A Bolokiana 17

I Pol mai Saelas raru vano vaki Tesalonaeka

1Hikani i Pol mai Saelas raru mo vano lalahi na gwatuivanua lalakua Amvivolis maia Avolonia, vunu raru mo maravuti lo gwatuivanua lakua Tesalonaeka, hinea a vale* na tiutangaroa nona gwaloana noi Isrel* eia. #1 Tes 2.1-2 2I Pol mo vano tilolo vale na tiutangaroa hokinia a doridorina kwehi tigwaravu. U hugu a kwiki kaitolu lo gwatuivanua hi, vae lo Rani* na Mabuana kaitolu hi i Pol mana tangaloi rusa ramo toko vikwahaki lo Uliuli* Kokona. #Luk 4.16; Bol 9.20; 17.10,17 3Mo matangwasaraki lakwara kwara a Uliuli Kokona u viti ba kwara i Vurae* ne rongo hati lo tarabehina, ne mate, vunu ne maraka taliku. I Pol mo viti “I Jisas aia hi nomo matangwasarakinia lakwakamu, aia hi i Vurae.” #Luk 24.26; Bol 3.18; b Luk 24.46; d Bol 9.22; 18.5,28 4Tuaki tiura ramo rongo na leo i Pol ramo kikilai utuhakinia kwara a leona u kareaki, vae ramo buluirarua mai Saelas. A ngwera Gris rusa hinea rau domi mavaki i God, mana ravavine rusa hinea aira a kaitomuaki nona ravavine, aira vake ramo buluirarua. #Bol 13.50; 17.12

5Vae a gwaloana noi Isrel ramo tagaia kwara a tangaloi u rusa ramo bulu mai Pol mai Saelas, mo kadira. Ramo lai tabulutaki na tangaloi mahao vuroki tina hala lalakua, ramo vai na bulubulu hati katukwale huri na kinau hi. Ramo vai na tangaloi na gwatuivanua hi doluaki mo tuturihake kinira kina leo na lologute, ramo gae na katama na ingwa i Seson, rau soro haro i Pol mai Saelas kwara rana lavirarua tivarea lakwa na tangaloi lalakua na gwatuivanua hi. #1 Tes 2.14 6Vae lolona rahe hagwerarua tea, ramo reve i Seson mana rabela tuaki vaki mana kaitagahuri rusa na gwatuivanua, ramo kwaha karakara ramo viti “A tangaloi vano hika, i Pol mai Saelas, raru vai na kinau hati vataha na mahagweki. Hikani raru vanamai vaki lo vanuada, #Bol 14.19 7vae i Seson u lavirarua vaki tatana. I rarua raru galo lo tangwata nona hugwe lakua i Sisa*, raru mo viti kwara a Hugwe Lakua dolua eia, a hinana i Jisas.” #a Luk 23.2; b Sione 19.12 8Kina leo aira vano hikani ramo vai na vao mana tangaloi lalakua na gwatuivanua ramo viroro haburu. 9A kaitagahuri na gwatuivanua ramo vai i Seson maira ratuaki ramo bete a mane* lakwara hokinia a kaitagahuri vano hi ramo lengaia. Hi u vosangi kwara i Seson maira rana hugu butu. Vunu a kaitagahuri vano hi ramo tirakinira ramo mule.

I Pol mai Saelas raru vano vaki Berea

10Mo bongi mo madi a rabela ramo hokaki i Pol mai Saelas vaki lo gwatuivanua Berea. Raru mo maravuti raru mo vano vaki lolo vale* na tiutangaroa nona gwaloana noi Isrel*. 11A tangaloi takwahini a domiga u matakahi sileti na domi na tangaloi lo gwatuivanua Tesalonaeka. Rau lengaia haburu kwara rana rongo na leogaru, vae vataha na rani rau kweruki tabetabeki na Uliuli* Kokona kwara rana taga kwara i Pol u viti kareaki diko hetea. #Sione 5.39 12U rusa tiura rau hauhuri, a ravavinehi na tangaloi lalakua Gris mana ngwera rusa vake hinea aira a ngwera Gris rau hauhuri. #Bol 13.50; 17.4 13Vae lolona a gwaloana noi Isrel lo gwatuivanua Tesalonaeka ramo rongo kwara i Pol u heretuvaki na leo noi God lo gwatuivanua Berea vake, ramo vanamai vaki takwahini, ramo vai na tangaloi ramo rongo hati ramo lologute, ramo vai a bulubulu hati vovohi Pol mai Saelas. #Bol 14.19 14Heheriki a rabela ramo hora i Pol mana tangaloi ratuaki eia vake ramo vano vaki lo babaitahi. Vae i Saelas mai Timoti raru hugu Berea. 15A tangaloi aira hini ramo lavi Pol rau huria lo aga vaki lo gwatuivanua lakua Atens. Vunu ramo mule taliku vaki Berea mana tulikileo ti Pol kwara i Saelas mai Timoti raru ne vaivai heheri, raru ne bulu maia taliku.

I Pol u hugu Atens

16Hikani lolona i Pol mo hugu radu nga tara i Saelas mai Timoti lo gwatuivanua lakua Atens u rongo hati haburu, huri u tagai na vanua u kukwere vohoki kina turu goru. 17Vae hokinia lolo vale* na tiutangaroa u kwaha haburu mana gwaloana noi Isrel, vake mana tangaloi tavalavarea tina gwaloana noi Isrel*, aira hi rau domi mavaki i God. Vake u vano vaki na sara vataha na rani mo kwaha mana tangaloi hinea ramo toko vanamai vaki takwa-hi. #Bol 18.19 18Vae a ngwera Gris tuaki hinea aira a tangaloi huhui rau kikikila lo noga huhuiana na kikikila, rau vanamai ramo kwahakwaha maia. Tuaki ramo viti kwara, “?A tangaloi hika he kikikila tea u vai kwara ne viti aha?”

Vunu tuaki ramo viti kwara, “I kami keu rongo hokinia kwara u tuku viti huri na takaro na vanua dolua.” Rau viti hokinia huri i Pol u tuku heretuvaki i Jisas mana nona marakaana taliku. #17.18: Lo leo nona ngwera Gris, a leo hi “Marakaana” rau rongo hokinia kwara a hina na takaro hinea a vavine. 19Hokinia ramo kware i Pol, ramo lavia vaki mana tangaloi tovotovo maira hinea rau tuku bulu tabulutaki lo vuti Areovagus*. A tangaloi tovotovo vano hi ramo viti “Keu lengaia kwara kena kikilai na huhuiana karagwa hika komo toko kwahakwaha luna. 20A kinau ratuaki kemo rongo komo viti, rau dolua lakwakami. Keu lengaia kwara kena kikilai na domiana na kinau hi komo vitia.” 21Rau viti kwehi huri hika a doridori na tangaloi savia lolo gwatuivanua Atens mana vanamaiana hini ramo toka takwahini, rau lagwa kwara rana mahuki noga taro savia huri kwara rana rongo a kinau karagwa rana vevehuri luna.

22Hikani i Pol mo tu lo nako na tangaloi tovotovo vano hi mo viti “Ngwera Atens. Nu taga kwara lo doridorimiu i kamu tulu hauhuri lo takaro rusa, 23huri nomo lakao laliki lo gwatuivanuamiu lakua, nomo tagai na tanotano rusa hinea tulu mo toko sovi hivo eia kina domi mavakiana. Nu hagwe vake a voda #17.23: voda. Aira Kwalaha rau viti kwara, kwotakwota. a uliuli u eno luna u viti kwara, ‘Lakwa na takaro hinea tahe kikilaia tea.’ Io, tulu he kikilaia tea, vae tulu sovi hivo vovohia kina domi mavakiana. Vae hikani i nau na matangwasarakinia lakwakamu. 24A Takaro aia hi u tau na varamana mana kinau savia lolona. Aia a Hugwe* na taetae mana varamana, vae he toka tea lolo ingwa kokona hinea a tangaloi rau kihira kina kabaga. #a Sam 146.6; Aes 42.5; b Mat 11.25; d 1 King 8.27; Bol 7.48 25I kita a tangaloi tanahe boloki te maia kwara tana bete te kinau lakwae, huri he lengai na kinau tea. Vae aia sibona u bete na mauriana mana mabuki mana kinau savia lakwakita vunuhia. #a Sam 50.12; b Aes 42.5 26Tina tangaloi katukwale mo kihi savi na tangaloi a gwatuki u rusa lo varamana, mo taura ramo toka doluaki na varamana. Aia sibona u matai na taro ba tomuaki u taritarisa, mana ara na tanotano vano hini kwara rana toka eia. #Dut 32.8 27U vai hokinia hika kwara i kita vunu tana soro haroa, vae diko tana haka haroa tana hagwea. Vae kareaki i God he vakahao tea tikita katukwale kehe, #a Aes 55.6; b Sam 145.18; Jer 23.23 28hokinia a tangaloi katukwale mo viti kwara,

‘Tamo toka, tamo loliloli,

tamo vai vataha na kinau,

huri tau hariki lui God.’

Hoki na nomiu tangaloi na hivoki bolo ramo viti vake kwara,

‘I kita vake i raranatuna.’

29I kita i raranatuna, vae huri hi ta hatu domi kwara i God aia hoki na turu goru hinea a tangaloi rau kihia kina kol diko a silva diko a vatu. Aia hete kinau a tangaloi rau kihia kina kaba karea diko kina noga kikikila. #a Jen 1.27; b Aes 40.18-20; 44.10-17; Bol 19.26 30Tuai, lolona a tangaloi rahe kikilai tea, i God u taga lakau na doridori hi, vae hikani u viti lakwa na tangaloi savia vataha na mahagweki kwara rana halebohi tina noga hatiana. #Bol 14.16; 17.23 31Mo viti kwehi huri u matai na rani kwara ne kwaheki na doridori na tangaloi na varamana doluaki luna kina nona bakotoana lalahi na tangaloi hi mo mataia. U vosangi u rovo ba lakwa na tangaloi savia kwara ne vai kwehi, luna hi mo rakati na tangaloi hini tina mateana.” #a Sam 9.8; 96.13; 98.9; b Bol 10.42

32Lolona ramo rongo i Pol mo kwahakwaha huri na marakaana tina mateana, ratuaki tiura rau tuku vai ki beahi kinia. Vae tuaki rau viti “Keu lengaia kwara kona kwahakwaha luna taliku.” 33Vae hokinia i Pol mo tirakinira lo noga bulubulu mo vano. 34A tangaloi ratuaki ramo bulu maia ramo hauhuri. Katukwale tiura i Denis, aia a tangaloi tovotovo katukwale tiura hi rau bulu lo vuti hi Areovagus, vake a vavine a hinana i Damaris, mana tangaloi ratuaki vake.

Currently Selected:

A Bolokiana 17: HWT

Highlight

Copy