REVELATION 7

Matsh muꞌi Tutuligo wo e doꞌibia

1Ntki haha wabsh ha nei g giꞌik anghil. K hema ab kehk siꞌalig tahgio ch hema ab huduni tahgio ch hema ab wakolim tahgio k ch hema ab juhpin tahgio. Kuki idam an uꞌukch g giꞌik hewel mat pi an hu wo hewedad jewed dahm o an kahchki dahm. Kuki gam hu wabsh i pi hoini wehs haꞌichu.

2Kuni hahawa hema ep neid g anghil. Kuki id ab him siꞌal wecho amjed ch g Jiosh cheposidakud uꞌa. Kuki eda ab mahks hegam giꞌik mat wo padch g jewed ch kahchki. K wabshaba ihda hema ab ha wui hab kaij. 3“Pi g am s-koꞌokam has wo juhni g jewed ch kahchki ch kukui. Kutt ab hoꞌip kia ha chepos g Jiosh pionag ab ha-koka ab.”

4Kuni kah mash d siant giꞌikko wehst-mahm gamai giꞌik mihl (144,000) hegam mamt ha chepos heg hekaj Jiosh cheposidakud. 5Am o haꞌichug g gamai gohk mihl (12,000) ab wehsijj i ha amjed g t-shohshonbad. Idam o wa d gamai gohk ch wa hab chechgig Judah, Reuben, Gad, 6Asher, Naphtali, Manasseh, 7Simeon, Levi, Issachar, 8Zebulun, Joseph, Benjamin.

Si geꞌe hemapda

9Ntki hahawa ep ha nei moki am shaꞌi si geꞌe hemapig hab chuꞌig. Kuki pi ta kuintama idam hemajkam ch ab amjed g wehsko jejewed ch d nahnko mahs oꞌodham ch nahnko kaidam neneokdam.

Kuki am daha e-kownal daikud ab hegai mo kahwalkaj ab e chehgidch. Kuki hegam muꞌi hemajkam am baꞌich gegok ch s-tohtakaj e enigadadch ch g haꞌichu iꞌibhonig an uhꞌukch 10ch si s-kaidam neneok ch hab kaij:

“T-doꞌibiadag o ab amjed g Jiosh ch ab amjed hegai mo kahwalkaj ab e chehgidch.”

11Kuki wehsijj g anghil an ha wehgaj gegok ch am i shulig ch ab ihm g Jiosh ch hab ep kaij:

12“Ab ach si hoꞌigeꞌid ch si hehgchulid g Jiosh no pi wehs edgid g amichudadag ch gewkdag chum hekid.

Amen.”

13Tki hema hegam geꞌeged ab ni-kakke k hab kaij, “Dohꞌo wud idam hemajkam mo s-tohtam e enigadadch ch hebai amjed hihim?”

14Ni hab kaij ab wui, “Pi ani shaꞌi mahch. Ahpi ap wa s-mahch.”

K hab kaij ab ni-wui, “Idam o d hegam mat ab s-ap gahi wuwha g si geꞌe shoꞌigchudadag. Heg o wa wepo mat am i wapko g e-wepschuga heg hekaj ehꞌedaj hegai mo kahwalkaj ab e chehgidch.

15Heg o hekaj ia gegok Jiosh baꞌich ch ab ihm wehs tashkaj ch s-chuhugam oidk.

Kut g Jiosh wo ha nuhkudad chum hekid.

16Pi at dahm d ep wo bihugkoik o d wo tonkkoik.

Pi at hekid ep wo s-tonik ha wehhejed.

17Hegai mo kahwalkaj ab e chehgidch at wo ha nuhkudad hab masma mo g kahwal nuhkuddam ch am wo i ha wanim heg wui s-kehg doakag mo heg wepogidas shonkam shuhdagi.

Kut g Jiosh ab wehs wo i oa g ha-ohꞌog.”

Currently Selected:

REVELATION 7: ood

Highlight

Copy

Compare