NUMBERS 3
3
1Go tea maga waia eu pei tagona maga ni Aaron go Moses ragi waina Yehovah e pasa paki Moses tava Sinai. 2Go tea maga waia eu pei Aaron natuna maga nagisada maga; Nadab takalapa, go Abihu, Eleasar, go Ithamar. 3Tea maga wanogoe eu pei Aaron natuna maga nagisada maga, eu pei tea viri maga waina eu pei tea vuvuraikiana, waina e dapugoro ra naga euga suasua nawosiana ki tea viri. 4Ma Nadab go Abihu ero mate narae ni Yehovah, ragi waina ero pitua ki nakapu vanop̃ota narae ni Yehovah masop̃alo ni Sinai, go ero dika natuda: go Eleasar go Ithamar ero suasua nawosiana ki tea viri narae ni tamada Aaron.
5Go Yehovah e pasa paki Moses, po naga, 6P̃a viragi naworawora ni Levi umai paki m̃aladigi, po lawo ki da narae ni Aaron tea viri, naga euga maneana suasua. 7Go euga vavaigoro natip̃akiana aneana, go natip̃akiana ni nasaisaiana mamau narae ni tap̃aup̃au ni nasaisaiana, naga euga to mari nawosiana ni tap̃aup̃au. 8Go euga leo parati ki naleo maga mamau puti ni tap̃aup̃au ni nasaisaiana, po pavaigoro natip̃akiana ni Israel natuna maga, naga euga to mari nawosiana ni tap̃aup̃au. 9Go p̃a vitua ki naworawora ni Levi paki Aaron go paki natuna maga: nara euga vei tea aneana m̃elu Israel natuna maga. 10Go p̃a lawo ki Aaron go natuna maga, go nara euga vavaigoro nawosiana adeada ni navei‐teaviriana: go tea p̃ota sikai e pe umai paki m̃aladigi, e pe wo pei tea toropusiana paki namateana.
11Go Yehovah e pasa paki Moses, po naga, 12Go kinau, p̃a leo, kinau a po dum̃agu piragi lua naworawora ni Levi m̃elu dua ki Israel natuna maga oli takalapa maga mamau puti ni Israel natuna maga; go naworawora ni Levi euga vei tea aginau: 13Nalakena tea takalapa maga mamau puti eu pei tea aginau; doko naaleatia waina a atugi puti tea takalapa maga ni navanua ni Ityipt, a dum̃agu dapugoro tea takalapa maga mamau puti ni Israel naga euga vei tea aginau, naatam̃oli go nalo tuavati: euga vei tea aginau; kinau a pei Yehovah.
14Go Yehovah e pasa paki Moses masop̃alo ni Sinai, po naga, 15P̃a veve Levi natuna maga, ega vae nasum̃a maga ni tamada maga, ega vae naworada maga: sara naanoai waina eu pei tea ni atelagi sikai go do liu, p̃a veve parati ki da. 16Go Moses e peve ra pataka ni navasaana ki Yehovah, dapala waina e pei tea tip̃akiana asa. 17Go tea maga waia eu pei Levi natuna naanoai maga pae nagisada maga; Cershon, go Kohath, go Merari. 18Go tea maga waia eu pei nagisa maga ni Cershon natuna naanoai maga pae naworada maga; Libni go Shimei. 19Go Kohath natuna naanoai maga pae naworada maga; Amram, go Ishar, Hebron, go Ussiel. 20Go Merari natuna naanoai maga pae naworada maga; Mahli go Mushi. Tea maga wanogoe eu pei Levi natuna maga naworada maga pae nasum̃a maga ni tamada maga.
21Nawora ni Libni go nawora ni Shimei eu pei tea ni Cershon natuna maga: tea maga waia eu pei Cershon natuna maga pae naworada maga. 22Tea maga mamau puti waina eu pei tea veveana, sara naanoai waina eu pei tea ni atelagi sikai go do liu, totowo kakada e pei manu larua p̃onotia lima. 23Cershon natuna maga naworada maga euga m̃enaki etaku ni nasum̃atokoana doko taleva ni elo musu. 24Go tea maraki ni nasum̃a ni tamada maga ni Cershon natuna maga, ega vei Eliasaf natu ni Lael. 25Go naleoparatikiana ki Cershon natuna maga ekopu ni tap̃aup̃au ni nasaisaiana, ega vei nasum̃atokoana, go Tap̃aup̃au ni Nasaisaiana, go tap̃aup̃au go tap̃aukovagoro kakana, go tea tausiliki agi namata ni tap̃aup̃au ni nasaisaiana, 26Go tea kovagoro maga ni roara, tea tausiliki agi namata ni roara waina e doko dalivirigoro nasum̃atokoana go wede ni naviriana, go viria kakana maga doko sara nasuasuaana kakana maga.
27Go Kohath natuna maga, nawora ni Amram, go nawora ni Ishar, go nawora ni Hebron, go nawora ni Ussiel: tea maga wanogoe eu pei Kohath natuna maga pae naworada maga. 28Tea mamau puti ni naanoai maga waina eu pei tea ni atelagi sikai go do liu eu pei manu latolu p̃onotia latesa waina eu do pavaigoro naleoparatikiana ni tokora tapu. 29Kohath natuna maga naworada maga euga m̃enaki taleva ni nasum̃atokoana waina e paki etua. 30Go tea maraki ni nasum̃a maga ni tamada maga ni Kohath natuna maga naworada maga, ega vei Elisafan natu ni Ussiel. 31Go naleoparatikiana adeada ega vei areka, go wede, go nakau ni nasulu, go wede ni naviriana maga, go lasa maga ni tokora tapu waina eu mari nawosiana ni nasuasuaana ara, go tea tausiliki, go sara nasuasuaana kakana maga. 32Go Eleasar natu ni Aaron tea viri ega vei tea maraki dap̃au tea maraki maga ni naworawora ni Levi, ega leo parati ki dap̃au tea maga waina eu do pavaigoro naleoparatikiana ni tokora tapu.
33Ni Merari natuna maga, nawora ni Mahli, go nawora ni Mushi: tea maga wanogoe eu pei Merari natuna maga pae naworada maga. 34Go tea maga mamau puti kakada waina eu pei tea veveana, sara naanoai waina eu pei tea ni atelagi sikai go do liu, eu pei manu latesa p̃onotia dua. 35Go tea maraki ni nasum̃a ni tamada maga ni naworawora ni Merari, ega vei Suriel natu ni Abihail: nara euga m̃enaki taleva ni nasum̃atokoana waina e paki ep̃au.
36Go Merari natuna maga euga leo parati ki napapa matolu maga ni nasum̃atokoana, go tea walagoto kakana maga, go tea lawodu kakana maga, go laketano kakana maga, go sara naleo kakana maga mamau puti, go sara naloriki maga doko nasuasuaana kakana; 37Go tea lawodu maga ni roara dalivirigoro e, go laketano kakana maga, go pin kakana maga, go viria kakana maga. 38Go tea maga waina euga m̃enaki kivea ni nasum̃atokoana taleva waina e paki ist, kivea ni tap̃aup̃au ni nasaisaiana taleva waina e leo paki elo sake, euga vei Moses go Aaron natuna maga, euga vavaigoro naleoparatikiana ni nasum̃atokoana, euga magi Israel natuna maga pavaigoro e; go tea p̃ota sikai e pe umai paki m̃aladigi, e pe wo pei tea toropusiana paki namateana. 39Tea mamau puti ni naworawora ni Levi waina eu pei tea veveana, waina Moses go Aaron ero peve ra dapala waina Yehovah e dip̃aki da asa, pae naworada maga, naanoai maga mamau puti waina eu pei tea ni atelagi sikai go do liu, eu pei tivilia dua manu dua.
40Go Yehovah e noa ki Moses, e naga, P̃a veve tea takalapa mamau puti ni Israel natuna maga, naanoai maga waina eu pei tea ni atelagi sikai go do liu, go p̃a veve parati ki da ega vae nagisada maga. 41Go p̃a maginau piragi lua naworawora ni Levi (kinau a pei Yehovah) euga oli tea takalapa mamau puti ni Israel natuna maga; go katel ki naworawora ni Levi euga oli tea takalapa maga ni katel ki Israel natuna maga. 42Go Moses e peve tea takalapa mamau puti ni Israel natuna maga dapala waina Yehovah e dip̃aki nia asa. 43Go tea takalapa mamau puti, naanoai maga, pae naveveana ni nagisada maga, tea maga waina eu pei tea ni atelagi sikai go do liu, eu pei tivilia dua manu dua, p̃onotia dua rualima takuna larua tamate dolu.
44Go Yehovah e pasa paki Moses, po naga, 45P̃a viragi lua naworawora ni Levi euga oli tea takalapa mamau puti ni Israel natuna maga, go katel ni naworawora ni Levi euga oli katel adeada: go naworawora ni Levi euga vei tea aginau; kinau a pei Yehovah. 46Go raki natauluaana ni tea takalapa p̃onotia dua rualima takuna larua tamate dolu ni Israel natuna maga, waina eu laapa do liu naworawora ni Levi, 47P̃a tape shekel ega lima sikasikai sarasara ra; ega takiusi shekel ni tokora tapu, p̃a tape ra (shekel wanogoe e pei cerah rualima dua): 48Go m̃ane wanogoe waina ega taulua tea laapa do liu wanogoe, p̃a tua Aaron go natuna maga asa. 49Go Moses e dape m̃ane ni natauluaana wanogoe ki tea maga waina eu laapa do liu tea maga waina naworawora ni Levi eu daulua ra: 50E dape lua m̃ane wanogoe ki tea takalapa maga ni Israel natuna maga; e pei shekel manu sikai p̃onotia dolu rualima takuna latesa tamate lima, dakiusi shekel ni tokora tapu: 51Go Moses e dua Aaron go natuna maga m̃ane ni natauluaana wanogoe, pataka ni navasaana ki Yehovah, dapala waina Yehovah e dip̃aki Moses asa.
Currently Selected:
NUMBERS 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
