PAKI FILEMON 1
1
1Paulo, tea soliana sikai ki Kristo Yesu, go Timotheo taigida, paki Filemon tea dodomiana aginami go tea wosiwosi sikoti gami, 2go paki Apfia goregami, go paki Arkippo tea ni navakalo sikoti gami, go paki ekalesia ni nasum̃a anigo: 3nasaup̃iaana ega vei animu go natam̃ateana m̃elu Sup̃e Tamagida go Nawota Yesu Kristo.
4A pasadodom̃ata ki Sup̃e aginau sara ragi, doko do noa ko natapasavasaana aginau maga, 5a do dogo nadodomiana anigo, go nasaralomauana waina ku peani a paki Nawota Yesu, go paki tea tautau maga mamau puti; 6naga nasaisaipeaniana ni nasaralomauana anigo ega vei tea marimatua doko naataem̃atakiana ni sara naleo wia waina eu doko mu paki Kristo Yesu. 7Nalakena a peani nalaelaeaana warua go navakavakaleana nalakena nadodomiana anigo, nalakena namarita ni tea tautau maga eu pei tea vakamaromarokiana pae ako, taigu.
8Nalakena tea wanogoe, waina a peani naviviariana warua doko Kristo naga aga tip̃a ki‐go tea waina e patakam̃a, 9ma nalakena nadodomiana a pavara, waina a pei tea tapala Paulo tea matua, go ragi waia tea soliana sikai ki Kristo Yesu: 10a pavarani ko nalakena natugu, waina a pesi a doko natali solisoli maga, 11Onesimo, waina sala vea e da p̃ia ki‐go mau, ma ragi waia e p̃ia ki‐go go e p̃ia ki nau. 12Waina a dip̃aki lua e liliu paloti punusi ko, nae, tea wanogoe e pei namaritagu; 13Waina kinau a masauna naga aga mauti a ega sikoti au, naga ega maginau suasua oli ko doko natali solisoli maga ni narogorogoana wia: 14ma masale ki namidodoana anigo a da masauna naga aga mari te navatuna mau, naga nawiaana anigo ega ta dapala e pe vae navasadieana mau, ma ega vae narakarakaana. 15Nalakena mase e m̃elu dua ki‐go pano ragi kiki nalakena tea waia, naga p̃a veani a ega tu mau du; 16e da moro dapala tea suasua mau, ma e pakilagi liu tea suasua, e pei taigida dodomiana e p̃arua paki nau ma e p̃arua liu ki nia dapale paki‐go, doko nap̃okasi go doko Nawota. 17Nalakena tea wanogoe ku pe midoaki nia naga kinau a pei tea saisaipeani, p̃a viragi soki a ega tapala e pei kinau. 18Ma e pe mari dagele pakigo te navatuna, kite te navatuna anigo e pe one asa one, p̃a midoa ki tea wanogoe dip̃a au; 19kinau Paulo a midiri a ki nam̃elearugu, kinau aga wo lagati pitua ki nia: naga aga ta noa ki‐go naga ku dum̃am̃a pei naleo aginau waina e one ako one. 20Ioro, taigu, aga veani nalaelaeaana ako doko Nawota: p̃a vakamaromaro ki namaritagu doko Kristo. 21Nalakena a pavatu narogoparatikiana anigo a midiri paki‐go doko atae naga p̃a wo mari tea waina e p̃arua liu tea maga waina a noa e. 22Ma ragi sikai maau wanogoe p̃a maginau mari m̃ata ki tokora sikai ni nam̃enakiana; nalakena a do leogoro naga aga vei tea vituakiana paki mu pae natapasavasaana animu maga.
23Epafra, tea viragiluapavakotoana sikoti au doko Kristo Yesu e pasa dodomi ko; 24go Marko, go Aristarko, go Dema, go Luka, tea wosiwosi maga sikoti au.
25Nasaup̃iaana ki Nawota anigida Yesu Kristo ega sikoti naatamu. Amen.
Currently Selected:
PAKI FILEMON 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
