1 Ko̱ri̱nto̱ 14

Arizet ci aanyik Vongizi ci Ta̱mu̱ta̱dde̱no̱ ol

1Abunna zin ming annuyu zoz ci rezinto oroot, kar orongit arizet ci Vongizo, ommogje arizet ci a̱du̱wa̱k ol zoz ci Ta̱mu̱ta̱dde̱no̱. 2Imma e̱e̱ti̱ ci ozoz utuge ci iróng enne a̱gga̱, iróng enne ozozek ol, abarik ozozek Ta̱mu̱ta̱dde̱n do̱. I̱llo̱i̱ e̱e̱t ci a̱gga̱ zoz ci ozoz enne ke̱; ozoz enne kaal cik a̱gga̱ Vongizi do̱ niko. 3Ma̱i̱je̱ e̱e̱ti̱ ci ozoz arizet ci zoz ci Ta̱mu̱ta̱dde̱no̱, ozozik enne ol wak diirik, kar kaanyik nogo doiz, i̱lo̱t nogo kar kidihiz nogo kokkomit tu̱we̱nta̱ kak. 4Imma e̱e̱ti̱ ci ozoz utuge ci iróng enne a̱gga̱, eela enne ele cinne do̱; imma e̱e̱ti̱ ci uwahek ol arizet ci zoz ci Ta̱mu̱ta̱dde̱no̱, eela enne ol do̱o̱k ke̱le̱ci̱a̱. 5Korongi wo̱ye̱ anna ol do̱o̱k ngatinno̱ng kozozit utuge ci iróng nege a̱gga̱, abarik korongnyung ming uwahekku ol arizet ci zoz ci Ta̱mu̱ta̱dde̱no̱ oroot. Eci e̱e̱ti̱ ci uwahek ol arizet ci zoz ci Ta̱mu̱ta̱dde̱no̱, abunna oroot kommog e̱e̱t ci ozoz utuge ci iróng enne a̱gga̱, ma̱i̱je̱ ming a̱du̱wa̱k enne ol u̱nge̱tti̱ cik zozak, ovvo zin atin ollik ke̱le̱ci̱a̱k eelai.

6I̱yo̱ko̱ zin, gotonogga ki ngonogga tu̱we̱nta̱, ming ka̱kku̱na̱ku̱ng kar kozoz utuge ci iróng niga a̱gga̱yyu̱, abunna ni̱i̱ ngatinno̱ng? Maya ming ka̱du̱wa̱kku̱ng arizet ci zoz ci a̱du̱wa̱ Ta̱mu̱ta̱dde̱n, icima gga̱wa̱ne̱t ci zoz ci Ta̱mu̱ta̱dde̱no̱ icima de̱mzi̱ne̱t. 7I̱no̱ni̱t da̱ kaal wak iróng anyak vongiz, ngen anyaha mulukwa cik aavtte do̱ do̱, ki i̱yo̱ko̱ te̱te̱li̱ icima lokombe, iróng wo̱ye̱ e̱e̱ti̱ imma a̱gga̱ lo̱ng ming ngen kutubuwe icima ku̱ru̱we̱ ju̱rru̱m. 8Imma ming iróng tu̱le̱le̱ oroi ju̱rru̱m, ngene ci ingazi kuk keela ol tivili? 9Ogon zin bo̱do̱k zoz necu ngatinno̱ng niko. Ming ozozu u̱tu̱ge̱tti̱ne̱ cik iróng ol a̱gga̱, i̱llo̱i̱ e̱e̱t imma ci a̱gga̱ zoz ci ozozu niga ko̱, abarik ozozu niga zoz ci a̱ti̱k ngooti. 10Anyak u̱tu̱ge̱tti̱ cik meelek giir cik ozoz ol lo̱o̱ta̱ ngatu, i̱llo̱i̱ zin zoz imma ci iróng anyak keng. 11Ming iróng anna ka̱gga̱ zoz ci a̱du̱wa̱ e̱e̱ti̱ imma utuge ci iróng ka̱gga̱, ke̱e̱ni̱ anna i̱do̱nge̱ni̱t ngati e̱e̱t neci, een enne bu̱k i̱do̱nge̱ni̱t ngatinanni. 12Ogon zin bo̱do̱k zoz necu ngatinno̱ng niko. Eci niga orongnyu oroot urubta arizet ci Vongizo, abunna ming ogonnu ju̱rru̱m arizet ci eela ol do̱o̱k ke̱le̱ci̱a̱ kar tu̱we̱ne̱t cinne̱ng kokkom kak.

13Eci zin zo̱ze̱ necu, anycik e̱e̱t ci ozoz utuge ci iróng enne a̱gga̱ ko̱ kala Ta̱mu̱ta̱dde̱n kar kaanyik nonno gool ci a̱du̱wa̱k ol u̱nge̱tti̱ cik zoz ci a̱du̱wa̱ enne ko̱. 14Eci ming kala anna Ta̱mu̱ta̱dde̱n utuge ci iróng anna ka̱gga̱, vongiz cinanni ci ala Ta̱mu̱ta̱dde̱n, imma oo cinanni iróng a̱gga̱. 15I̱yo̱ko̱ zin, ku̱tu̱gu̱ nya? Kala atin anna Ta̱mu̱ta̱dde̱n vongize cinanni, ma̱i̱je̱ atin bo̱do̱k kala anna nonno bu̱k zinine cinanni; ke̱be̱ne̱ atin vongize cinanni, imma ngatu ke̱be̱ne̱ atin bo̱do̱k zinina. 16Ming inati i̱nna̱ Ta̱mu̱ta̱dde̱n vongize cunne, iróng wo̱ye̱ e̱e̱ti̱ ci aavtiyyu ki i̱nne̱t ojonun ko̱ a̱gga̱ gool kar kize ne, “Amen” eci enne iróng a̱gga̱ inati i̱nna̱ Ta̱mu̱ta̱dde̱n zo̱ze̱ ci niyo. 17Anyike i̱yo̱ko̱ i̱nna̱ Ta̱mu̱ta̱dde̱n zany lawinta go̱o̱le̱ ci abunna, abarik zin zoz necu iróng eela e̱e̱t neci.

18Kanyike anna Ta̱mu̱ta̱dde̱n zany oroot, kozozi u̱tu̱ge̱tti̱ne̱ cik aavtte do̱ do̱ cik iróng anna ka̱gga̱ kommogung i̱ge̱t do̱o̱k. 19Abarik ming kalayye ke̱le̱ci̱a̱ ki ol, maya ming kozozi zo̱zzo̱k cik een tu̱r a̱gga̱ ol do̱o̱k ke̱ngti̱, ngati wo̱ye̱ kozoze zo̱zzo̱k i̱bbo̱nge̱t omoto (10,000) utuge ci iróng ol a̱gga̱ ke̱ngti̱.

20Gotonogga ki ngonogga tu̱we̱nta̱, ma i̱no̱nnu̱ kaal cik gerzek ki i̱yo̱ko̱ dooli cikidik ko̱. Utungtek i̱no̱ni̱ ci gerze lo̱o̱c, abarik abunna ming anyakku i̱no̱ni̱ ci abunna ki ol wak a̱ddi̱ki̱re̱. 21Azi Manyi Ta̱mu̱ta̱dde̱n Warage cinne ne:

“Kanyike atin anna i̱do̱ngi̱ u̱gge̱ kozozit ol ciko

zo̱ze̱ cinanni u̱tu̱ge̱tti̱ne̱ cik aavtte do̱ do̱,

ma̱i̱je̱ nu̱nu̱n iróng nege aziknan.”#Isaya 28:11-12

22Imma zin zo̱ze̱ ci ozoze ol u̱tu̱ge̱tti̱ne̱ cik aavtte do̱ do̱ ko̱ iróng nege a̱gga̱ ke̱ngti̱ ko̱, een baayenit ci ol cik iróng a̱tu̱we̱, iróng een baayenit ci ol wak a̱tu̱we̱. Ma̱i̱je̱ e̱e̱ti̱ ci ozoz arizet ci zoz ci Ta̱mu̱ta̱dde̱no̱ ko̱, een ci ol wak a̱tu̱we̱, iróng een ci ol wak iróng a̱tu̱we̱. 23Ming urumte olli ke̱le̱ci̱o̱ do̱o̱k nga̱to̱de̱, kar ol kozozit u̱tu̱ge̱tti̱ne̱ cik iróng nege a̱gga̱, kar ol uggak cik iróng a̱tu̱we̱ ki̱tto̱zo̱ orgen cinne̱ng, iróng atin nege azi ne adak ol ne̱ko̱ ngamoni? 24Ma̱i̱je̱ ming i̱tto̱ e̱e̱ti̱ ci iróng a̱tu̱we̱ orgen ci ol wak a̱tu̱we̱ kar kizik zoz ci a̱du̱wa̱ ol ne̱ko̱, okko atin Ta̱mu̱ta̱dde̱n ogoni, elemi atin enne een ba̱ci̱ cinne kar ka̱gga̱ apahek atin Ta̱mu̱ta̱dde̱n nonno lo̱ki̱ko̱ zo̱ze̱ ci kaal balik aziye enne ke̱ do̱o̱k. 25I̱ye̱le̱k atin zo̱zzo̱wa̱ ne̱ko̱ kaal cik a̱lu̱gnye̱ zinine cinne ko̱ do̱o̱k, kar atin enne kakatek u̱zu̱ngtti̱ lo̱o̱c kar ki̱di̱ngdi̱nga̱n Ta̱mu̱ta̱dde̱n kize ne, “Aave Ta̱mu̱ta̱dde̱n de̱de̱ to orgene cunno̱ng!”

Gool ci abunna kalawe Ta̱mu̱ta̱dde̱n

26Gotonogga ki ngonogga tu̱we̱nta̱, kazi zin naga ne? Ming urumteu niga nga̱to̱de̱, anyak e̱e̱t ci orong keben lo̱ng, icima zoz ci ti̱lo̱wi̱nto̱, icima zoz ci i̱ye̱le̱k Ta̱mu̱ta̱dde̱n nonno, icima zoz ci iróng ol a̱gga̱, icima arizet ci a̱du̱wa̱ne̱ u̱nge̱tti̱ cik zozzak. Abunna kaala ne̱ko̱ do̱o̱k ming ogone kar keela ol cik een e̱re̱nno̱k ke̱le̱ci̱a̱. 27Ming anyak ol cik orong kozozit u̱tu̱ge̱tti̱ne̱ cik iróng ol a̱gga̱, aanycik e̱e̱t co̱de̱ kozoz, iróng ol rama icima i̱i̱yo̱ ozoz lak co̱de̱, aanycik bo̱do̱k e̱e̱t imma ku̱du̱wa̱ ke̱ngti̱ cik zo̱zzo̱k ne̱ke̱. 28Ming i̱llo̱i̱ e̱e̱t ci kar ku̱du̱wa̱ zoz neci keng cinne, anyik e̱e̱t ci ozoz utuge ci aave do̱ ko̱ kijahe ke̱le̱ci̱a̱, kar kozozik ele cinne do̱ ki Ta̱mu̱ta̱dde̱n.

29Aanycik ol cik e̱e̱ggi̱n a̱ri̱tto̱k rama kozozit zoz ci i̱ye̱le̱k Ta̱mu̱ta̱dde̱n nogo, kar ol do̱o̱k kiziyet idic zoz ci a̱du̱wa̱ nege. 30Ming i̱ye̱le̱k Ta̱mu̱ta̱dde̱n e̱e̱t imma ngatinne̱ng olle ne̱k aavtte lo̱o̱ta̱ ko̱ zoz ci a̱du̱wa̱ nege ko̱, anyik e̱e̱t wanai ozoz oowa ke̱ kibil zoza. 31Abunna niga do̱o̱k ozozu zo̱zzo̱k wak Ta̱mu̱ta̱dde̱no̱ e̱co̱de̱ e̱co̱de̱, kar ki̱ti̱lo̱u̱ng bak eelanung. 32Imma e̱e̱ti̱ ci een a̱ri̱to̱i̱t ko̱ anyak doiz ci abilize enne ele cinne kar kaanyik e̱e̱t imma kozoz. 33Eci Ta̱mu̱ta̱dde̱n iróng orong ngotaninet, abarik enne orongnyet agit ka̱vvu̱t labak ganonta.

Ming ovvo olli Ta̱mu̱ta̱dde̱no̱ arume nga̱to̱de̱ ke̱le̱ci̱a̱, 34abunna ngaai ming aavtte li̱i̱m ke̱le̱ci̱a̱nya̱i̱. Iróng ol aanyik nogo kozozit, abunna ming elemi zoz ki ming a̱du̱wa̱ lo̱ti̱nno̱wa̱ balik eher Musesi ke̱. 35Ming orong ngaa ki̱jji̱n gi̱i̱ ci orong enne kar ka̱gga̱, abunna ming a̱jji̱n mac cinne ce̱e̱za̱; eci gerza oroot ming ozoz ngaa ke̱le̱ci̱a̱.

36Iróng zoz ci Ta̱mu̱ta̱dde̱no̱ akane ngatinno̱ng, amire ki i̱ge̱t do̱ cik uzucaung zoz ci Ta̱mu̱ta̱dde̱no̱. 37Ming i̱no̱n e̱e̱ti̱ imma azi ne ke̱e̱ni̱ a̱ri̱to̱i̱t, icima kanyai arizet ci vongizo, abunna enne ming a̱gga̱ zoz ci keherakkung anna i̱ge̱t ko̱ een zoz ci Manyi Ye̱su̱ Ki̱ri̱sto̱. 38Ming ibbez enne zoz necu, ibbeze atin enne bu̱k.

39Gotonogga ki ngonogga tu̱we̱nta̱, abunna niga arikku zi̱nze̱tti̱ zoz ci Ta̱mu̱ta̱dde̱no̱ uwak ol ciginnek, ma alamnyu ol wak ozoz u̱tu̱ge̱tti̱ne̱ wak iróng ol a̱gga̱. 40Abarik abunna kaala do̱o̱k ming ogone go̱o̱le̱ ci abunna.

Currently Selected:

1 Ko̱ri̱nto̱ 14: tex

Highlight

Copy

Compare