LEVITIKO 9
9
1Go e pakilina naaleatia kelatolu, naga Moses e soso saisai ki Aaron ma natuna maga, go tea matua maga ni Israel; 2Go e pasa paki Aaron, po naga, P̃a vuati kau anoai vusavusa sikai ega vei navituaana ni namarinaleosaana, go shiip anoai sikai tea mamaau p̃ia, ega vei navituaana tap̃arakiana, po pitua ki da narae ni Yehovah. 3Go p̃a vasa paki Israel natuna maga, po naga, Kuga vuati naninani anoai sikai ega vei navituaana ni namarinaleosaana; go kau natuna sikai go shiip natuna sikai, tea ni natau sikai maau, tea mamaau p̃ia, eroga vei navituaana tap̃arakiana sikai; 4Go oks sikai go shiip anoai sikai eroga vei navituaana maga ni natam̃ateana, naga ega vei naviriana narae ni Yehovah; go navituaana sikai ni flaur, tea sarisariana pilake naroro: nalakena masoso Yehovah ega vakilina ki mu. 5Go eu piragi umai tea waina Moses e pitip̃aki asa paki kivea ki tap̃aup̃au ni nasaisaiana: go taua mamau ni nasaisaiana eu disu paki m̃aladigi po lawodu narae ni Yehovah. 6Go Moses e naga, Naleo waia Yehovah e pitip̃aki asa naga kuga mari a: go nasamasamaana ki Yehovah ega vakilina ki mu. 7Go Moses e noa ki Aaron, e naga, P̃a risu paki m̃aladigi ki wede ni naviriana, po pitua ki navituaana ni namarinaleosaana anigo, go navituaana tap̃arakiana anigo, po dum̃am̃a manigo go magi narei anigo mari natap̃augoroana: go p̃a vitua ki naviriana ni navinaga ki narei, po madeada mari natap̃augoroana; dapala waina Yehovah e pitip̃aki asa. 8Go dapala nogoe Aaron e disu paki m̃aladigi ki wede ni naviriana, po mari punue kau natuna ni navituaana ni namarinaleosaana, waina e pei tea aneana. 9Go Aaron natuna maga eu dape nadana umai, po dua e asa: go e pupugi nakinina asa, po doropusi a e doko napati maga ni wede ni naviriana, go e daki puti nada nalake ni wede ni naviriana: 10Ma nap̃eletia, go nap̃elekevatu maga, go nalaolao ni nadanikapu ni navituaana ni namarinaleosaana, e dap̃ara ki da wede ni naviriana; dapala waina Yehovah e dip̃aki Moses asa. 11Go nap̃okasi go nawili, e dap̃ara ki da ki nakapu etaku ni tokora ni nam̃enakiana. 12Go e mari punue navituaana tap̃arakiana; go Aaron natuna maga eu dape nadana umai po dua e asa, go e meseura ki nia wede ni naviriana daliviri. 13Go eu dape navituaana tap̃arakiana umai dua e asa, matele go matele, go nap̃auna: go e dap̃ara ki da wede ni naviriana. 14Go e sarue namaritana maga go natuana maga, po dap̃ara ki da pilake navituaana tap̃arakiana wede ni naviriana. 15Go e piragi naviriana ni navinaga ki narei umai, go e puati naninani ni navituaana ni namarinaleosaana waina e pei agi narei, po mari punue a, po pitua ki nia dip̃a namarinaleosaana, dapala tea vea. 16Go e piragi navituaana tap̃arakiana umai, po pitua ki nia pataka ni natawonakiana. 17Go e piragi navituaana ni flaur umai, po pakavuro nam̃elearuna ki seara kakana, go e dap̃ara ki nia wede ni naviriana pilake navituaana tap̃arakiana ni malip̃ogi. 18Go e moro mari punue oks go shiip anoai raki naviriana ni navituaana maga ni natam̃ateana waina e pei agi narei: go Aaron natuna maga eu dape nadana umai dua e asa, go e meseura ki nia wede ni naviriana daliviri. 19Go nap̃eletia ni oks go ni shiip anoai, go napuena m̃anopunopu, go tea waina e kovagoro namaritana maga, go nap̃elekevatuna maga, go nalaolao ni nadanikapuna: 20Go eu doropusi nap̃eletiana doko nagorogorona maga, go e dap̃ara ki nap̃eletiana wede ni naviriana: 21Go nagorogorona, go namaona ni matua, Aaron e salesalea ki da e pei navituaana salesaleakiana sikai narae ni Yehovah; dapala waina Moses e pitip̃aki asa. 22Go Aaron e sike nam̃elearuna maga narae ni narei po pasa p̃ia ki da; e mari sua naviriana ni navituaana ni namarinaleosaana, go ni navituaana tap̃arakiana, go ni navituaana maga ni natam̃ateana, po siwo umai. 23Go Moses ma Aaron ero sili paki ekopu ni tap̃aup̃au ni nasaisaiana, go ero moro dave umai, po pasa p̃ia ki narei; go nasamasamaana ki Yehovah e pakilina ki narei mamau puti. 24Go nakapu e dave umai m̃elu narae ni Yehovah, po gani puti navituaana tap̃arakiana go nap̃eletia waina e doko wede ni naviriana: go ragi waina narei mamau puti eu punusi a, eu darasa, po dowo dap̃olosiwo.
Currently Selected:
LEVITIKO 9: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
