GALESIA 1
1
I Pol u kwaha tabetabe mana ngwera Galesia
1-2I nau i Pol, nu uli na leo hika lakwakamu hi a kwarelua* noi Jisas lo gwatugwatui-vanua Galesia. I nau a kaihora* kokona, vae hete tangaloi kwara u kwareau, vunu vake hete tangaloi kwara u rivukiau. I Jisas Kraes* mai God a Tamaki, aia hi mo rakati Jisas tina mateana, i rarua raru rivukiau. A ratua savia lo vanua hike rau bulu maiau keu bete a nomai lagwaana lakwakamu. #Gal 1.11-12; Bol 20.24
3A tangaroa karea hika lakwakamu. I God i Tamada, mai Jisas Kraes a noda Hugwe, raru ne hago maikamu kina nogaru domi tabetabe lakua, vake raru ne bete na magemuana ne eno maikamu. #Rom 1.7; Vil 1.2; Vlm 3
4I Kraes u tirakinia sibona mo mate huri na noda vaivai hati kwara ne teri na hatiana na varamana hika tikita. Mo mate hokinia hi u taritarisa lo domikiana noi God i Tamada. #Gal 2.20; 1 Tim 2.6; Taet 2.14; 1 Sione 5.19 5Ta tabe hakeki na hina i God vaki tuai, a gwereki tikei. Amen*.
A leo dolua hi tulu mo rongoa aia hete Roro Karea noi Jisas Kraes
6Nu idila haburu kikamu. I God u kwarekamu kina domi tabetabe lakua noi Kraes*, vunu he tuai tea vohoki, tulu mo maraka tulu mo kwalao ti God. Vunu hika tulu mote kwiribibi na leo dolua vake hi kwara aia hoki na Roro Karea. 7Vae a roro karea dolua tikei vake, huri a Roro Karea katukwale vohoki. Nu viti kwehi huri a tangaloi ratuaki rau tuku sinasinakamu, rau lengaia kwara rana bohiki na Roro Karea noi Kraes ne mulemai kina leo dolua. #a Bol 15.24; b Bol 15.1 8Kwara vae diko i kami, diko te kaihora tina taetae, diko te hava tangaloi tea, ne heretuvaki na roro karea dolua tiua hi kemo heretuvakinia ba, u taritarisa kwara a tangaloi aia hi ne kwali na kakadiki lolo kabu huri. #1 Kor 16.22 9Keu vitia tuai, vae hika nu vitia taliku. Diko te tangaloi ne heretuvaki na roro karea lakwakamu u dolua tiua hi tulu lavia ba, u taritarisa kwara ne kwali na kakadiki lolo kabu huri.
10?I kamu tulu domi kwara nu lengaia kwara a tangaloi rana lagwa maiau? !Hetea! I nau nu lengaia kwara i God ne lagwa maiau ?Tulu domi kwara i nau nu vai kwara a tangaloi kehekeheki rana lagwa mana nogu bolokiana? Kwara vae diko nu vai kwehi, i nau hete tangaloi boloki bakoto noi Kraes. #1 Tes 2.4
I Pol u viti huri kwara u mulemai kworohokinia kina kaihora kokona
11Rabela. U karea kwara na matangwasaraki lakwakamu kwara a Roro Karea hi nomo toko heretuvakinia, he vanamai tea tina tangaloi. 12I nau nohe lavia tea tina tangaloi, vake a tangaloi he huhuiau te kinia. Vae i Jisas Kraes* sibona aia u vosangiau kinia. #Gal 1.1
13Tulu rongo na doridorigu ba, kwara tomua lolona nomo huri na huhuiana nona gwaloana noi Isrel* radu nga, nomo toko vai bulakiki na kwarelua noi God haburu vohoki. Tigwaravu nomo toko vai kwara na magaraki na kwarelua* vano hi. #Bol 8.3; 22.4-5; 26.9-11 14A doridorigu lo hala na huhuiana nona gwaloana noi Isrel, u sileti na gwaloana noi Isrel rusa aira hi a nogu tataulu, huri nu huira kwara na kwiribibi na huhuiana mana doridori i ratubugu kwara ne madi. #Bol 22.3
15Vae i God u mataiau ba, i nau lolo tirae i retahigu radu nga. Lo nona domi tabetabe lakua mo kwareau kwara na mulemai kina bulana tangaloi, vunu u lagwa #Aes 49.1; Jer 1.5; Rom 1.1 16mo vosangi Natuna lakweau, kwara na matangwasarakinia lakwa na tangaloi tavalavarea tina gwaloana noi Isrel. Vae lo taro hi nahe soro te kikikila tina tangaloi, #Bol 9.3-6; 22.6-10; 26.13-18; Gal 2.7 17vake nohe galo hake tea vaki Serusalem kwara na tagai na tangaloi aira hi rau kwareki a kaihora* kokona tomuakiau. Vae nu hena nu vano vaki Arevia, vunu nomori mulemai vaki Damaskes. 18A hukao kaitolu koro, vunu nomori galo hake vake Serusalem kwara na rongo te leo ti Pita, nu hugu maia a rani hangavulu dongwana kailima. #Bol 9.26 19Nohe tagai na kaihora kokona te vano hi ratuaki, kehekeheki i Semis hi i tua i Jisas, a noda Hugwe.
20I God aia a nogu hagoleo, a havakinau hi nomo uli lakwakamu u kareaki, hete kurakura luna. #Bol 9.30
21Vunu nomo vano vaki lolo vanua Siria mana vanua Silisia. 22A kwarelua noi Kraes lolo gwatugwatui-vanua Sutia rahe tagaiau te radu nga. 23Ramo rongo na rorogu kehekeheki kwara, “A tangaloi hini tomua mo toko vai bulakikikita, mo vai kwara ne vai suri na noda hauhuriana, vae hika u tuku heretuvaki na hauhuriana hi.” 24Vunu aira ramori kaluhaki God huriau.
Currently Selected:
GALESIA 1: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
