Popular Bible Verses from HIBRU 11

Share

A noda hauhuriana lui God u vosangi lakwakita kwara doluaki na kinau hinea tamo tau na domida mo madi luga, vae rau kareaki. A hauhuriana hini u vosangi lakwakita kwara doluaki na kinau hinea tahe taga lavira tea, vae rau eno. I ratubuda tuai rau hauhuri lui God, vae huri hi u kalukinira.

Vae diko a tangaloi he hauhuri tea lui God, nehe vai lai tea kwara ne vai i God ne lagwa, huri diko te tangaloi u lengaia kwara ne vanamai vaki mai God, vae ne hauhuri kwara i God aia eia, vake u vai tabetabekinira hinea ramo toko soro haroa.

I kita tau hauhuri lui God, vae huri hi tau rongo kikilaki kwara savi na kinau na varamana hika, i God u taura kina leona. Vae huri hi, a kinau hinea tahe taga lavira tea, vae i God u kihi na vivilagoki na varamana luga hinea tau taga lavira.

I Evraham u hauhuri lui God, vae huri hi mo rongohuri God lo taro hinea i God mo kwarea kwara ne vano vaki lo vanua dolua. A vanua hi, i God u tuliki terekakinia ba lakwae kwara vae neri betea lakwae. Vae huri hi, i Evraham mo tiraki na vanuana mo lakao, vae he kikilai tea kwara ne maravuti ave. Vae huri u hauhuri lui God, mo hugu lai lo vanua hinea i God mo tulikinia lakwae tuai, vae aia a vanamaiana. Aia, i Aesik, i Sekov, hinea i God mo bete na tulikileo rau taritarisa lakwara vatavatahakinira, rau hugu lolo ingwa haleki vohoki, rahe tabe te ingwa kareaki.

I Noa u hauhuri lui God, vae huri hi lolona i God mo viti terekaki na kinau hinea rahe mule luna te radu, hinea a tangaloi rahe tagatagaira te radu, vae i Noa u rongohuria. Mo tabe na aga lakua, kwara aia mai raranatuna rana ahi luna. Vae kina nona hauhuriana hi mo vosangi kwara a tangaloi savia lo varamana lo taro hi rau hati, vae rana sala. Vunu vake lo hala aia hi nga, u lavi na bakotoana hinea i God u betea lakwara hinea rau hauhuri luna.

I Inok u hauhuri lui God, vae huri hi he mate tea. I God u lavia mauriki tina varamana vaki maia. A tangaloi rahe hagwe lavia tea, huri i God u lavia ba. Vae tomua lolona hi i God he lavia te radu nga, a Uliuli* Kokona u matangwasarakinia kwara u vai i God mo lagwa.

I Evol u hauhuri lui God, vae huri hi mo bete na hilehile katukwale lakwae u karea haburu, u sileti na hilehile noi Ken. I Evol u hauhuri lui God, vae huri hi i God u kalukinia mo viti kwara aia a tangaloi bakoto, vae i God u lagwa mo lavi na nona hilehile. A tangaloi aia hi u mate ba, vae huri na nona hauhuriana u kwahakwaha maikita radu nga.

I Sera u hauhuri lui God, vae huri hi, venaha diko u ngwarasea ba tina bava natu, vae u hago natu. U hago natu huri u hauhuri lui God kwara ne kwiribibi na nona tulikileo.

I Evraham u vai kwehi, huri u hugu tara kwara ne vano vaki lo gwatuivanua hinea i God mo vai na dumuki mo tabea, vae a gwatuivanua hi ne tu vaki tuai huri a tanovi hi u madi.

I Mosis u hauhuri lui God, vae huri hi lolona mo ngwarasea hake, he tiraki na tangaloi tea kwara rana kwarekinia kwara aia a natu na vavine hi, i natu i Vero a hugwe lakua. Vae u lengaia kwara ne bulu mana tangaloi noi God kwara ne rongo hati haragoki maira. U bena vohoki kwara ne lagwalagwa lo hala na hatiki, venaha diko te lo taro gwanugwanu, aia vae he lengaia te vohoki. Aia hokinia hinea mo viti kwara rana mana kinia huri i Vurae* hini i God neri horae, vae aia nehe domi huri tea, U rongo karea lo kinau aira vano hi siletia hi mo rongo karea lo tokaana karekarea lo vanua Isiv. U rongo hokinia hi huri u domidomi lo kaitakwe hinea i God neri betea lakwae. I Mosis u hauhuri lui God, vae huri hi mo ngwalua tina vanua Isiv, he mataku te kina hugwe lakua hinea mo lologutekinia. He mule te taliku, u lakao u lakao hokinia u tagai God hinea a tangaloi he taga lavia tea kina matana.

I Evraham u hauhuri lui God, vae huri hi kwahaia hi i God mo kahi haro na domina, i Evraham u rarai kwara ne kwohi matei natuna i Aesik, ne hilea lakwai God hoki na kairoroi*. I Evraham aia hi hinea i God mo tuliki na leona lakwae, vae u rarai kwara ne kwohi matei natuna hi a natu kwakehe, ne hilea lakwai God hoki na kairoroi.

I Rehav, aia a vavine tu huri hala, u hauhuri lui God, vae huri hi he mate tea mana tangaloi hinea rahe rongohuri God tea. A gwaloana noi Isrel rahe kwohi mateia tea huri tomua, lolona a gwaloana noi Isrel kairua raru mo vano vaki Seriko kwara rana tagataga takwa-hi, vae aia u lai tabetabekirarua.

A gwaloana noi Isrel rau hauhuri lui God, vae huri hi ramo kauutu lavi na tahi hinea a hinaki a Tahi Memea, hinea mo mulemai hoki na tano mamaha bakotoki. Vae kwahaia hi a ngwera Isiv ramote vai kwara rana kauutu hokinira, a tahi mo lolovaki taliku mo lulu korokorora ramo vidonoki.

A gwaloana noi Isrel rau hauhuri lui God, vae huri hi kwahaia hi ramo lakao dali na kaititiba na gwatuivanua Seriko a rani kaibitu mo rovo, a kaititiba hi mo sovi.

Vake u hauhuri lui God, vae huri hi mo tau na hala na Kanikani* na Tivekiana tomua halaradu lakwa na gwaloana noi Isrel. Mo tau na leo lakwara kwara rana bahiki na dai na sivsivi* kelekele lo beru na matakihala na ingwaga. Rau vai kwehi kwara a kaihora tina taetae na vai mate tangaloi, vae nehe vai matematei raranatuga tea hinea a raranatu ngwera rau vora tomua halaradu.

I Sosev u hauhuri lui God, vae huri hi mo garagarani kwara ne mate, mo viti huri na taroki hini kwara vae a gwaloana noi Isrel* rana ngwalua tina vanua Isiv. Vunu mo tuliki terekaki lakwara kwara rana vai kworohokinia mana huina.

I Sekov u hauhuri lui God, vae huri hi mo garagarani kwara ne mate, mo tau na tangaroa karea lui raranatu i Sosev kairua vatavatahakirarua. Mo titiori lo nona kaitiko mo kaluhaki God kina domi mavakiana.

I Aesik u hauhuri lui God, vae huri hi mo tau na tangaroa karea lui Sekov mai Iso kwara vae a kinau karea ranari vanamai lugaru.