Kada Bulawan 23
23
–6–
1Ia ke cumadokkoko kumande sola tomapangka',
ingaranni inda joo musioloan.#23:1 ingaranni inda joo musioloan iarika kita rampai apa to muoloi.
2Ia ke gaja doangmoko kumande,
ta'tanni jolo' joo kamadoanganmu.
3Danggi' musokoi to kande marasa napasadia,
la naniiri nnissen sipa'mu.
–7–
4Danggi' muparukui la messugih.
Pajaii joo akkatta susi joo.
5Nasaba' cingga'tu'ra nalanynya' to ewanan,
butung to kepani' male mentia' susi langkan.
–8–
6Danggi' mukande kandena tomacecceng.
Danggi' mukacinnaii to kande marasanna,
7nasaba' den nareken llan penawanna.
Nakuanko, “Takumande! Pado'pi,”
apa sitonganna te'da nalantuk penawanna.
8Iamo dau ke mangkai mukande mulua pole'i,
na sininna to kada macanningmu lako, te'damo bua'na.
–9–
9Danggi' mupangngajahhi to tobattuk,
nasaba' te'da na la nnangga'i to kada bulawanmu.
–10–
10Danggi' lalo mupalele patok katonan to nang denmo tempon jiona mai,
ba'tu nnala padangna pea biung.
11Nasaba' mawatang to tomangla'bakna,
la Naewako mpangkadananni to kara-karana pea biung.
–11–
12Parinawa tonganni to pangpangngajah,
patanan rampa'i talingammu lako sininna kada kapaissenan.
–12–
13Danggi' paja mpangngajahhi anakkamu.
Ia ke mupekajui, te'dara nalampumatei.
14La mupekajui,
dikuara napusalama'i jio mai lino tomate.
–13–
15Ee anakku', gaja mariona'
ke maccako.
16Gaja sannangna'
ke messunni jio timummu to kada tongan.
–14–
17Danggi' mangngimburu lako tompugauk bang dosa,
apa da'tanko ngkalaja' ngkasiri' Puang Allataala,
18namelo to katuoanmu to muoloi lako,
muampa'i to apa murannuan.
–15–
19Ee anakku', pesa'dingngii memmaccako,
parinawa meloi to tujunna katuoanmu.
20Danggi' lalo musisoba' to topangmalangoan
ba'tu tomaullak,
21nasaba' nang la menjaji tokaasi-asii.
Ia ke mamma'-mamma' manda mupugauk, undinna dau nang la mebaju titape-tapeko.
–16–
22Pesa'dingngii to ambe'mu, nasaba' iara muden,
angga'i to indomu moi namatuamo.
23Ia to sininna katonganan, kamaccan, pangpangngajah na kamapahangan sipato' mupengkullei muampui,
danggi' lalo mupaboko'i penawa.
24Liwa' napumasannang ambe'na, ke makassingngi to anakkana,
napumarioi ke maccai.
25Ake' napumarioko indo ambe'mu,
napumasannangko pajajianmu.
–17–
26Ee anakku', kita rampa'i to katuoanku',
mupangpasusii!
27Ia to baine bandarang butung garuang gaja dalan,
na ia to baine sala kedo susi poja gaja mecilakai.
28Susii parampo' kumuku-muku la mangjokko,
napusaba'i buda muane te'da napugauk janjinna lako balinna.
–18–
29Indara to masessa? Indara to sumarro?
Indara to massipura? Indara to salle sarro?
Indara to kojong kalena to te'da naissenni saba'na?
Indara to malea matanna?
30Iamo to tosiupuh bongi cumadokko mangiso' anggoro'
na nakabudai nniso' tuak dirau.
31Danggi' lalo napamacinnako anggoro' moiraka nagaja melo dikita,
macinnaki' ngkitai pancillang-cillang llan isotan,
na gaja rasa diamma'.
32Apa undinna, susimoko to mangka natitto ulah
napa'dikkiko ipohna.
33Na makalaen-laen to apa mukita
mumangkada tangmalilingan.
34Susiko to jao kappala' naroge bombang llan tangnga tasik
susi to jao potok ariri kappala'.
35Mumangkada kumua,
“Dibunona' pale', na te'da kusa'dingngi,
ditampelengna', na te'da kurasai.
Piranra kulamangngingaran
kunnangah o anggoro'?”
Currently Selected:
Kada Bulawan 23: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
