1 TIMOTI 2
2
A hala na tiutangaroa lolo tanotano
1Tomuaki nu seseaka lumiu kwara tulu ne tiutangaroa huri na tangaloi savia. Tulu ne uduhuri ki God kwara ne bete a kinau lakwakamu, lakwa na tangaloi dolua vake, hinea tulu lengaira. Tulu ne uduhuri kinia kwara ne hago maikamu, vunu tulu ne lagwakinia huri na tangaloi doluaki. #Eves 6.18; Vil 4.6 2Tulu ne tiutangaroa huri na hugwe lalakua mana tangaloi lalakua ratuaki hinea rau hugwe korokita. Lo hala hi tana toka ne taritarisa, ne tangwatahakikita, vae tana vai lai kwara tana huri na hala na tiutangaroa, tana bohibohi ne taritarisa tigwaravu. 3A hala na tiutangaroa hokinia hi u karea, vake i God a noda Kaivakahi u lagwa luna. #1 Tim 1.1; 4.10 4Aia u lengai na tangaloi doluaki kwara rana ahi rana hagwe na vitikareaki. #Esik 18.23; 2 Pita 3.9 5I God katukwale vohoki, a takaro tikei vake, vake a tangaloi katukwale vohoki hinea a kaikaoda, u tu lo livukada mana livuka i God. A tangaloi hi i Jisas Kraes*, aia a tangaloi hokikita, #a Rom 3.29-30; 10.12; b Hib 12.24 6vae u hilea sibona kwara ne kasatukuhi na tangaloi na varamana doluaki tina hatiki. Hikani u vosangi lo taroki bakotoki kwara i God u lengaia kwara ne vakahiki na tangaloi doluaki. #Gal 1.4; 2.20; Taet 2.14 7Huri na kinau hi, i God u rivukiau kwara na kwareki a kaihora* kokona vake a tangaloi huhui nona tangaloi tavalavarea tina gwaloana noi Isrel*. Nahe kura tea, nu viti kareaki, u horeau kwara na kwalahaki na leo na hauhuriana mana vitikareaki lakwara. #Bol 9.15; Gal 2.7-8; 1 Tim 1.11
8Karea, nu lengaia kwara a ngwera vataha na mahagweki hinea rau taura siboga lakwai God rana hokaki kabaga rana tiutangaroa hinea rahe lologute tea, rahe viroviroro tea.
A bohiana nona ravavine lolo tanotano
9Lo hala hokinia hi nu lengaia kwara a ravavine rana lugwalugwa ne taritarisa, rana hatu sina na ngwera kina lugwaga, vake rana hatu kwetukwetutu maira. Rana hatu vai dedeki na vuluga, vake rana hatu tau te kol diko te perel*, diko te lugwa hinea a maneki u madi. #1 Pita 3.3-5 10Vae rana bohibohi ne taritarisa, rana hago mana tangaloi hokinia u taritarisa mana vavine hinea u viti kwara aia a noi God. #1 Tim 5.10 11U taritarisa kwara a ravavine rana huhui rana hugu butu, rana hatu kwahakwaha, vae rana loliloli evina tigwaravu. #1 Kor 14.34 12Nahe tirakinira tea kwara rana huhui na tangaloi, diko kwara rana hugwe koro na ngwera, vae rana hugu butu rana hatu kwahakwaha, 13huri i God u kihi i Atam tomua vunu vari i Iv. #Jen 1.27; 2.7,22; 1 Kor 11.8-9 14Vake i Setano* he sina i Atam tea, vae u sina na vavine, vunu a vavine hi u galo lo korokoro noi God. #Jen 3.6,13; 2 Kor 11.3 15Vae diko a vavine ne kwiribibi na hauhuriana mana lagwaana, vake ne kwareki a tangaloi huguhugubutu hinea u kwareki a noi God, ne bava natu vae i God ne tagahuria ne vakahikinia. #2.15: Lo hala kairuaki a domidomi na leo hi aia hokinia hika kwara, Vae a hala eia kwara i God ne vakahiki na vavine, huri a vavine u bava natu. Vae a vavine ne kwiribibi na hauhuriana mana lagwaana, vake ne kwareki a tangaloi huguhugubutu hinea u kwareki a noi God. Vae diko a vavine ne vai kwehi, i God ne vakahikinia.
Currently Selected:
1 TIMOTI 2: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
