1 Ko̱ri̱nto̱ 13
13
Rezinet ol cik diirik
1Ming kanyai anna komiz ci kozoze
u̱tu̱ge̱tti̱ne̱ cik ollu do̱o̱k
ki cik anjilonyau bu̱k,
imma ngatu i̱llo̱i̱ annit rezinet ci kireze ol,
een zoz cinanni ko̱ du̱wa̱ du̱wa̱ gaganiko,
i̱llo̱i̱ zoz ci een de̱de̱.
2Ming kanyai anna arizet ci ka̱du̱wa̱ne̱ zoz ci i̱ye̱le̱ka̱ Ta̱mu̱ta̱dde̱n annit,
icima kanyai doiz ci ka̱gga̱we̱ kaal do̱o̱k,
kedeca kaal wak a̱lu̱gu̱ny Ta̱mu̱ta̱dde̱n iróng i̱ye̱le̱k ol bu̱k,
icima kanyai tu̱we̱ne̱t
ci kanyike bee ki̱pi̱ya̱ ele kuk ngamani, ma̱i̱je̱ ngatu i̱llo̱i̱ rezinet ngatinanni ci kireze ol,
kaave anna gaganiko.
Maya ming kirezi ol.
3Ma wo̱ye̱ nu̱nu̱n kanyike
kaal cigannik ol wak amati ko̱ do̱o̱k,
icima ka̱da̱i̱ ngati katuzene gwo̱o̱ya̱#13:3 Ka̱da̱i̱ ngati katuzene gwo̱o̱ya̱: A̱ru̱k ol uggak Kiristian ka̱da̱i̱to̱ go̱o̱le̱ necu, eci nege iróng abure zoz ci Ki̱ri̱sto̱. kar keelai e̱e̱t imma, imma ngatu i̱llo̱i̱ rezinet ci kireze ol,
i̱llo̱i̱ atin gi̱i̱ ci karuba anna.
Maya ming kirezi ol.
4Ming anyak e̱e̱ti̱ rezinet zinina, rezinet ci aanyik zinin ci e̱e̱to̱ kalal, een rezinet bunnat.
Iróng rezinet aanyik e̱e̱t kaarik zinin cinne kaal cik ollu,
okko e̱e̱ti̱ ci anyak rezinet, iróng odong ele icima a̱ppi̱k ele. 5Imma e̱e̱ti̱ ci anyak rezinet zinina, iróng egerenyek ol mootiza,
iróng bo̱do̱k irezek kaal ele cinne do̱ niko,
iróng omoze ataman,
iróng azunne zinina
zoz ci gerze ogonik ol nonno.
6Iróng e̱e̱ti̱ ci anyak rezinet atalne ming ogon ol zoz ci gerze,
abarik atalne ming ogon nege zoz ci een de̱de̱.
7Eela rezinet ol, alam kaal cik gerzek a̱vvu̱na̱k e̱e̱t ci anyak rezinet zinina.
Iróng tu̱we̱ne̱t ci e̱e̱t ci anyak rezinet aṯurneke.
Aanyik rezinet nonno karik zinin deten ci Ta̱mu̱ta̱dde̱no̱ kar kanyik bo̱do̱k kinim no̱ngi̱tto̱n cik a̱vvu̱na̱k nonno.
8Iróng rezinet aanyik ol cik anyak rezinet zi̱nze̱tti̱nne̱ ku̱yu̱kte̱.
Abarik okko atin zoz ci ozoz ol arizete ci zoz ci Ta̱mu̱ta̱dde̱no̱ ko̱
okko atin aṯurneke,
ki u̱tu̱ge̱tti̱ cik aavtte do̱ do̱,#13:8 U̱tu̱ge̱tti̱ cik aavtte do̱ do̱: Oob Pa̱u̱lo̱ oroot zoz ci u̱tu̱ge̱tti̱ cik aavtte do̱ do̱, ci aanyik Vongizi ci A̱li̱le̱ ol cik diirik. Ikeb1 Ko̱ri̱nto̱ 12:10-31; 14:1-25.
iróng atin ngen
ozoze.
Imma kaala cik ka̱gga̱ naga do̱o̱k,
erehek atin ol.
9Iróng naga ka̱gga̱ arizet do̱o̱k,
ki arizet ci zoz ci Ta̱mu̱ta̱dde̱no̱ ka̱du̱wa̱ naga ko̱,
iróng naga ka̱gga̱ veelek.
10Imma ming okko zoz ci caale a̱kku̱,
okko atin i̱ye̱la̱i̱,
kar zoz ci iróng naga ka̱gga̱ ko̱,
okko atin a̱zze̱ ne dakdak.
11Baling ngen ke̱e̱ni̱ do̱le̱c cidici ke̱,
kozozi
ki i̱yo̱ko̱ do̱le̱c cidici ko̱.
Ma̱i̱je̱ baling ka̱gga̱wa̱ zoz,
kibiliza zoz ci doolizetu.
12I̱yo̱ko̱ kacinna naga de̱de̱ Ta̱mu̱ta̱dde̱n
ogon ki ri̱ri̱to̱ni̱ ci di̱i̱zo̱
ming kacin miraya.
Imma vu̱rrta̱ kacin atin nonno
eberene.
Iróng naga ka̱gga̱ kaal do̱o̱k,
kovvo atin naga ka̱gga̱,
ki i̱yo̱ko̱ Ta̱mu̱ta̱dde̱n ming a̱gga̱yye̱t
agit do̱o̱k ko̱.
13I̱yo̱ko̱ anyak zin tu̱we̱ne̱t,
ki zinin ci erewe gi̱i̱ imma ngati Ta̱mu̱ta̱dde̱no̱ ki rezinet zinine cunne.
Ma̱i̱je̱ kaale ne̱k e̱e̱ggi̱n i̱i̱yo̱ ko̱,
rezinet ci a̱ddi̱ki̱re̱ kommog veelek.
Currently Selected:
1 Ko̱ri̱nto̱ 13: tex
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
