APOKALUPESI 13
13
1Go a punusi nalo mila sikai e m̃elu dua ki natasi do sake umai, waina e pilake napati ni nap̃auna rualima sikai go nap̃auna larua, go vauvau rualima sikai eu doko napati maga ni nap̃auna, go nagisa maga ni navasasakiana eu doko nap̃auna maga. 2Go nalo mila waina a punusi a e dakiusi leopard sikai, go nam̃elena maga eu dapala tea ni bear sikai, go nawokana e dapala nawoka ni laion sikai; go drakon e dua e nakasuaana aneana, go malo tasake aneana, go naveinawotaana warua. 3Go a punusi nap̃auna maga sikai kakada e dapala e pei tea atugiana paki namateana; go nawokatiana ni namateana aneana e pei tea maripauriana: go maramana mamau eu maga dausi nalo mila; 4go eu lotu ki drakon, nalakena e dua nalo mila naveinawotaana aneana; go eu lotu ki nalo mila, po naga, Sei e dakiusi nalo mila? Go sei e mari atae mari navakalo paki nia? 5Go nawoka sikai e pei tea vituakiana paki nia, waina e do pasa tea warua maga, go navasasakiana maga; go naveinawotaana e pei tea vituakiana paki nia naga ega toko atelagi rualima pati tamate dua. 6Go e maga ki nawokana raki navasasakiana maga dip̃a Sup̃e, naga ega vasa sa ki nagisana, go ki tap̃aup̃au aneana, go ki tea maga waina eu doko nakoroatelagi. 7Go e pei tea vituakiana paki nia naga ega mari navakalo paki tea tautau maga, go naga ega marimatua ki da: go naveinawotaana e pei tea vituakiana paki nia dap̃au sara naworawora go sara narei go sara navasaana go sara nalauna. 8Go tea maga mamau puti waina eu doko maramana euga wo lotu ki nia, tea maga waina nagisada eu da pei tea midiriana tusi ni namauriana ki Arnio waina e pei tea maripunueana pae nanadikilaketanoana ni maramana pa pa. 9Te naata e pe vilake nadaliga, ega rogo. 10Te naata e pe viragiluapavakoto, ega wo pei tea viragiluapavakotoana: te naata e pe mari punue ki lova, e one asa one naga ega vei tea maripunueana ki lova. Nasokiana go nasaralomauana ki tea tautau maga ero doko nea.
11Go a punusi nalo mila p̃ota sikai e m̃elu dua ki navanua sake umai; go e pilake napati dua ni nap̃auna dakiusi arnio sikai, go e pasa dapala drakon sikai. 12Go e mari naveinawotaana mamau ki nalo mila vea namatana. Go e mari maramana go tea maga waina eu doko asa eu lotu ki nalo mila vea, waina nawokatiana ni namateana aneana e pei tea maripauriana. 13Go e mari navaivaiana warua maga, naga ega mari nakapu ega m̃elu dua ki nakoroatelagi siwo umai paki maramana namata ni naatam̃oli maga. 14Go e piragisasap̃o ki tea maga waina eu doko maramana nalakena navaivaiana maga waina e pei tea vituakiana paki nia naga ega mari ra namata ni nalo mila; e noa ki tea maga waina eu doko maramana, naga euga magi nalo mila, waina e pilake nawokatiana ni lova po mauri, mari nasup̃e sikai. 15Go e pei tea vituakiana paki nia naga ega vitua ki namero paki nia, paki nasup̃e ni nalo mila, naga nasup̃e ni nalo mila ega vasa, po mari naga tea maga waina eu pe ta lotu ki nasup̃e ni nalo mila mau euga vei tea maripunueana. 16Go e mari tea maga mamau puti, tea kiki maga go tea warua maga, go tea vei sogolapa maga go tea tika maga, go tea veresiana maga eu dum̃ada doko go tea vei naviti maga, naga euga tua ra wotu sikai ega toko nam̃elearuda ni matua, kite ega toko naraeda; 17go naga te naata sikai ega ta mari atae pakokoto kite sorisori mau, ma tea waina e pilake wotu nagisa ni nalo mila kite naveveana ni nagisana, ega sikina. 18Namanumatuaana e doko tea waia. Tea waina e peani namidoakiataeana ega veve naveveana ni nalo mila; nalakena e pei naveveana ni naatam̃oli sikai: go naveveana kakana e pei P̃onotia latesa go rualima takuna latesa go tamate latesa.
Currently Selected:
APOKALUPESI 13: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
