APOKALUPESI 19
19
1Edaku ki tea maga wanogoe a dogo tea waina e dapala nadaleo warua sikai ni taua warua sikai ni naatam̃oli maga doko nakoroatelagi, eu naga, Halleluyah; Namautipauriana, go nasamasamaana, go nakasuaana, eu pei agi Sup̃e anigida: 2nalakena navasap̃otaeana aneana maga eu pei lomau go eu leana; nalakena e pasa p̃otae nagoroi masausara warua, waina e do mari sa ki maramana ki namaripeleana aneana, go e siko nada ni tea suasua aneana maga paki nam̃elearuna. Go sala kerua eu naga, Halleluyah. 3Go naasua kakana e do sake pa pa e du du po du mau du. 4Go tea matua rualima dua tamate pati go nalo mauri pati eu dowo pakitano po lotu ki Sup̃e waina e dasake malo tasake, eu naga, Amen: Halleluyah. 5Go nadaleo sikai e dave pae malo tasake e naga, Kuga samasamani Sup̃e anigida, tea suasua aneana maga mamau puti, tea maga waina ku matau ki nia, tea kiki maga go tea warua maga. 6Go a dogo tea waina e dapala nadaleo ni taua warua sikai ni naatam̃oli maga, go tea waina e dapala nadaleo ni noai laapa, go tea waina e dapala nadaleo ni tovae kasua maga, eu naga, Halleluyah: nalakena Yehovah Sup̃e anigida, Tea Kasua mau, e maramara. 7Tuga lealaea po sokamidi, go tuga tua e nasamasamaana: nalakena navitawiriana ki Arnio e po umai, go nagoroi aneana e dum̃ana mari m̃ata ki nia. 8Go e pei tea vituakiana paki nia naga ega suni linen wia, tea maramalaga go tea tautau: nalakena linen wia wanogoe e pei namariana leana maga ki tea tautau maga. 9Go e noa ki nau, P̃a midiri, Tea maga waina eu pei tea vitautauana paki nakaniana ni navitawiriana ki Arnio eu maropa. Go e noa ki nau, e naga, Navasaana maga wanogoe eu pei navasaana lomau ki Sup̃e. 10Go a dowo pakitano pisari nam̃elena naga aga lotu ki nia. Go e noa ki nau, e naga, P̃a vunusi naga p̃a ta mari a mau: a pei tea suasua sikai sikoti ko go sikoti taim̃a maga waina eu dape nanoasokisokiana ni Yesu: p̃a lotu ki Sup̃e: nalakena nanoasokisokiana ni Yesu e pei naatana ni naveanoasaiana.
11Go a punusi nakoroatelagi e dap̃olaga; go kuga leo, horse tare sikai, go tea waina e sakesaake asa e pei tea sosoana ki Daleo atatu go Lomau; go e do pasa p̃otae po do mari navakalo pae namarinaleoleanaana. 12Go namatana ero dapala mena ni nakapu, go vauvau laapa eu doko nap̃auna; go e pilake nagisa sikai waina e pei tea midiriana, waina te naata e da atae a mau, ma nae e sikina atae a. 13Go e pei tea sugoroana ki sugoro sikai waina nada e pei tea meseurakiana paki asa: go nagisana e pei tea sosoana ki Navasaana ki Sup̃e. 14Go taua maga waina eu doko nakoroatelagi eu dausi a eu sakesaake horse tare maga, eu pei tea sugoroana ki linen wia e dare go e dautau. 15Go lova makali sikai e dave m̃elu nawokana pano, naga ega atugi nalauna maga asa: go nae ega wo maraki ra ki naap̃e sikai ni airon: go nae e do pasi m̃oru ni navasokiana ni nawa ni vaine ni waine ni namaritausuana ni namaetoana ki Sup̃e Kasua mau. 16Go e pilake nagisa sikai waina e pei tea midiriana sugoro aneana go namaona, e pei TEA MARAMARA KI TEA MARAMARA MAGA, GO NAWOTA KI NAWOTA MAGA.
17Go a punusi agelo sikai e lawodu elo; go e pioso ki nadaleo warua, e noa ki manu maga mamau puti waina eu do diri m̃aleoputo ni namalopa, e naga, Kuga umai, kuga vei tea saisaikiana paki nakaniana warua ki Sup̃e; 18naga kuga kani nap̃okasi ni nawota maga, go nap̃okasi ni kaptin ni manu maga, go nap̃okasi ni tea kasua maga, go nap̃okasi ni horse maga, go ni tea maga waina eu sakesaake ara, go nap̃okasi ni tea maga mamau puti, ni tea maga waina eu dum̃ada doko go ni tea maga waina eu pei naviti, go ni tea kiki maga go ni tea warua maga.
19Go a punusi nalo mila, go nawota maga ni maramana, go taua adeada maga, eu pei tea saisaikiana naga euga mari navakalo paki tea waina e sakesaake horse, go paki taua aneana. 20Go nalo mila e pei tea vuasokiana, nara ma profeta sorosoro waina e mari navaivaiana maga namatana, waina pae ara e piragisasap̃o ki tea maga waina eu dape wotu ni nalo mila, go tea maga waina eu do lotu ki nasup̃e kakana: ero dua pei tea nadikiana mauri paki namarourou ni nakapu waina e do soro ki sulfur: 21go tea p̃ota maga eu pei tea maripunueana ki lova ki tea waina e sakesaake horse, ki lova waina e dave m̃elu nawokana: go manu maga mamau puti eu puka ki nap̃okasida.
Currently Selected:
APOKALUPESI 19: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
