MATTHEW 3
3
Ukwɔrɔ Ikɔ John Baptist
(Mk 1.1-8; Lk 3.1-18; Jn 1.19-28)
1KE mme usen oro John Paptist oto edi edikwɔrɔ ikɔ ke desert Judaea, ete, 2Mbufo ekabare esit; koro Ubɔŋ Heaven ke ekpere. 3Emi edi owo emi prophet Isaiah eketiŋde abaŋa enye, ete,
Uyo andifiori ke desert, ete,
Mbufo ediɔŋ usuŋ Jehovah,
eneŋere ɔkpɔusuŋ Esie.
4John oro esine edisine-ŋkpɔ eke edade idet camel enam, onyuŋ ɔbɔbɔ mbɔbɔ ikpa-unam ke isin; udia esie onyuŋ edi ŋkukuŋpkɔyɔriyɔ ye aranɔkwɔk-ikɔt. 5Ekem mbio Jerusalem, ye ofuri Judaea, ye ofuri ŋkan-ŋkuk Jordan, 6ewɔŋɔ etiene enye; enyuŋ ena baptistm ke ubɔk esie ke akpa Jordan, ke eyararede mme idiɔkŋkpɔ mmɔ. 7Edi ke ini enye okutde ediwak mme Pharisee ye mme Sadduccee edide edina baptism ke ubɔk esie, enye ete mmɔ, Mbufo nditɔ urukikɔt, anie eketeme mbufo efeŋe ebɔhɔ iyaresit eke edide? 8Esioŋo naŋa mfri eke ekemde ye erikabare esit: 9ekunyuŋ ekere ndidɔhɔ ke esit mbufo, ete, Ŋkɔm nnyin imenyene Abraham ke ete: koro ndɔhɔ mbufo nte, Abasi emekeme ndinam mme itiat emi edaha eda edi nditɔ Abraham. 10Edi kpa idahemi emonim ekudi ke itak eto: ntre ke ekpi kpukpru eto eke miŋwumke mfri eke eyede eduɔk, emen, esin ke ikaŋ. 11Ami nda mmɔŋ nnim mbufo baptism, man ekabare esit: edi Enye emi etienede Mi ke edem enyene odudu akan mi, emi mmendotke ndikama ikpa-ukɔt Esie; Enye eyenim mbufo baptism ke Edisana Spirit ye ikaŋ. 12Usakŋkpɔ Esie odu Enye ke ubɔk, Enye eyenyuŋ anam itie-ubekibokpot Esie otim asana, onyuŋ obon ibokpot Esie ke ubet, edi eyefɔp mbio ke ikaŋ eke midinimeke.
13Ekem Jesus oto ke Galilee etiene John ke Jordan, ete onim Imɔ baptism. 14Edi John aŋwana ndibiɔŋɔ Enye, ete, Ŋkam nyom Afo onim mi baptism, ndien Afo etiene mi? 15Edi Jesus ɔbɔrɔ enye ete, Yak edi ntre ke emi: koro ntem ke odot nnyin ndinam kpukpru nti ido. 16Ekem John onyime ɔnɔ Enye. Edi ke ini Jesus akanade baptism ama, kpa idaha oro Enye ɔwɔrɔ ke mmɔŋ ɔdɔk: ndien sese, enyɔŋ eberere ɔnɔ Enye, Enye onyuŋ okut Spirit Abasi ɔsuhɔrede nte ibiom edidoro Enye ke idem; 17ndien sese, uyo oto ke enyɔŋ ɔdɔhɔ ete, Emi edi edima Eyen Mi, emi esit enemde Mi eti-eti ye Enye.
Currently Selected:
MATTHEW 3: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.