PAKI TEA NI ROMA 1

1Paulo, tea suasua sikai ki Yesu Kristo, tea sosoana naga ega vei apostolo sikai, tea p̃otaeana paki narogorogoana wia ki Sup̃e. 2Waina e pea sai a pae profeta aneana maga doko navasaana midiriana tapu maga, 3nalo ni Natuna, waina e pakilina e pei nawora ni David pae nap̃okasina, 4waina e pei tea viseikiana ki nakasuaana naga e pei Sup̃e Natuna pae naatana ni natapuana ki namoroduleanaana ni tea mate maga; Yesu Kristo Nawota anigida, 5waina au dape nasaup̃iaana go naveiapostoloana pae asa paki narogoparatikiana ni nasaralomauana m̃aleoputo ni nalauna maga mamau puti, nalakena nagisana. 6Go nimu ma ku pei tea sosoana m̃aleoputo kakada naga kuga vei tea ki Yesu Kristo. 7Amidiri paki tea maga mamau puti waina ku doko Roma, tea dodomiana ki Sup̃e, tea sosoana naga kuga vei tea tautau maga: Nasaup̃iaana ega vei animu go natam̃ateana pae Sup̃e Tamagida go Nawota Yesu Kristo.

8Tea vea, a pasadodom̃ata ki Sup̃e aginau pae Yesu Kristo nalo kakamu mamau puti, nalakena nasaralomauana animu e pei tea rogorogokiana usuraki maramana mamau. 9Nalakena Sup̃e e pei tea noa sokisoki aginau, waina a do maneana suasua ki naatagu narogorogoana wia ki Natuna, naga a do mari pitip̃atip̃a ki namidoakinoa‐mu‐ana, sara ragi doko natapasavasaana aginau maga, a do pavara, 10mase a pe wo pei tea suasuakiana ragi waia kite te ragi pae namasauana ki Sup̃e naga aga valoti punusi mu. 11Nalakena a masau p̃arua ki naga aga vunusi mu, naga aga tua mu te navituaana sikai ni naatana, naga kuga vei tea lawosokiana; 12tea wanogoe e pei, naga aga vei tea vakavakaleana sikoti mu m̃aleoputo kakamu, pae nasaralomauana waina e doko gida doko, kinau pae tea animu, go nimu pae tea aginau. 13Go a da masauna mau naga nimu kuga vei sap̃o, tai maga, naga a paka laapa midoaki nia naga aga valoti punusi mu (po pei tea tugoroana asa pa pa paki ragi waia), naga aga veani nawa seara doko mu, ega tapala waina e doko tea ni nalauna p̃ota maga. 14Naleo ki tea ni Hellas maga go ki tea maga waina eu da pei tea ni Hellas mau, naleo ki tea manumatua maga go ki tea manumatavusa maga e one au one. 15Dapala nogoe, dapala waina a mari atae, a rakaraka naga aga rogorogo ki narogorogoana wia paki mu waina ku doko Roma. 16Nalakena a da maliere ki narogorogoana wia mau: nalakena e magi sara naata waina eu saralomau pei nakasuaana ki Sup̃e paki namautipauriana; e magi tea ni Yudea pea, go e magi tea ni Hellas. 17Nalakena namarinaleoleanaana ki Sup̃e e pei tea noapakasakiana asa pae nasaralomauana paki nasaralomauana: dapala waina e pei tea midiriana, e naga, Ma tea leana ega wo mauri pae nasaralomauana.

18Nalakena namaetoana ki Sup̃e e pei tea noapakasakiana pae nakoroatelagi umai dip̃a sara nasigisigileoana go sara namarinaleotageleana ki naatam̃oli maga, waina eu puasoki nalomauana pakitano ki namarinaleotageleana; 19nalakena tea ataeana ni Sup̃e e doko lina ara; nalakena Sup̃e e mari a e doko lina paki da. 20Nalakena tea maga kakana waina eu da pei tea vunusiana mau pae ragi ni natawonakiana ni maramana pa pa, eu pei tea leop̃aiana, eu pei tea midoakiataeana pae tea maga waina eu pei tea mariana, nakasuaana aneana waina e du mau du go navei‐Sup̃e‐ana kakana; naga euga tika navasakorokoroana: 21nalakena ragi waina eu atae Sup̃e eu da samasamani a mau dapala e pei Sup̃e, go eu da pasadodom̃ataki mau; ma eu pei tea p̃alo nalo ni namidodoana adeada maga, go nap̃op̃oda waina e midoaki sap̃o e po maligo. 22Ragi waina eu do noa naga eu manumatua, eu po pei tea manumatavusa, 23po surupioli ki nasamasamaana ni Sup̃e waina e mate sap̃o, raki natakiusiana ni nunu ni naatam̃oli waina e mate, go ni manu maga, go ni tea tuavati maga, go ni tea kakaravi maga.

24Nalakena tea wanogoe Sup̃e e pitua ki da nalo ni namasauana sa maga ni nap̃op̃oda paki naloaana, naga nap̃atokoda euga vei tea maridaoana m̃aleoputo kakada: 25nalakena eu surupioli ki nalomauana ki Sup̃e raki nasorosoroana, po lotu ki tea tawonakiana po maneana suasua po da lotu ki Tea Tawonaki po da maneana suasua mau, waina e pei tea vasap̃iakiana pa pa ega tu mau du. Amen.

26Nalakena tea wanogoe Sup̃e e pitua ki da paki narogoana maga ni nadododaoana: nalakena nagoroi adeada maga eu surupioli ki namariana waina e pae navakilinaana raki tea waina e panop̃ota ki navakilinaana: 27go dapala nogoe naanoai maga ma, eu doropusi namariana ni nagoroi waina e pae navakilinaana, po pavaga ki namasausauana adeada dum̃ada paki da, naanoai maga sikoti naanoai maga po do mari tea leosakiana, po do dum̃ada dape doko ara namoriana ni namaripeleana adeada waina e one asa one.

28Go dakiusi waina eu da midoakim̃ata ki nia mau naga euga veani Sup̃e doko naataeana adeada, Sup̃e e pitua ki‐da paki namidodoana tip̃adoaana, naga euga mari tea maga waina eu da p̃ia mau; 29eu pei tea vakavuroana ki sara namarinaleotageleana, nasigisigileoana, namatam̃aguraana, navilosiana; eu pura ki naroitoiana, namaripunueana, navileana, nasorosoroana, nakokonaana; tea vasa dalakolako maga, 30tea vasa pinoa maga, tea vilosi Sup̃e maga, tea mari sa ki maga, tea leo madaga maga, tea vasa pakavakae maga, tea midoaki p̃ai tea sa maga, tea rogo piri nadaleo ni tea matua adeada maga, 31tea midoaki sap̃o maga, tea tapiri navasasokiana maga, tea tika nadodomiana paki tea adeada maga, tea dodo tika maga: 32nara, waina eu atae natawonakiana ki Sup̃e, naga tea maga waina eu do mari tea tapala nogoe maga eu p̃ia ki namateana, eu do mari tea maga wanogoe e da sikina mau, ma eu midoaki m̃ata ki tea maga waina eu do mari ra.

Currently Selected:

PAKI TEA NI ROMA 1: NTB

Highlight

Copy