1 TIMOTI 4
4
A tangaloi huhui kurakura
1A Tanungwe Kokona u viti u matangwasara lakwakita kwara lo taro hinea a varamana ne garagarani kwara ne rovo a tangaloi tuaki rana tiraki na noga hauhuriana lui God. Rana rongohuri na tanungwe hati hinea rau tuku kurakura kehe nga, rana huri na huhuiana nona tanungwe hati maira. #2 Tim 3.1; 2 Pita 3.3; 1 Sione 2.18; Sut 18 2A tangaloi kurakura hinea rau tuku sinasina na tangaloi rana talahaki na huhuiana vano hi. A tangaloi kurakura vano hi, i Setano* u matai na domiga kina nona kaimatai hoki na tangaloi rau tuku matai bulaga buluki kina aean ngwangwavi, vae huri hi a tangaloi vano hi rahe rongo lai te lo tarabehiga kwara rau vai na hatiki. 3A tangaloi vano hi rau huhui na tangaloi kwara rana hatu laki, rana hatu kani na hinaka ratuaki vake. Vae i God u tau na hinaka vano hi kwara savi na tangaloi hinea rau hauhuri luna, rau kikilai na vitikareaki ba, vae rana lai, rana lagwaki God huri, vunu rana kani. #a Jen 9.3; b Rom 14.6; 1 Kor 10.30-31 4Vatavataha na kinau hinea i God u tau rau karea. A kinau tikei hinea kwara a korokoro luna kwara tana hatu kani. A kinau savia, tana tiutangaroa tana lagwaki God huria, vunu tana lai tana kani, #Jen 1.31; Bol 10.15 5huri a leo noi God mana tiutangaroa hokinia hi rau vai savi na kinau ramo taritarisa lo nako i God.
A tangaloi boloki karea noi Jisas Kraes
6Diko ku tuku huhui i rabelada kina leo aira vano hi, i nigo kona kwareki a tangaloi boloki karea noi Jisas Kraes*. Kona vosangi kwara i nigo ku tuku huira kina leo na hauhuriana lui God mana leo na huhuiana karekarea hinea ku huria, hokinia kwara a leo vano hi aira a hinaka karea huri na tanungwemu. 7Ko hatu gwerongo huri na dekudekuni tuai hinea aira a leo reraka vohoki, vake rahe viti te huri God kwara ne karea. Kona vai rongo tigwaravu kwara kona vai na kinau hinea i God u lagwa luga. #1 Tim 1.4; 6.20; 2 Tim 2.16; Taet 1.14 8Diko ku kilukilu kwara a tarabehimu ne huira, hi u karea habete. Vae diko ku vai rongo tigwaravu kwara kona bohibohi hokinia i God u lengaia, aia hi u karea haburu lo hala savia. A tangaloi hinea u vai kwehi, a tulikileo u eno lakwae huri na tokaana hike lo varamana, vunu vake huri na tokaana hinea ne vanamai vaki takuni. #1 Tim 6.6 9A leo hi u viti kareaki hinea u taritarisa kwara tana lavia tana hauhuri luna tigwaravu. #1 Tim 1.15 10Tau tau na domida ba tilui God Tatoka hinea nehe mate lai tea. Aia a Kaivakahi nona tangaloi savia, vae silesiletia hi aia a noda Kaivakahi hinea tau hauhuri luna. Vae huri na kinau hi u rahakikita, tau boloki u madi lo nona bolokiana. #4.10: Lo duviki hi lo gweregwere na ves hi a Buku Kokona tuaki hinea a tangaloi rau ulira tuai rau viti hikwe kwara, Vae huri na kinau hi tau boloki u madi lo nona bolokiana, vunu vake a tangaloi rau tuku kwaha bulakikikita. #1 Tim 2.3-4
11Kona viti na leo vano hi lakwa na tangaloi, kona huhuira kwara rana vai luna. 12Ko hatu tiraki na tangaloi ramo taga bulakikinigo kwara komo ngwalagelo. Vae kona vosangi kwara ku bohibohi u taritarisa lo nako na tangaloi hauhuri lo hala na nomu leo mana doridorimu, lo hala na nomu lagwaana mana nomu hauhuriana, vunu vake lo mamaurianamu hinea u ngwasara tigwaravu, vae rana huri na tanoi-garumu. #Taet 2.15 13Kona vai na bolokiana hika tarisaki nana venatu vaki maiko. Kona valuki na Uliuli* Kokona lakwa na tangaloi, kona heretuva, kona huhuira kina vitikareaki, vae kona boloki luna tigwaravu. 14Lolona a tangaloi* duruduruki mo duruki na leo ti God lakwako, vake a ngwarasea* lo kwarelua* ramo tatagao lumu, i God mo beteko kina hilehile na huirana nona Tanungwe Kokona. Ko hatu tiraki na hilehile hi mo eno vuroki. #a 2 Tim 1.6; b Bol 6.6; 8.17; 1 Tim 5.22 15Kona toko vai na bolokiana vano hi, kona tau na domimu ne madi luga, kwara a tangaloi savia rana taga lai kwara ku tuku vano nga vakevake lo nomu bolokiana. 16Kona tagahuri ne karea kwara a bohibohianamu mana nomu huhuiana rana taritarisa. Tigwaravu kona vai na kinau aira vano hi. Diko kona vai kwehini kona vakahikinigo maira hinea rau tuku rongo na leomu.
Currently Selected:
1 TIMOTI 4: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
