EVESAS 1
1
I Pol u kwaha tabetabe mana ngwera Evesas
1I nau i Pol hinea lo domikiana noi God mo rivukiau kwara na kwareki a kaihora* kokona noi Jisas Kraes. Nu uli na leta hika lakwakamu lo gwatuivanua lakua Evesas hinea tulu karohuri lo nomiu tokaana lui Jisas Kraes*, tulu hariki luna vae i kamu a tangaloi kokona noi God. #1.1: Lo duviki na ves hi kairuaki, a Buku Kokona tuaki hinea a tangaloi rau ulira tuai rau viti hikwe kwara, Nu uli na leta hika lakwakamu hinea tulu karohuri lo nomiu tokaana lui Jisas Kraes, tulu hariki luna vae i kamu a tangaloi kokona noi God. #1 Kor 1.1; Kol 1.1
2A tangaroa karea hika lakwakamu. I God i Tamada mai Jisas Kraes a noda Hugwe* raru ne hago maikamu kina nogaru domi tabetabe lakua, vake raru ne bete na magemuana ne eno maikamu.
I God u vai tabetabekikita huri tau hariki lui Kraes
3Tana lagwaki God hinea a God a Tama na noda Hugwe* i Jisas Kraes* huri u vai tabetabekikita haburu hinea tau hariki lui Jisas Kraes. Mo bete lakwakita vataha na karekarea rusa huri na tanungweda hinea u taritarisa kwara tana lai lo noda tokaana maia lo taetae. #Eves 2.6 4Tuai lolona i God he tau na varamana te radu, mo mataikita ba kwara tana kwareki a nona, lalahi na noda harikiana lui Kraes. I God u lengaia kwara tana kwareki a bulana tangaloi kokona, tana tu koro na nakona a hatiki tikei luda, tana lagwalagwa maikita. #a Sione 15.16; 17.24; 2 Tes 2.13; b Eves 5.27; Kol 1.22 5Tuai u matai terekakikita ba kwara vae lalahi Jisas Kraes ne tabuikita tana mulemai ki raranatuna vohoki. #1.4-5: Lo hala kairuaki a domidomi na leo hi lo duviki kairuaki lo ves 4 vaki lo duviki tomuaki lo ves 5 aia hokinia hika kwara, I God u lengaia kwara tana kwareki a bulana tangaloi kokona tana tu koro na nakona a hatiki tikei luda. I God u lagwa maikita, 5 vae huri hi u matai terekakikita tuai ba kwara vae lalahi Jisas Kraes ne tabuikita tana mulemai ki raranatuna vohoki. Hikani a domidomi i God sibona vae aia u lagwa kwara ne vai kwehi. #Sione 1.12 6I God u betekita kina hilehile hinea u lakua haburu lalahi i Natuna a Natu tabe. U betea vuroki lakwakita, vae huri hi u taritarisa vohoki kwara tana tabe hakeki na hinana, tana kaluhakinia tigwaravu huri na nona domi tabetabe lakua hinea u karea haburu. #Mat 3.17; Kol 1.13
7I Kraes mo mate a daina mo huki, vae huri hi i God mo kasatukuhikita tina noda vaivai hati mo domidomi koro lakwakita hinea tau hariki lui Kraes. A hava na domi tabetabe lakua noi God #a Kol 1.14,20; b Eves 2.7 8-9mo betea lakwakita hinea tanahe dumu lavia tea, u seleka vohoki.
I God u vai a havakinau hi u domikinia lo nona kikikila mana nona lolorani savia, mo matangwasaraki lakwakita a nona domidomi tavuniki hinea u domiki terekakinia ba kwara ne rovo tabetabeki ki Kraes. #Rom 16.25; Eves 3.3,9 10A domidomi hi noi God hinea ne rovo tabetabeki lo tarona bakotoki aia hika kwara i God ne lai tabulutaki savi na kinau hinea mo taura, vunuhi na kinau lolo taetae, maira hi lo varamana, vae i Kraes ne kwareki a gwatuki. #a Gal 4.4; b Kol 1.16,20
11Lolona i God mo vai na domidomi hi, u mataikami a gwaloana noi Isrel* u rovo ba, kwara kena kwareki a bulana tangaloi huri keu hariki lui Kraes. U tuku vai savi na kinau lo nona domidomi sibona hokinia u lengaia. Vae u vai kwehi lakwakami huri na nona domidomi hinea u domikinia ba tina tinatinakakiki. #Rom 8.28-29 12I kami keu tau na nomai domidomi tilui Kraes tomua halaradu, vae huri hi u taritarisa kwara kena tabe hakeki na hina i God kena kaluhakinia tigwaravu huri aia u hahaburuka.
13Vunu i kamu vake a tangaloi tavalavarea tina gwaloana noi Isrel, i God u mataikamu vake kwara tulu ne kwareki a bulana tangaloi huri tulu hariki lui Kraes. Lolona tulu mo rongo na vitikareaki na Roro Karea hinea tulu mo ahi kinia, vae tulu mo hauhuri lui Kraes. Vunu i God mo tau na nona kaimatai lumiu mo betekamu kina Tanungwe Kokona hinea mo tulikinia ba, vae lo hala hi mo matangwasarakinia kwara i kamu a bulana tangaloi. #a Kol 1.5; b Eves 4.30 14A Tanungwe Kokona hini aia a kaimatai na kinau savia hinea i God u tulikinia ba lakwa na bulana tangaloi kwara tana lai lo taroki. A Tanungwe hi u vosangi kwara i God u volitukuhikita ba kwara tana kwareki a nona, vae ne vaikita tana materi vohoki. Vae u taritarisa kwara tana tabe hakeki na hina i God tana kaluhakinia tigwaravu huri aia u hahaburuka.
A tiutangaroa noi Pol
15-16Huri na kinau vano hini, nu domihagwekamu tigwaravu lo nogu tiutangaroa, nu tuku lagwaki God hurikamu. Nu tinakaki lo taro hinea nomo rongo na roro na nomiu hauhuriana lui Jisas a noda Hugwe* mana nomiu lagwaana huri na tangaloi noi God savira, vae nu tuku tiutangaroa kwehi tarisaki hika. #a Kol 1.3; 1 Tes 1.2; b Kol 1.4 17Nomo uduhuri ki God hinea a God na noda Hugwe i Jisas Kraes* vake aia a Tamaki hinea u hahaburuka, kwara ne bete na nona Tanungwe lakwakamu. A Tanungwe hi ne betekamu kina lolorani, ne matangwasaraki God lakwakamu kwara tulu ne kikilaia. #a Kol 1.9-10; b Aes 11.2 18I God u kwarekamu ba u vai rarai na kinau rusa hurikamu. Vae nu uduhuri kinia kwara ne takahi na domimiu kwara tulu ne kikilai na kinau aira vano hi, kwara tulu ne tau na domimiu ne madi luga. Nu uduhuri kinia kwara ne hago maikamu tulu ne kikilai na nona vaitabetabe hinea rau seleka vohoki, hinea u tulikinira ba lakwa na bulana tangaloi. #a Eves 4.4; b Kol 1.12 19Vake nu uduhuri kinia kwara ne hago maikamu, tulu ne kikilai na nona huirana hinea u lakua haburu, mo toko boloki luda hinea tau hauhuri. A huirana hi, hinea u seleka vohoki, #2 Kor 13.4; Kol 2.12 20aia hi i God mo rakati Kraes kinia mo maraka tina mateana, mo taua mo hugu tavaluki maia lo matuana lolo taetae. #Sam 110.1; Mat 22.44; Mak 16.19; Bol 2.34; Hib 1.3; 8.1; 10.12; 12.2 21A hina i Kraes u aulu karakara sileti na hina na kaihora lolo taetae savira hinea rau lalakua, aira hi a kavman, maira hi a noga huirana eia, mana hugwe savira lolo taetae, vae u hugwe korora savira. A hinana u aulu karakara sileti na hina na tangaloi doluakinira hinea a noga huirana eia lolo varamana hika, maira hi lolo varamana karagwa hinea ne vanamai. #Kol 1.16; 2.10 22I God u tau na kinau savia ba tavuti na huirana noi Kraes. Vae mo rivukia kwara ne kwareki a gwatu na kwarelua, mo hugwe koro na mamaurianaga savia. #a Sam 8.6; b Eves 4.15; Kol 1.18 23A kwarelua* aia a tarabehi i Kraes, vae i Kraes u kukwere u taritarisa kinia, vunu i Kraes u vakakukwere na kinau savia hinea i God u taura. #1.23: Lo hala kairuaki a domianaki na leo hi aia hokinia hika kwara, A kwarelua aia a tarabehi i Kraes, u kukwere ki Kraes, vae lo mamauriana noi Kraes, aia u kukwere vohoki ki God. #Rom 12.5; 1 Kor 12.27; Kol 1.18 #Eves 4.10; Kol 1.19
Currently Selected:
EVESAS 1: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
