2 KORIN 7
7
1Rabela karea. A tulikileo vano hi savia rau vaiana lakwakita. Vae huri hi ta vaikita tana ngwasara vunuhia. Ta tau letiuki na kinau savia hinea rau vai na tarabehida mana domida ramo hogora lo nako i God. Ta huirataki kwara tana ngwasara, tana kokona, i kita a tangaloi noi God kareaki, huri tau domi mavakinia.
I Pol u lagwa huri a ngwera Korin ramo bohiki na domiga
2Tulu domidomi ne karea lumai. Kehe vai na kinau te kwara u hati vovohi na tangaloi katukwale. Kehe vai hatihatiki na tangaloi te kwara te katukwale. Kehe sina na tangaloi te kwara kena balu tiura. #2 Kor 12.17 3Nu viti na leo hika, hete kwara nu viti tulu hati. Hokinia nu viti tomua ba, keu domi haburu hurikamu, vae huri hi venaha diko tau ahi diko tau mate, vae tau bulu tabulutaki tigwaravu. #2 Kor 6.11-12; Vil 1.7 4Nu hauhuri kareaki lumiu, vae nu domidomiau maikamu. Vae huri hi lolona a rongoana hati mo kihikami, i nau nahe mataku tea, a domigu u tu u madi radu nga, vae tigwaravu u havutiau, u havutiau haburu.
5Vae lolona kemo maravuti lo vanua Masetonia vake, kehe mabu te vohoki. A rongoana hati u kihikami vataha na mahagweki, a tangaloi rau viroro maikami, a domimai rau kwalao laliki. #Bol 20.1-2; 2 Kor 2.13 6Vae i God aia hi a kairaka na domi na tangaloi hinea a domiga rau sovi, hokinia mo lavi Taetas vanamai vaki maikami mo rakati na domimai. #Aes 49.13; 2 Kor 1.3-4 7Vae hete kehekeheki huri i Taetas mo vanamai mo havutikami. U havutikami vake, huri na nona leo mo viti lakwakami kwara tulu mo rakati na domina. Mo viti lakwakami kwara tulu lengaia haburu kwara tulu ne tagaiau, vake tulu hahakavi haburu. Vunu mo viti kwara tulu rarai kwara tulu ne suri na tangaloi hinea rau kwahakwaha hati vovohiau. Vae a kinau vano hi rau vaiau u havutiau vakevake.
8Diko a nogu leo hini tomua nomo ulia u vaikamu tulu mo hahakavi, vae i nau nahe rongo hati te nomo ulia. Vae lolona hinea nomo tagaia kwara a leo hi nomo ulia u vaikamu tulu mo hahakavi, hi kareaki nu hahakavi. Vae tulu he rongo hati te kwara ne tuai. #2 Kor 2.4 9Vae hikani i nau u havutiau, hete huri kwara nomo vaikamu tulu mo hahakavi, vae huri a nomiu hahakaviana u vaikamu tulu mo bohi tina hatiana. Kehe vai hatihatikikamu tea huri hinea lolona tulu mo rongo hati, vae tulu taga vovohi God. 10Diko a tangaloi u rongo hati vae u taga vovohi God, a tangaloi hi u bohi tina nona hatiana, vae lo hala hokinia hi i God u vakahikinia. Aia hi a kinau na hahavutiana, hete a kinau na hahakaviana. Vae diko a tangaloi u rongo hati, vae u taga vovohi na varamana kehekeheki aia lo hala na mateana. #Mat 27.3-5; Hib 12.17 11U karea kwara tulu ne domidomi luna hika. Tulu mo rongo hati, vunu tulu mo taga vovohi God, vae a doridori aia hi a kwaiki u rusa lumiu. Vae huri hi, tulu mo domidomi mo karea lo leogu, vunu tulu mo huira kwara tulu ne vosangi kwara i kamu a kinau tikei lumiu. Tulu mo lologutekinira hinea rau tuku vai kinau rahe karea tea, vae i kamu vake tulu mataku. A kinau aia hi u vaikamu tulu mo lengaiau, vake u vaikamu tulu mo huira kwara tulu ne huri i Kraes*. Vunu vake u vaikamu tulu mo rarai kwara tulu ne areki na tangaloi hinea rau vai kinau rahe bakoto tea. Tulu vosangi kwara i kamu a kinau tikei lumiu lo kinau aia hi.
12Kareaki i nau nu uli na leta hi tomua lakwakamu. Vae nohe ulia tea huri na tangaloi hinea u vai he bakoto tea. Vunu vake nohe ulia tea huri na tangaloi hinea a tangaloi hi mo vai he bakoto te vovohia. Vae nu ulia kwara ne matangwasara lakwakamu lo nako i God kwara tulu lagwa haburu maikami. 13Vae huri hini a leo noi Taetas mo rakati na domimai.
Kareaki a leo noi Taetas u rakati na domimai, vunu tiluna hi vake, u vaikami keu rongo karea haburu, huri i kamu vunu tulu mo rakati na domina mo rongo karea. 14Kareaki tomua nu kwaha maia ba hurikamu kwara nu domidomiau maikamu, vae tulu he vai suri na domigu tea. Tigwaravu keu viti kareaki lakwakamu. Vae lo halaki aia hini nga a nomai leo lakwai Taetas hinea kemo kwaha domidomikami maikamu, vae tulu vosangi kwara u kareaki. 15I Taetas u domihagwe kwara savikamu tulu rarai kwara tulu ne rongohuria, vake u domihagwe kwara tulu mataku, a huimiu mo toko ruru kinia, vae tulu lai tabetabekinia kina lagwalagwa vaki tatamiu. Vae lolona mo domidomi luna hi a nona lagwaana hurikamu mo toko huira vakevake. #2 Kor 2.9 16U havutiau haburu huri nu vai lai kwara na domidomi tilumiu hokinia hi.
Currently Selected:
2 KORIN 7: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
