2 KORIN 8
8
A hilehile nona tangaloi noi Kraes
1Rabela. Keu lengaikamu kwara tulu ne kikilai tabetabeki na kwai na domi tabetabe lakua noi God hinea mo hago mana kwarelua* savira lo gwatugwatui-vanua Masetonia. #Rom 15.26 2Rau hagwe na rongoana hati u rusa, vae a rongoana hati vano hi rau kahi haro na domiga. Vae aira u havutira vohoki. Rau kakaravika haburu, vae a noga hahavutiana hi u vaira ramo bete hokoraki na noga hilehile kina lagwalagwa. 3Nu viti kareaki lakwakamu, rau bete hokinia rau vai lai kwara rana bete, vae rau bete siletia hi. Rau vai kwehi kina domiga siboga. 4Rau uduhuri kikami ramo seseaka kwara kena tirakinira kwara vae rana hago lai mana tangaloi noi God lo vanua Sutia, huri rau lengaia haburu kwara rana hago maira. #Bol 11.29; 2 Kor 9.1 5I kami kehe domi tea kwara vae rana vai lai rana bete ne lakua hokinia hi, vae rau vai kwehi. Vae tomuaki rau tirakinira siboga lakwa na noda Hugwe*, vunu vake ramo tirakinira siboga lakwakami, huri i God u lengaia hokinia hi.
6Vae huri Taetas mo tomuakikamu lolona hi tulu mo tinakaki na bolokiana aia hinea tulu mo lagwa luna kwara tulu ne vaia, kemo madimadi luna kwara ne boloki maikamu tarisaki a bolokiana na lagwaana hi ne rovo. 7Tulu lalakua haburu vataha na kinau, lo nomiu hauhuriana, lo nomiu kwahakwaha, lo nomiu kikikila. Tulu marumaru tulu mo hago maikami, vunu vake tulu lagwa haburu maikami. Vae huri hi keu lengaia vake kwara tulu ne bete ne lakua kina lagwalagwa lo bolokiana hi, hinea a bolokiana na lagwaana. #a 1 Kor 1.5; b 1 Kor 16.1-2
8I nau nahe rivuki na tangwata tea huri na kinau vano hi. Vae nu matangwasaraki lakwakamu kwara a tangaloi ratuaki rau huira kwara rana hago. Vae lo halaki hini nu kahi haro na domimiu kwara na kikilai kwara tulu lagwa kareaki mana tangaloi diko hetea. 9Tulu kikilai na domi tabetabe lakua na noda Hugwe i Jisas Kraes*. Aia a tangaloi hugwe, vae mo mulemai kina tangaloi kakaravi hurikamu. Mo mulemai kina tangaloi kakaravi, vae huri hi ne vaikamu tulu ne mulemai lai kina tangaloi hugwe. #Mat 8.20; Vil 2.6-7
10A nogu domidomi aia hika. U karea kwara hikani tulu ne vai rovonaki na bolokiana hinea tulu mo hago mana tangaloi rau kakaravika, hinea tulu mo tinakakinia lo hukao nakwaiha. Lo hukao nakwaiha i kamu tomuaki tulu mo vai na boloki hi. Hete kwara tulu vai kehekeheki, vae vake tulu lagwa luna ki tomuaki kwara tulu ne vaia. 11U karea kwara tulu ne vai vunuhi na bolokiana hi. Tulu ne marumaru kwara tulu ne vai vunuhia, hokinia tulu mo marumaru tulu mo tovokinia lo tinatinakakiki. Tulu ne bete a havakinau hinea a nomiu eia. 12Diko tulu marumaru kwara tulu ne bete, i God ne lai tabetabeki na nomiu hilehile tina kinau hinea a nomiu eia. Nehe domidomi tea lo kinau hinea a nomiu tikei. #Prov 3.27-28; Mak 12.43
13I nau nahe lengaia tea kwara na tau na hagohago mava lumiu, vunu kwara na vai ne mamarae lakwa na tangaloi ratuaki. Hetea. Nu lengaia kwara na vai ne taritarisa lakwa na tangaloi vunuhia. 14Lo taro hikani hinea a nomiu kinau u rusa, u taritarisa kwara vae tulu ne hago maira ratuaki hinea rau gwanugwanu lo kinau. Vae lo taroki i kamu tulu ne gwanugwanu lo kinau, vae a noga ne rusa, vae rana hago maikamu. Lo hala hokinia hini tulu ne hagohago maikamu ne taritarisa. #2 Kor 9.12 15Hokinia a Uliuli* Kokona u viti kwara,
“A tangaloi hinea u vano
u vile hinaka u rusa,
a kana he rusa te haburu.
Vae a tangaloi hinea u vile kelekele,
a kana he kelekele te haburu.” #Eks 16.18
I Taetas mai rabuluina
16I kami keu lagwaki God huri mo vai Taetas mo marumaru kwara ne hago maikamu, hokinia i kami vake keu marumaru huri kwara kena hago maikamu. 17I Taetas u rarai kwara ne vai na kinau vano hi kemo viti lakwae, vae silesiletia hi u havutia haburu kwara ne hago maikamu. Aia a domina sibona u lengaia kwara ne venatu vaki maikamu. 18Kena hora i tuada katukwale vake ne huria, aia hi a kwarelua savia rau domi mavakinia haburu huri na nona boloki hi mo heretuvaki na Roro Karea. 19Vunu vake a tangaloi hi, aia hinea a kwarelua doluaki ramo mataia, ramo rivukia kwara ne lakao haragoki maikami, kena kwali na hilehile hinea tulu mo betea kina domi lagwalagwa. A nomai boloki aia hi kwara lalahi na hilehile hi a tangaloi rana tabe hakeki na hina na noda Hugwe, vae kena vosangi kwara keu lengaia kwara kena hago mana tangaloi savia.
20Keu tagahuri u karea kwara a tangaloi rana hatu vitiviti hurikami lo halaki hinea kemo tagahuri na hilehile hinea a tangaloi ramo betea kina lagwaana. 21Keu lengaia kwara kena vai kinau rau bakoto rau karea, hete kehekeheki lo nako na noda Hugwe*, vae vake lo nako na tangaloi. #Prov 3.4
22Vae hokinia kena hora i belada dolua vake ne hurirarua. I belada aia hika keu kahi haro na domina vakarusa, vae keu hagwea kwara tigwaravu u marumaru huri kwara ne hagohago. Vae hikani u havutia haburu kwara ne hago mairarua, huri u hauhuri u madi lumiu. 23I kamu tulu kikilai Taetas ba. I kamirua keru tuku boloki haragoki keru mo hago maikamu. Vunu vake i rabelada hi kairua raru huria, raru vanamai lo hina na kwarelua vataha na mahagweki. Vake raru tuku tabe hakeki na hina i Kraes*. 24Tulu ne vosangi na nomiu lagwaana lakwara kwara a kwarelua doluaki rana kikilai kareaki kwara tulu lagwa maira. Vunu a kwarelua* rana kikilai kwara diko keu kwaha domidomikami maikamu, vae a leomai rau taritarisa vohoki. #2 Kor 7.14
Currently Selected:
2 KORIN 8: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
