HIBRU 11
11
A hauhuriana lui God
1A noda hauhuriana lui God u vosangi lakwakita kwara doluaki na kinau hinea tamo tau na domida mo madi luga, vae rau kareaki. A hauhuriana hini u vosangi lakwakita kwara doluaki na kinau hinea tahe taga lavira tea, vae rau eno. 2I ratubuda tuai rau hauhuri lui God, vae huri hi u kalukinira.
3I kita tau hauhuri lui God, vae huri hi tau rongo kikilaki kwara savi na kinau na varamana hika, i God u taura kina leona. Vae huri hi, a kinau hinea tahe taga lavira tea, vae i God u kihi na vivilagoki na varamana luga hinea tau taga lavira. #a Jen 1.1; Sam 33.6,9; 2 Pita 3.5; b Rom 4.17
4I Evol u hauhuri lui God, vae huri hi mo bete na hilehile katukwale lakwae u karea haburu, u sileti na hilehile noi Ken. I Evol u hauhuri lui God, vae huri hi i God u kalukinia mo viti kwara aia a tangaloi bakoto, vae i God u lagwa mo lavi na nona hilehile. A tangaloi aia hi u mate ba, vae huri na nona hauhuriana u kwahakwaha maikita radu nga.#Jen 4.3-10
5I Inok u hauhuri lui God, vae huri hi he mate tea. I God u lavia mauriki tina varamana vaki maia. A tangaloi rahe hagwe lavia tea, huri i God u lavia ba. Vae tomua lolona hi i God he lavia te radu nga, a Uliuli* Kokona u matangwasarakinia kwara u vai i God mo lagwa.#Jen 5.24 6Vae diko a tangaloi he hauhuri tea lui God, nehe vai lai tea kwara ne vai i God ne lagwa, huri diko te tangaloi u lengaia kwara ne vanamai vaki mai God, vae ne hauhuri kwara i God aia eia, vake u vai tabetabekinira hinea ramo toko soro haroa.
7I Noa u hauhuri lui God, vae huri hi lolona i God mo viti terekaki na kinau hinea rahe mule luna te radu, hinea a tangaloi rahe tagatagaira te radu, vae i Noa u rongohuria. Mo tabe na aga lakua, kwara aia mai raranatuna rana ahi luna. Vae kina nona hauhuriana hi mo vosangi kwara a tangaloi savia lo varamana lo taro hi rau hati, vae rana sala. Vunu vake lo hala aia hi nga, u lavi na bakotoana hinea i God u betea lakwara hinea rau hauhuri luna.#a Jen 6.13-22; 7.1; 1 Pita 3.20; b Rom 3.22; 4.13; 9.30
8I Evraham u hauhuri lui God, vae huri hi mo rongohuri God lo taro hinea i God mo kwarea kwara ne vano vaki lo vanua dolua. A vanua hi, i God u tuliki terekakinia ba lakwae kwara vae neri betea lakwae. Vae huri hi, i Evraham mo tiraki na vanuana mo lakao, vae he kikilai tea kwara ne maravuti ave. #Jen 12.1-5; Bol 7.2-4 9Vae huri u hauhuri lui God, mo hugu lai lo vanua hinea i God mo tulikinia lakwae tuai, vae aia a vanamaiana. Aia, i Aesik, i Sekov, hinea i God mo bete na tulikileo rau taritarisa lakwara vatavatahakinira, rau hugu lolo ingwa haleki vohoki, rahe tabe te ingwa kareaki. #Jen 23.4; 26.3; 35.12,27 10I Evraham u vai kwehi, huri u hugu tara kwara ne vano vaki lo gwatuivanua hinea i God mo vai na dumuki mo tabea, vae a gwatuivanua hi ne tu vaki tuai huri a tanovi hi u madi.
11I Sera u hauhuri lui God, vae huri hi, venaha diko u ngwarasea ba tina bava natu, vae u hago natu. U hago natu huri u hauhuri lui God kwara ne kwiribibi na nona tulikileo. #11.11: Lo hala kairuaki a domidomi na leo hi aia hokinia hika kwara I Evraham u hauhuri lui God, vae huri hi i Sera u bava natu kinia, venaha diko i Evraham u ngwarasea haburu, vake i Sera u retireti. I Evraham i natuna mo eia huri u hauhuri lui God kwara ne kwiribibi na nona tulikileo. #Jen 17.19; 18.11-14; 21.2 12Huri na kinau hi, i Evraham hinea aia katukwale vohoki, vake u ngwarasea ba, u garagarani kwara ne mate, vae a nona gwaloana u rusa lengalenga, a tangaloi tikei kwara ne valukira. Aira hoki na vitu na taetae, vake hoki na one na tahi.#a Rom 4.19; b Jen 15.5-6; 22.17; 32.12; Eks 32.13; Dut 1.10; 10.22
13Savi na tangaloi aira hi rau hauhuri lui God, vae ramo mate rahe hagwe na kinau te hi radu nga hinea i God mo tuliki terekakinira lakwara. Aira rau tagai na kinau vano hi, vae hokinia rau vakahao tiura radu nga, vae rau tagaira rau lagwa. Vae hikani rau tuku matangwasaraki kwara rau hugu lo varamana hika, vae hokinia aira a vanamaiana vohoki, a tataga tikei.#Jen 23.4; 47.9; 1 Kron 29.15; Sam 39.12; 1 Pita 2.11 14A tangaloi rau kwahakwaha kwehi, rau vosangi u matangwasara kwara rau tuku soro haro na vanuaga bakotoki.
15A domiga he domi tukutuku te huri na vanuaga hini rau tirakinia ba. Kwara vae diko rau domidomi hokinia hi, kwara vae a taroki ne eia lakwara rana mule taliku vaki takwa-hi. 16Aia rau lengaia kwara te vanuaga te dolua vake, hinea u karea siletia hi tomua, a vanua aia hi aia lolo taetae. Huri na kinau hi i God he maemae tea maira kwara rana kwarekinia ki noga God, huri u vai rarai na gwatuivanua lakua katukwale ba hurira.#Eks 3.6,15; 4.5; Mak 12.26
17I Evraham u hauhuri lui God, vae huri hi kwahaia hi i God mo kahi haro na domina, i Evraham u rarai kwara ne kwohi matei natuna i Aesik, ne hilea lakwai God hoki na kairoroi*. I Evraham aia hi hinea i God mo tuliki na leona lakwae, vae u rarai kwara ne kwohi matei natuna hi a natu kwakehe, ne hilea lakwai God hoki na kairoroi.#Jen 22.1-10; Sem 2.21 18I God u matangwasarakinia ba lakwae kwara, “Lui Aesik a nomu gwaloana ne vanamai ne matala ne lakua.”#Jen 21.12; Rom 9.7 19Vae i Evraham u domidomi luna, u kikilai kwara i God ne rakati lavi na tangaloi tina mateana. Vae aia hokinia kwara i Evraham u lavi Aesik taliku tina mateana.
20I Aesik u hauhuri lui God, vae huri hi mo tau na tangaroa karea lui Sekov mai Iso kwara vae a kinau karea ranari vanamai lugaru.#Jen 27.27-29,39-40
21I Sekov u hauhuri lui God, vae huri hi mo garagarani kwara ne mate, mo tau na tangaroa karea lui raranatu i Sosev kairua vatavatahakirarua. Mo titiori lo nona kaitiko mo kaluhaki God kina domi mavakiana.#a Jen 48.15-16; b Jen 47.31
22I Sosev u hauhuri lui God, vae huri hi mo garagarani kwara ne mate, mo viti huri na taroki hini kwara vae a gwaloana noi Isrel* rana ngwalua tina vanua Isiv. Vunu mo tuliki terekaki lakwara kwara rana vai kworohokinia mana huina.#Jen 50.24-25; Eks 13.19
23I Mosis, i tamana mai retahina, raru hauhuri lui God, vae huri hi kwahaia i Mosis mo vora raru mo tavunikinia a vula kaitolu. Raru tagaia kwara aia a natu karea, vae raru he mataku tea kwara raru ne galo lo tangwata nona hugwe lakua. #a Eks 2.2; b Eks 1.22
24I Mosis u hauhuri lui God, vae huri hi lolona mo ngwarasea hake, he tiraki na tangaloi tea kwara rana kwarekinia kwara aia a natu na vavine hi, i natu i Vero a hugwe lakua.#Eks 2.10-12 25Vae u lengaia kwara ne bulu mana tangaloi noi God kwara ne rongo hati haragoki maira. U bena vohoki kwara ne lagwalagwa lo hala na hatiki, venaha diko te lo taro gwanugwanu, aia vae he lengaia te vohoki. 26Aia hokinia hinea mo viti kwara rana mana kinia huri i Vurae* hini i God neri horae, vae aia nehe domi huri tea, U rongo karea lo kinau aira vano hi siletia hi mo rongo karea lo tokaana karekarea lo vanua Isiv. U rongo hokinia hi huri u domidomi lo kaitakwe hinea i God neri betea lakwae.
27I Mosis u hauhuri lui God, vae huri hi mo ngwalua tina vanua Isiv, he mataku te kina hugwe lakua hinea mo lologutekinia. He mule te taliku, u lakao u lakao hokinia u tagai God hinea a tangaloi he taga lavia tea kina matana.#Eks 2.15; 12.51 28Vake u hauhuri lui God, vae huri hi mo tau na hala na Kanikani* na Tivekiana tomua halaradu lakwa na gwaloana noi Isrel. Mo tau na leo lakwara kwara rana bahiki na dai na sivsivi* kelekele lo beru na matakihala na ingwaga. Rau vai kwehi kwara a kaihora tina taetae na vai mate tangaloi, vae nehe vai matematei raranatuga tea hinea a raranatu ngwera rau vora tomua halaradu.#Eks 12.21-30
29A gwaloana noi Isrel rau hauhuri lui God, vae huri hi ramo kauutu lavi na tahi hinea a hinaki a Tahi Memea, hinea mo mulemai hoki na tano mamaha bakotoki. Vae kwahaia hi a ngwera Isiv ramote vai kwara rana kauutu hokinira, a tahi mo lolovaki taliku mo lulu korokorora ramo vidonoki.#Eks 14.21-31
30A gwaloana noi Isrel rau hauhuri lui God, vae huri hi kwahaia hi ramo lakao dali na kaititiba na gwatuivanua Seriko a rani kaibitu mo rovo, a kaititiba hi mo sovi. #Jos 6.12-21 31I Rehav, aia a vavine tu huri hala, u hauhuri lui God, vae huri hi he mate tea mana tangaloi hinea rahe rongohuri God tea. A gwaloana noi Isrel rahe kwohi mateia tea huri tomua, lolona a gwaloana noi Isrel kairua raru mo vano vaki Seriko kwara rana tagataga takwa-hi, vae aia u lai tabetabekirarua. #Jos 2.11-12; 6.21-25; Sem 2.25
32Hikani nu viti u rusa ba. A tangaloi rusa radu, nanahe viti vunu tea. A taroki tikei lakweau kwara na vehuriki vake huri i Kition, i Barak, i Samsin, i Sevta, i Devit, i Samuel mana tangaloi* duruduruki maira. 33Aira hi rau hauhuri lui God, vae huri hi ramo vai lavi na kinau rusa. Ramo tomuaki na gwaloana noi Isrel huri na vai vuro vovohi na vanua dolua ramo guira. Ramo vai kinau rau bakoto, vae ramo hagwe a kinau karekarea hinea i God mo tuliki terekaki kwara vae ne hile lakwara. Lo taroki tuaki ramo kwiri koro na kwakwa na laeon kwara ranahe kanira tea.#Jaj 14.6-7; 1 Saml 17.34-36; Dan 6.1-27 34Lo taroki tuaki ramo vai mate a luamea na kabu hinea u sea haburu. Vunu lo taroki tuaki ramo kwalao tina tangaloi hinea rau vai kwara rana ahi mateira kina bue na vuro. A noga huirana tikei, vae i God u hile huirana lakwara, ramo huira lo taro na vai vuro, ramo gui savi na tangaloi na vuro na vanua dolua.#Dan 3.23-25 35A ravavine tuaki rau hauhuri lui God, vae huri hi i God mo vai rabelaga ramo ahi taliku tina mateana.
Vunu a tangaloi tuaki hinea rau hauhuri lui God, rau tiraki tarabehiga lakwa na noga tavaluivuro ramo toko vai bulakikinira rovonaki ramo mate huri rau bega kwara rana tiraki noga hauhuriana. Rau vai kwehi huri ramo domidomi luna kwara diko ranahe tiraki na noga hauhuriana tea, vae i God ne rakatira taliku tina mateana vaki lo ahiana hinea u karea karakara.#1 King 17.17-24; 2 King 4.25-37 36A tangaloi tuaki hinea rau hauhuri lui God, a noga tavaluivuro rau mana tiehira, ramo takwilira. Vunu a tangaloi tuaki, a tangaloi rau gwarura kina seni, ramo taura lolo ingwa na gwarugwaru.#1 King 22.26-27; 2 Kron 18.25-26; Jer 20.2; 37.15; 38.6 37A tangaloi tuaki a tangaloi rau koso matemateira ki vatu lalakua, tuaki a tangaloi rau sio utuutuhira kairua, tuaki a tangaloi rau ahi matemateira ki bue na vuro. Vunu a tangaloi tuaki rau lakao kwehi a lugwaga tikei, rau tuku lugwaki a vinu na sivsivi mana nani. Rau kakaravika, a tangaloi rau livu lalikinira, rau vai bulakikinira. #2 Kron 24.21 38A tangaloi aira hi aira a tangaloi karea, a tangaloi laliki lo varamana rahe taritarisa tea kwara rana bulubulu maira. Vae aira hi rau lakalakao lolo bubu vuroki maia lolo vuti hoki na tangaloi hinea a tataga tikei. Tigwaravu rau tuku maturu lolo malanga vatu mana malanga tano.
39Savi na tangaloi aira vano hi rau hauhuri lui God, vae huri hi a vevehuri hurira nehe sala lai tea. Vae rahe lavi na kinau karekarea te radu nga hinea i God mo tuliki kwara ne hile lakwara, 40huri i God a nona domidomi hurikita u karea siletia hi mo vai hurira tuai. A nona domidomi aia hi kwara ne bulutakinira maikita tomua, vunu neri vaira ramo bakoto.
Currently Selected:
HIBRU 11: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
