggak ngatinne̱ng, kar zin Ta̱mu̱ta̱dde̱n ku̱ru̱k ol cik meelek giir e̱e̱ggi̱n i̱bbo̱nge̱t moten ram ki i̱i̱yo̱ (23,000) ka̱da̱i̱to̱ i̱i̱te̱n co̱de̱ ṯok. 9Gerza ming katiman Ki̱ri̱sto̱ ki bali ol uggak ming ogon ngatinne̱ng ke̱, kar uwanya#10:9 Uwat: U̱du̱wa̱k Ta̱mu̱ta̱dde̱n Muses balala abunna ming arike keet uwat ci adimanai zu̱rte̱nta̱ kar ming okko e̱e̱ti̱ ci adak uwat acinni, alali ngo̱do̱co̱ neci ataman. IkebNambars 21:4-9. ketengedit nogo ka̱da̱i̱to̱. 10Ma adangonu ki bali ol uggak ngatinne̱ng, kar anjilo ci daizo#10:10 Anjilo ci daizo: Ikeb zoz ci u̱tu̱gu̱ anjilo ci daizo warage ciNambars 16:41-49. ku̱ru̱k nogo ka̱da̱i̱to̱.

11Imma kaala ne̱k ogononik nogo ko̱ do̱o̱k ogone kar kedemez ol u̱gge̱ abunna iróng ogon kaal cik gerzek ki bali ne̱ke̱. E̱he̱rye̱ kaala ne̱ko̱ kar ki̱ye̱lto̱zi̱k agit ki i̱yo̱ko̱, eci kabak naga wazine ci okko looci aṯurneke. 12Ming i̱no̱n e̱e̱ti̱ azi ne okkomi enne tu̱we̱nta̱ kak, zuute ele ju̱rru̱m, gerza ming okko a̱yu̱we̱. 13Imma timaninet ci a̱kku̱na̱kku̱ng ko̱, a̱kku̱nna̱k gon ol do̱o̱k. Abarik zin gon Ta̱mu̱ta̱dde̱n azunne zoz ci u̱du̱wa̱ enne ngatinna, iróng anyike gi̱i̱ imma kitimannung kommog doiz cunno̱ng, abarik a̱a̱nyu̱ng i̱ge̱t doiz ci ommogju timaninet neci.

Da̱i̱ne̱t cik tuventak ki da̱i̱ne̱t cik ka̱a̱da̱ne̱ Manyi

14Gotonogga ki ngonogga tu̱we̱nta̱, e̱de̱yya̱ e̱le̱tti̱ to̱do̱yo̱we̱ cik e̱e̱ggi̱n ta̱mu̱ta̱dde̱ne̱t cik adimanai azzine. 15Kozozik anna ol cik anyak genyiz, ovvo a̱gga̱ zoz ci kozozi anna ko̱. 16Gon ming kaanyik Ta̱mu̱ta̱dde̱n zany kaale wak kaud i̱i̱te̱ne̱ ci ka̱a̱da̱ne̱ daiz bali Ki̱ri̱sto̱, kozol naga do̱o̱k ma̱yu̱we̱ne̱t wa a̱kku̱ bi̱ye̱te̱ ciginnek. Ming kadak umune wa ka̱a̱da̱ne̱ ele cinne i̱i̱te̱ne̱ neci, kozol naga do̱o̱k ma̱yu̱we̱ne̱t wa a̱kku̱ eliye cinne. 17Ma wo̱ye̱ nu̱nu̱n ke̱e̱ggi̱n meele, kozol naga do̱o̱k umune co̱de̱ ṯok niko. Imma zin go̱o̱le̱ necu ku̱tu̱gu̱zzo̱ naga do̱o̱k ki i̱yo̱ko̱ ele co̱de̱ ko̱.

18I̱no̱ni̱t da̱ niga keerani cik olli Israilo. Anyak ol u̱gge̱ ngatinne̱ng cik adak kaal cik apahek ol Ta̱mu̱ta̱dde̱n i̱te̱la̱. 19A̱gga̱yyu̱ niga kazi anna ne iróng to̱do̱yo̱wa̱ ne̱k adimanai azzine ko̱ e̱e̱ggi̱n ta̱mu̱ta̱dde̱ne̱t de̱de̱. 20Abarik zin gon ol wak aanyik kaal ta̱mu̱ta̱dde̱n cik adimanai azzine ko̱, iróng een Ta̱mu̱ta̱dde̱n de̱de̱. Iróng zin anna korongnyung i̱ge̱t kar i̱li̱ngli̱nge̱t ki kuulo cik lo̱rye̱nta̱k.#10:20 Kuulo cik lo̱rye̱nta̱k: E̱e̱ggi̱n bali nege anjilonya ki Ta̱mu̱ta̱dde̱n ta̱mu̱-kenga ngati alaan cinne̱ng wa een Sitan ko̱ kar bali nege kutuburret Ta̱mu̱ta̱dde̱n kar zin Ta̱mu̱ta̱dde̱n kottok nogo ta̱mu̱-kenga. Kar zin nege kizeto kuulo cik lo̱rye̱nta̱k cik atiza ol lo̱o̱ta̱ ngatu ko̱. IkebO̱no̱zzo̱k 12:7-9. 21Iróng wo̱ye̱ abunna ming audenu niga uduce ci Manyi Ye̱su̱ ki bo̱do̱k uduce ci kuulo cik lo̱rye̱nta̱k. Iróng abunna ming adakku umune ci a̱a̱di̱k ol kize ele ci Manyi, kar bo̱do̱k adakku da̱i̱ne̱t cik atuvek ol kuulo. 22Iróng abunna ming kogon naga kaal ne̱ko̱, gerza ming kaanyik Manyi cinna kutubur nong, eci anyak enne doiz kommoget agit do̱o̱k.

To̱ngo̱o̱lle̱ Ta̱mu̱ta̱dde̱n odohize

23Azi ol uggak ngatinno̱ng ne, “Kogon wo̱ye̱ naga kaal cik korong naga ku̱tu̱gu̱z labak.” De̱de̱, ogonnu wo̱ye̱ ki i̱yo̱ko̱, abarik zin iróng kaala do̱o̱k cik kogon naga ko̱ eelanneta, ma bo̱do̱k anyak kaal cik iróng aanyet koo oowa tu̱we̱nta̱. 24Gerza ming adimanek e̱e̱ti̱ ele cinne kaal cik abunna do̱, abunna abarik ming adimanek ol u̱gge̱ bu̱k.

25Ming adakku niga i̱di̱ng ci atalannu cuwa, adait labak ki̱zzi̱ ji̱ne̱ne̱t zo̱ze̱ ci obod ki ngo̱li̱ne̱t ci da̱i̱ne̱t cik atuvek wo̱ye̱ ol ta̱mu̱ta̱dde̱ne̱t wak adimanai azzine. 26E̱he̱rye̱ warage wa Ta̱mu̱ta̱dde̱no̱ zoz ci azi ne, “Een looci ki kaal wak lo̱o̱tu̱ do̱o̱k, kaal cik Manyi Ta̱mu̱ta̱dde̱no̱.”#Caliwon 24:1

27Ming awekung e̱e̱ti̱ ci iróng a̱tu̱we̱ da̱i̱ne̱t o̱rge̱ cinne kar orongnyu niga oto, adait da̱i̱ne̱t cik a̱a̱nyu̱ng enne i̱ge̱t ko̱ do̱o̱k labak, ma a̱jji̱nnu̱ nonno zoz imma. 28Abarik ming a̱nne̱kku̱ng e̱e̱ti̱ imma ne, “Etted ol i̱di̱ng necu kize ci ta̱mu̱ta̱dde̱ne̱t wak adimanai azzine,” ma adakku, kar e̱e̱ti̱ ci a̱du̱wa̱kku̱ng ko̱ iróng ogon mu̱nye̱n, kar bu̱k enne ki i̱ge̱t iróng anyakku i̱no̱ni̱ ci gerze zi̱nze̱tti̱nne̱. 29Abunna ming ungneku niga i̱di̱ng neci lo̱o̱c. Iróng een zo̱ze̱ ci o̱ngo̱o̱li̱nnu̱ niga zi̱nze̱tti̱nne̱ ciggo̱k, abarik utungtek i̱di̱ng neci lo̱o̱c zo̱ze̱ ci obod ki nonno.

I̱yo̱ko̱ zin, nya ming ettedeka e̱e̱ti̱ lo̱ki̱ko̱ zo̱ze̱ ci e̱e̱t ci anyak ngo̱li̱ne̱t zinine cinne ko̱? 30Ming kadai anna da̱i̱ne̱t ngati kanyike Ta̱mu̱ta̱dde̱n zany, nya ming anganya ol uggak annita ko̱ zo̱ze̱ necu?

31Ka̱nne̱kku̱ng zin anna i̱ge̱t ne, ming adakce icima aude icima ogoni gi̱i̱ imma ci aave do̱, tu̱gu̱ kize ci a̱di̱ngdi̱nga̱ni̱ Ta̱mu̱ta̱dde̱n. 32Abait baiz ci abunna, ci iróng acazu e̱e̱t imma, icima olli Ya̱u̱do̱, icima olli Gi̱ri̱yo̱, icima ol wak a̱tu̱ Ta̱mu̱ta̱dde̱n. 33Korongi gon anna ol do̱o̱k katalto kaale wak kogonni anna ko̱ go̱o̱lo̱we̱ do̱o̱k. Iróng anna korongi ku̱tu̱gu̱ kaal cik ele cinanni do̱, abarik korongi ku̱tu̱gu̱we̱k ol do̱o̱k kaal cik abunna, kar atin nege kurubta ti̱ri̱ze̱ne̱t ci Ta̱mu̱ta̱dde̱no̱.

Currently Selected:

1 Ko̱ri̱nto̱ 10: tex

Highlight

Copy

Compare