MATTHEW 4
4
Satan Odomo Jesus Idomo ye Ini Emi Jesus Ɔtɔŋɔde Iso Utom Esie Ke Galilee: Mme Akpa Mbet Jesus
(Mk 1.12-13; Lk 4.1-13)
1EKEM Spirit ada Jesus ɔdɔk aka ke desert, man Satan odomo Enye. 2Enye inyuŋ idiaha ŋkpɔ uwemeyo aba ye okoneyo aba, ndien oro ema ekebe, Enye okop biɔŋ. 3Ndien andidomo edi edidɔhɔ Enye ete, Edieke Afo edide Eyen Abasi, wuk mme itiat emi ekabare edi uyo. 4Edi Jesus ɔbɔrɔ ete, Ema ewet ete, Idige uyo ikpɔŋ ke owo edida idu uwem, edi edida kpukpru ikɔ eke ewɔrɔde Abasi ke inua odu. 5Ekem Satan ada Enye oduk ke edisana obio, emen Enye odori ke edikoŋ ebiet temple, onyuŋ ɔdɔhɔ Enye ete, 6Edieke Afo edide Eyen Abasi, sio Idem Fo duɔk ke isɔŋ; koro ema ewet ete,
Enye eyenɔ mme angel Esie uyo abaŋa: Fi
Ndien mmɔ eyekama Fi ke ubɔk mmɔ,
Mbak Afo edituak ukot Fo ke itiat.
7Jesus ɔdɔhɔ enye ete, Ema ewet ŋko ete, Kudomo Jehovah Abasi fo. 8Ŋko Satan ada Enye aka ke ata edikoŋ obot, onyuŋ owut Enye kpukpru mme obio ererimbot ye ubɔŋ mmɔ; 9onyuŋ ɔdɔhɔ Enye ete, Nyenɔ Fi kpukpru ŋkpɔ emi, edieke ɔduɔde ke isɔŋ atuak ibuot ɔnɔ Mi. 10Ekem Jesus ɔdɔhɔ enye ete, Daha Mi ke usuŋ, Satan: koro ema ewet ete, Tuak ibuot nɔ Jehovah Abasi fo, nyuŋ nam ŋkpɔ nɔ Enye ikpɔŋ-ikpɔŋ. 11Ekem Satan adaha ɔkpɔŋ Enye; ndien sese, mme angel edinam ŋkpɔ enɔ Enye.
12Edi ke ini Jesus okopde ete ekeyak John enɔ, Enye ɔnyɔŋ aka Galilee; 13onyuŋ ɔkpɔŋ Nazareth ebe edi ediduŋ ke Capernaum, emi odude ke mben inyaŋ, ke adaŋa Zebulon ye Naphtali; 14man osu nte Isaiah prophet ɔkɔhɔde, ete,
15Isɔŋ Zebulon ye isɔŋ Naphtali,
Usuŋ inyaŋ, ke edem Jordan oko,
Galilee mme Gentile.
16Mbio oro eketiede ke ekim
Ekut akwa uŋwana,
Ama edi mmɔ eketiede ke isɔŋ mfut mkpa,
Uŋwana ayama ɔnɔ mmɔ.
17Toto ke ini oro Jesus ɔtɔŋɔ ndikwɔrɔ, ndinyuŋ ndɔhɔ, ete, Ekebare esit; koro Ubɔŋ Heaven ke ekpere.
18Edi nte Enye asaŋade ke mben Inyaŋ Galilee, enye okut nditɔeka iba, kpa Simon emi ekerede Peter ye Andrew eyen-eka esie, nte eduɔŋɔde iyire ke inyaŋ; koro mmɔ edide mme ɔkɔ-iyak. 19Enye onyuŋ ɔdɔhɔ mmɔ ete, Etiene Mi, ndien nyenam mbufo edi mme ɔkɔ-owo. 20Ndien ndo-ndo oro mmɔ edaha ekpɔŋ iyire, etiene Enye. 21Nte Enye ebede asaŋa ke iso, Enye okut nditɔ-eka iba efen, kpa James eyen Zebedee ye John eyen-eka esie, nte etiede ke ubom ye ete mmɔ Zebedee ediɔŋ iyire mmɔ; Enye onyuŋ okot mmɔ. 22Ndien ndo-ndo oro mmɔ edaha ekpɔŋ ubom ye ete mmɔ, etiene Enye.
23Ndien Jesus asaŋa ke ofuri Galilee, ekpep mme owo ŋkpɔ ke synagogue mmɔ, onyuŋ ɔkwɔrɔ gospel Ubɔŋ Heaven, onyuŋ anam kpukpru oruk ubiak ye kpukpru oruk udɔŋɔ eke enamde mbio-obio ekure. 24Etop Esie onyuŋ asuana ke ofuri Syria; mmɔ enyuŋ eda kpukpru mbon udɔŋɔ esɔk Enye, kpa mmɔ eke nsio-nsio udɔŋɔ ye ndutuhɔ enamde mmɔ, ye mmɔ eke enyenede mme demon, ye mmɔ eke edɔŋɔde mbukpi ye akpa-ubeŋ; Enye onyuŋ anam mmɔ ekop nsɔŋidem. 25Ndien ata ediwak otu owo eto ke Galilee ye Decapolis ye Jerusalem ye Judaea ye edem Jordan oko esaŋa ye Enye.
Currently Selected:
MATTHEW 4: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.