NUMBERS 4
4
1Go Yehovah e pasa paki Moses go paki Aaron, 2po naga, Koroga midiri nagisa maga ni Kohath natuna maga mamau puti m̃elu m̃aleoputo ni Levi natuna maga, ega vae naworada maga, ega vae nasum̃a maga ni tamada maga. 3Tea maga waina eu pei tea ni natau rualima dolu go do liu pa pa liliu tea maga waina eu pei tea ni natua rualima lima, tea mamau puti waina eu paki nasuasuaana, naga euga mari nawosiana doko ekopu ni tap̃aup̃au ni nasaisaiana. 4Tea waia ega vei nasuasuaana ki Kohath natuna maga ekopu ni tap̃aup̃au ni nasaisaiana, nalo ni naleo maga waina eu pei tea tapu liu.
5Ragi waina euga rakai po surata pano, Aaron go natuna maga euga vaki ekopu, go euga tape lua tea taugoro‐p̃otae ni tea tausiliki, po kovagoro areka ni nanoasokisokiana asa: 6Go euga kovagoro e ki tea tap̃au‐kovagoro sikai ni nawili ni siil, po p̃elesa ki nakulukulu sikai ni tea kesakesa asa, po sai ki nakau vavau kakana maga asa. 7Go euga welesa ki nakulukulu sikai ni tea kesakesa ega toko wede ni bred tokorae, po doropusi siloa maga euga toko asa, go spun maga, go boul maga, go lasa munu maga naga euga tataki ara: go bred tokorae ni sara ragi ega toko asa: 8Go euga tap̃augoro ra ki nakulukulu sikai ni tea miala‐kalakala, po kovagoro tea wanogoe ki tea kovagoro sikai ni nawili ni siil, go euga sai ki tea vavau kakana maga asa. 9Go euga tape nakulukulu sikai ni tea kesakesa, po kovagoro nakau ni nasulu, go nasulu kakana maga, go odaki kakana maga, go siloa ni meru kakana maga, go lasa kakana maga mamau puti ni naroro, waina eu mari nawosiana ni nasuasuaana asa: 10Go euga kalutigoro e go lasa kakana maga mamau puti ki nakulukulu ni nawili ni siil, po doropusi a ega toko vala sikai. 11Go euga welesa ki nakulukulu sikai ni tea kesakesa wede ni naviriana ni kold, po kovagoro e ki tea kovagoro sikai ni nawili ni siil, go euga sai ki tea vavau kakana maga asa. 12Go euga tape lasa maga mamau puti ni nasuasuaana, waina eu mari nawosiana ni nasuasuaana ara ekopu ni tokora tapu, po kalutigoro ra ki nakulukulu sikai ni tea kesakesa, po kovagoro ra ki tea kovagoro sikai ni nawili ni siil, po doropusi ra euga toko vala wanogoe. 13Go euga tape lua natano‐apu m̃elu dua ki wede ni naviriana, po p̃elesa ki nakulukulu ni tea miala‐kesakesa asa: 14Go euga toropusi lasa kakana maga mamau puti euga toko asa, lasa maga waina eu mari nawosiana ni nasuasuaana ara, pan ni nakapu vavaga kakana maga, tagau ni nap̃okasi kakana maga, go savel kakana maga, go besin kakana maga, naloriki maga mamau puti ni wede ni naviriana; go euga kovagoro e ki tea kovagoro sikai ni nawili ni siil, po sai ki tea vavau kakana maga asa. 15Go ragi waina Aaron go natuna maga euga kovagoro tokora tapu, go naloriki kakana maga mamau puti, go ega nopu, ragi waina taua mamau euga surata; ragi wanogoe Kohath natuna maga euga umai naga euga tapetape a: ma euga ta kisidogo tokora tapu mau, mase eu pe mate. Naleo maga wanogoe eu pei nawosiana ni natapetapeana ki Kohath natuna maga ekopu ni tap̃aup̃au ni nasaisaiana. 16Go naleoparatikiana ki Eleasar natu ni Aaron tea viri, ega vei naroro agi nasulu, go tea ni nap̃o wia, go navituaana ni flaur ni sara ragi, go naroro ni navuvuraiana, naleoparatikiana ni nasum̃atokoana mamau, go ni sara naleo kakana waina eu doko asa, tokora tapu go naloriki kakana maga.
17Go Yehovah e pasa paki Moses, go paki Aaron, 18po naga, Koroga ta daelua nalauna ni naworawora ni Kohath naworada maga m̃elu dua ki m̃aleoputo ni naworawora ni Levi mau: 19Ma koroga mari ega tapala nea paki da, naga euga mauri, po da mate mau, ragi waina euga vaki m̃aladigi ki naleo tapu liu maga: Aaron go natuna maga euga vaki ekopu, po pasa dawona ki da sara naata sikasikai paki nawosiana adeada go natapetapeana adeada: 20Ma nara euga ta paki ekopu ni tokora tapu naga euga vunusi naleo tapu liu maga mau, e pe vei ragi ni nawilimatana sikai maau mau, mase eu pe mate.
21Go Yehovah e pasa paki Moses, po naga, 22P̃a moro midiri nagisa maga ni Cershon natuna maga, ega vae nasum̃a maga ni tamada maga, ega vae naworada maga; 23Tea maga waina eu pei tea ni natau rualima dolu go do liu pa pa liliu natau rualima lima, p̃a veve parati ki da; tea mamau puti waina eu do paki ekopu naga euga mari nawosiana ni nasuasuaana, naga euga mari nawosiana ekopu ni tap̃aup̃au ni nasaisaiana. 24Tea waia ega vei nasuasuaana ni Cershon natuna maga naworada maga, ni nawosiana ni nasuasuaana go ni natapetapeana ni naleo madaga maga: 25Euga tapetape tea kovagoro maga ni nasum̃atokoana, go tap̃aup̃au ni nasaisaiana pilake tea kovagoro kakana, go tea kovagoro ni nawili ni siil waina e kovagoro e asa, go tea tausiliki agi namata ni tap̃aup̃au ni nasaisaiana; 26Go tea taugoro maga ni roara, go tea tausiliki agi namatapua ni roara, waina e dau nasum̃atokoana go wede ni naviriana daliviri, go viria kakada maga, go naloriki maga mamau puti ni nawosiana kakada; go euga mari nawosiana mamau puti waina ega vei tea mariana nalo kakada. 27Aaron go natuna maga euga veani naveinawotaana dap̃au nawosiana mamau ni nasuasuaana ki Cershon natuna maga, nalo ni natapetapeana adeada mamau, go nalo ni nawosiana ni nasuasuaana adeada mamau: go kuga madeada noap̃otae naleoparatikiana ni natapetapeana adeada mamau. 28Tea wanogoe e pei nawosiana ni nasuasuaana ki Cershon natuna maga naworada maga ekopu ni tap̃aup̃au ni nasaisaiana: go naleoparatikiana adeada ega toko etano ni nam̃elearu ni Ithamar natu ni Aaron tea viri.
29Go nalo ni Merari natuna maga, p̃a veve parati ki da ega vae naworada maga, ega vae nasum̃a maga ni tamada maga; 30Tea maga waina eu pei tea ni natau rualima dolu go do liu, pa pa liliu natau rualima lima, p̃a veve parati ki da, sara naatam̃oli waina eu sili paki nawosiana ni nasuasuaana naga euga mari nawosiana nalo ni tap̃aup̃au ni nasaisaiana. 31Go tea waia ega vei naleoparatikiana ni natapetapeana adeada, e pei nawosiana mamau ni nasuasuaana adeada ekopu ni tap̃aup̃au ni nasaisaiana; napapa maga ni nasum̃atokoana go tea walagoto kakana maga, go tea lawodu kakana maga, go laketano kakana maga; 32Go tea lawodu maga ni roara daliviri, go laketano kakana maga, go pin kakana maga, go viria kakana maga, go naloriki kakana maga mamau puti: go kuga noap̃otae nagisa ni naloriki maga sikasikai sarasara ra ni naleoparatikiana ni natapetapeana adeada. 33Tea wanogoe e pei nawosiana ni nasuasuaana ki Merari natuna maga naworada maga, e pei nawosiana mamau ni nasuasuaana adeada, ekopu ni tap̃aup̃au ni nasaisaiana, doko etano ni nam̃elearu ni Ithamar natu ni Aaron tea viri.
34Go Moses go Aaron go tea maraki maga ni nasaisaiana eu peve parati ki naworawora ni Kohath pae naworada maga, go pae nasum̃a maga ni tamada maga, 35Tea maga waina eu pei tea ni natau rualima dolu go do liu, pa pa liliu natau rualima lima, sara naatam̃oli waina eu sili paki nawosiana ni nasuasuaana, naga euga mari nawosiana ekopu ni tap̃aup̃au ni nasaisaiana: 36Go tea mamau puti wanogoe waina eu pei tea veveana pae naworada maga, eu pei naatam̃oli manu dua p̃onotia larua rualima takuna lima. 37Tea maga wanogoe eu pei naworawora ni Kohath naworada maga waina eu pei tea veveana, eu mamau puti mari nawosiana ni nasuasuaana ekopu ni tap̃aup̃au ni nasaisaiana, waina Moses go Aaron ero peve ra, pataka ni natip̃akiana ki Yehovah pae nam̃elearu ni Moses.
38Go Cershon natuna maga waina eu pei tea veveana, pae naworada maga, go pae nasum̃a maga ni tamada maga, 39Tea maga waina eu pei tea ni natau rualima dolu go do liu, pa pa liliu natau rualima lima, sara naatam̃oli waina eu sili paki nawosiana ni nasuasuaana, naga euga mari nawosiana ekopu ni tap̃aup̃au ni nasaisaiana, 40Tea maga wanogoe waina eu pei tea veveana, pae naworada maga, pae nasum̃a maga ni tamada maga, eu pei naatam̃oli manu dua p̃onotia latesa rualima takuna dolu. 41Tea maga wanogoe eu pei Cershon natuna maga naworada maga waina eu pei tea veveana, tea mamau puti waina eu mari nawosiana ni nasuasuaana ekopu ni tap̃aup̃au ni nasaisaiana, waina Moses go Aaron ero peve parati ki da, pataka ni natip̃akiana ki Yehovah.
42Go Merari natuna maga naworada maga waina eu pei tea veveana, pae naworada maga, pae nasum̃a maga ni tamada maga, 43Tea maga waina eu pei tea ni natau rualima dolu go do liu, pa pa liliu natau rualima lima, sara naatam̃oli waina eu sili paki nawosiana ni nasuasuaana, naga euga mari nawosiana ekopu ni tap̃aup̃au ni nasaisaiana, 44Tea maga wanogoe waina eu pei tea veveana pae naworada maga, eu pei naatam̃oli manu dolu p̃onotia dua. 45Tea maga wanogoe eu pei Merari natuna maga naworada maga waina eu pei tea veveana, waina Moses go Aaron ero peve parati ki da, pataka ni natip̃akiana ki Yehovah pae nam̃elearu ni Moses.
46Tea maga mamau puti ni naworawora ni Levi waina eu pei tea veveana, waina Moses go Aaron go tea maraki maga ni Israel eu peve parati ki da, pae naworada maga, go pae nasum̃a maga ni tamada maga, 47Tea maga waina eu pei tea ni natau rualima dolu go do liu, pa pa liliu natau rualima lima, sara naatam̃oli waina eu sili naga euga mari nawosiana ni nasuasuaana, nawosiana ni natapetapeana ni naleo madaga maga ekopu ni tap̃aup̃au ni nasaisaiana, 48Tea maga mamau puti wanogoe waina eu pei tea veveana, eu pei naatam̃oli manu latolu p̃onotia lima rualima takuna latolu. 49Pataka ni natip̃akiana ki Yehovah, eu pei tea veveana pae nam̃elearu ni Moses, sara naata sikasikai pae nawosiana ni nasuasuaana adeada, go pae natapetapeana adeada: dapala nogoe eu pei tea veveana pae asa, dapala waina Yehovah e dip̃aki Moses asa.
Currently Selected:
NUMBERS 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
