KOLOSI 1

I Pol mai Timoti raru kwaha tabetabe mana ngwera Kolosi

1I nau i Pol hinea lo domikiana noi God mo rivukiau kwara na kwareki a kaihora* kokona noi Jisas Kraes*. I kamirua mai tuada i Timoti #1 Kor 1.1; Eves 1.1 2keru uli na leta hika lakwakamu a tangaloi noi God lo gwatuivanua Kolosi. I kamu hi tulu hariki lui Jisas Kraes vae i kamu i ratuamaru, tulu karohuri lo nomiu hauhuriana.

A tangaroa karea hika lakwakamu. I God i Tamada ne hago maikamu kina nona domi tabetabe lakua, vake ne bete na magemuana ne eno maikamu.

I Pol u lagwaki God hurira

3I kamirua tigwaravu keru tiutangaroa hurikamu, keru mo lagwaki God a Tama na noda Hugwe* i Jisas Kraes*, #Eves 1.16; 1 Tes 1.2 4huri keru rongo kwara tulu hauhuri lui Jisas Kraes, vunu vake kwara tulu lagwa mana tangaloi noi God savia. #Eves 1.15 5Tulu tuku vai kwehi huri tulu tau na nomiu domidomi u madi lo nomiu kinau hinea i God u tau rarai hurikamu ba lolo taetae. A kinau vano hi tulu rongo na roroki tuai lolona hinea tulu mo rongo na leo na vitikareaki na Roro Karea noi Kraes tomua halaradu. #a 1 Pita 1.4; b Eves 1.13 6A Roro Karea hi u maravuti maikamu ba, vae u tuku matala lo varamana doluaki, u lavi na karekarea lakwa na tangaloi savia. A Roro Karea hi u vai kwehi lakwakamu vake, u tinakaki tuai lolona hi tulu mo rongo kwara i God a nona domi tabetabe u lakua kwara ne hago maikamu, vae tulu mo kikilai matangwasarakinia. #a 1 Tim 3.16; b Rom 1.13 7Tulu huhui na kinau hi ti Evavras hinea u boloki haragoki maikamirua, vae keru lagwa haburu maia. Aia a tangaloi boloki noi Kraes hinea u karohuri lo bolokiana hi, vae u lai tanotanomaru. #Kol 4.12 8U viti lakwakamirua kwara tulu hariki lo Tanungwe Kokona, vae a Tanungwe hi mo vaikamu tulu mo lagwa haburu mai God mana tangaloi.

9Vae huri hi, keru tiutangaroa hurikamu tigwaravu, u tinakaki lo taro hi keru mo rongo na roromiu tomua halaradu. Keru uduhuri ki God kwara a Tanungwe Kokona ne betekamu kina lolorani na kikikila mana domidomi sea kwara i kamu tulu ne kikilai ne karea a havakinau hinea i God u lengaia. #a Eves 1.15-17; Vil 1.9; b Eves 1.9; 5.17 10Vunu tulu ne toka hokinia a noda Hugwe u lengaia, vae tigwaravu tulu ne vai a havakinau hinea u lagwa luna. Vunu a kwaimiu ne eia lo mamaurianamiu, tulu ne vai a boloki rau karekarea, vae tulu ne ngwarasea hake lo nomiu tokaana ngwasara, tulu ne kikilai God vakevake. #a Eves 4.1; Vil 1.27; b Eves 2.10 11Keru lengaia kwara i God ne vaikamu tulu ne huira kina nona huirana na taetae hinea u lakua haburu. Vae a domimiu ne bua ne hatu sovi lo taro na rongoana hati, vae tulu ne tu ne madi, ne havutikamu. #Eves 1.19; 3.16 12Vunu tulu ne lagwaki Tamada hinea mo vaikita tamo taritarisa kwara tana bulu mana bulana tangaloi doluaki. Vae tulu ne vai lai tulu ne lavi na kinau vano hi mo tau rarai huri na bulana tangaloi kokona lolo taetae lo vanua hinea u vavarama tigwaravu. #Eves 1.18 13Aia u lavikita tina huirana na dodoki, mo tau tabetabekikita lo huirana noi Natuna hinea u lagwa maia haburu. Vae hikani tau kware i Natuna ki noda Hugwe Lakua. #a Luk 22.53; Eves 2.2; 6.12; b Mat 3.17; Eves 1.6 14Lalahia i God mo kasatukuhikita tina hatiki, mo domidomi koro na noda vaivai hati rusa. #Eves 1.7

I Kraes aia a gwataki na kinau savia hinea i God mo taura

15I Kraes* hi, tamo tagaia,

aia hoki na nunu i God,

vae i God tahe taga lavia tea.

Aia a natu ngwera

u vora tomua halaradu,

u aulu sileti na kinau savia

hinea i God mo taura, #a 2 Kor 4.4; Hib 1.3; b Sione 1.18; 1 Tim 6.16

16huri lalahia

i God mo tau na kinau savia,

a kinau lolo taetae,

maira hi lolo varamana,

a kinau hinea tau tagaira ki matada,

mana kinau hinea tahe tagaira tea.

I God u lalahia

lolona mo tau na kinau savia

maira hinea a noga huirana eia,

a hugwe lalakua

mana hugwe ratuaki,

a noga kaitomuaki

mana noga kaituruki.

I God u lalahia

mo tau na kinau savia

lo varamana hi,

mo tau savi na kinau vano hi,

a noi Kraes kehekeheki. #Sione 1.3,10

17Tuai lolona a kinau tikei radu nga,

vae i Kraes aia eia ba.

Vae a kinau savia rau hariki luna

kwara rana eno lo tanotanoga. #Sione 1.1; 8.58

18I Kraes u kwareki

a gwatu na tarabehi,

a tarabehi hi a kwarelua*.

Aia a gwataki na kwarelua,

vae a kwarelua hi u vanamai tiua.

Aia vake hinea u maraka tina mateana tomua halaradu,

kwara vae aia kehekeheki

ne tu tomua lo kinau savia. #a Eves 1.22-23; 4.15; 5.23; b Bol 4.2; 26.23; Rev 1.5

19I Kraes ne tu tomua hokinia hi,

huri a domi i God sibona

kwara vae i Natuna hi

ne taritarisa maia vohoki lo kinau savia. #Sione 1.16; Eves 1.23; Kol 2.9

20Hokinia lalahi i Natuna

mo reve savi na kinau

ramo mulemai vaki maia taliku.

I God mo vai na magemuana

lalahi na mateana noi Natuna

huri a daina mo huki

lo bala tangwata.

Vae hikani mo reve vunuhi na kinau

vaki maia sibona,

aira hi lolo varamana

maira hi lolo taetae. #a Eves 1.7; 2.16; 1 Sione 2.2; b Rom 5.1; Eves 2.13; d Eves 1.10

I Jisas u betekita kina magemuana

21Vakatukwale i kamu tulu vakahao ti God vohoki, i kamu a nona tavaluivuro lo kinau hinea rau hati tulu mo vai, maira hinea tulu mo domiki. #Rom 5.10; Eves 2.12; 4.18 22Vae hikani huri i Kraes* mo mulemai hoki na tangaloi na varamana, vae mo mate, i God mo vaikamu tulu mo kwareki a nona buluana taliku lalahi na mateana noi Natuna. Mo vai hokinia hi kwara vae ne lavikamu tulu ne tu lo nakona vae i kamu tulu ne kokona, tulu ne ngwasara lo nakona, a hatiki ne tikei lumiu. #a Eves 2.14,16; b Eves 5.27 23Vae i kamu tulu ne karohuri tulu ne hauhuri lui Kraes hinea aia a gwatakiki, u tu madi he kilukilu tea. Lolona hinea tulu mo rongo na Roro Karea, tulu mo tau na nomiu domidomi u madi luna. Vae tulu hatu tirakinia. A Roro Karea hi, rau talahakinia laliki lakwa na tangaloi na varamana doluaki, vae i nau i Pol nu kwareki a tangaloi boloki na Roro Karea hi. #a Hib 3.14; b Eves 3.17; d Mak 16.15; 1 Tim 3.16

A bolokiana noi Pol lakwa na kwarelua

24Hikani nu tuku rongo hati lo tarabehigu, vae nu lagwa, huri aia hi vae ne hago maikamu. I Kraes* mo rongo hati lo tarabehina kwara ne vai na nona bolokiana. Vae lo hala hokinia hi, i nau vake nu rongo hati lo tarabehigu kwara na vakakukwere na boloki hinea u eno radu nga. A bolokiki aia hi, kwara a kwarelua hinea a tarabehi i Kraes, ne huira. #Eves 3.13 25Lo taro hinea i God mo tau na bolokiana tilo kabagu kwara na vai, mo vaiau nomo kwareki a tangaloi boloki na kwarelua kwara na hago maikamu. A nogu bolokiana aia hika kwara na viti matangwasaraki na leona kwara ne karea. #Eves 3.2,7-8 26A leo hi, i God u tavunikinia tina tangaloi vunuhira tuai vohoki, a hukao u rusa rau vano ba. Vae hikani u matangwasarakinia lakwa na bulana tangaloi. #Rom 16.25-26; Eves 3.3,5,9-10 27I God a nona domidomi kwara ne vosangi lakwa na bulana tangaloi kwara a leo hi u kukwere kina kinau karekarea na mauriana noi God, vae u lengaia kwara ne matangwasarakinia lakwa na tangaloi tavalavarea tina gwaloana noi Isrel* savia. A leo tavunikiana hi aia hika, kwara i Kraes u toka lumiu, vae huri hi tulu ne hauhuri lai kwara tulu ne lavi na ahiana karea noi God lolo taetae. #a Rom 16.25; Eves 3.9; b Eves 1.18; d 1 Tim 1.1 28Hikani keu matangwasaraki i Kraes lakwa na tangaloi. Keu kwahabibira keu huhuira kina kikikila savia kwara kena vaira rana mulemai hoki na tangaloi hinea rau ngwarasea madi, a domidomiga u sea lo hala noi Kraes. #Eves 4.13 29Nu boloki kareakiau kina huirana lakua hinea i Kraes mo beteau kinia, mo boloki lalahiau kwara na vai na bolokiana hi. #Eves 3.7,20; Vil 4.13

Currently Selected:

KOLOSI 1: HWT

Highlight

Copy

Compare