LEVITIKO 18
18
1Go Yehovah e pasa paki Moses, po naga, 2P̃a vasa paki Israel natuna maga, po noa ki da, Kinau a pei Yehovah Sup̃e animu. 3Kuga ta mari dakiusi natomariana maga waina eu do mari ra navanua ni Ityipt, tokora waina ku pea doko asa: go kuga ta mari dakiusi natomariana maga waina eu do mari ra navanua ni Kanaan, tokora waina a piragi mu paki asa: go kuga ta surata dausi natawonakiana adeada maga mau, 4Kuga to mari pataka ni navasap̃otaeana aginau maga, go kuga vavaigoro natawonakiana aginau maga, po surata asa: kinau a pei Yehovah Sup̃e animu. 5Nalakena tea wanogoe kuga vavaigoro parati ki natawonakiana aginau maga, go navasap̃otaeana aginau maga: waina naatam̃oli sikai e pe to mari patakana, e pe wo mauri: kinau a pei Yehovah.
6Te naata sikai kakamu ega ta paki m̃aladigi ki tea ni namatarau garagaara aneana, naga ega lagai pakasa ki nam̃alam̃alaana aneana mau: kinau a pei Yehovah. 7P̃a ta lagai pakasa ki nam̃alam̃alaana ki tamam̃a, waina e pei nam̃alam̃alaana ki p̃ilam̃a: nae e pei p̃ilam̃a; p̃a ta lagai pakasa ki nam̃alam̃alaana aneana mau. 8P̃a ta lagai pakasa ki nam̃alam̃alaana ki nagoroi ki tamam̃a mau: e pei nam̃alam̃alaana ki tamam̃a. 9Go p̃a ta lagai pakasa ki nam̃alam̃alaana ki gorem̃a mau, tamam̃a natuna nagoroi, kite p̃ilam̃a natuna nagoroi, e pe vakilina kiam̃a, kite e pe vakilina tokora p̃ota sikai, p̃a ta lagai pakasa ki nam̃alam̃alaana aneana mau. 10P̃a ta lagai pakasa ki nam̃alam̃alaana ki natu nagoroi ki natum̃a naanoai, kite natu nagoroi ki natum̃a nagoroi mau: nalakena nam̃alam̃alaana adeada e pei nam̃alam̃alaana anigo. 11P̃a ta lagai pakasa ki nam̃alam̃alaana ki natu nagoroi ki tamam̃a anagoroi, waina e pei namavesi ki tamam̃a, nae e pei gorem̃a, p̃a ta lagai pakasa ki nam̃alam̃alaana aneana mau. 12P̃a ta lagai pakasa ki nam̃alam̃alaana ki tamam̃a gorena mau: nae e pei tea ni namatarau garagaara ki tamam̃a. 13P̃a ta lagai pakasa ki nam̃alam̃alaana ki p̃ilam̃a taina mau: nalakena nae e pei tea ni namatarau garagaara ki p̃ilam̃a. 14P̃a ta lagai pakasa ki nam̃alam̃alaana ki tamam̃a taina mau, p̃a ta paki m̃aladigi ki anagoroi: nae e pei p̃ilam̃a kiki. 15P̃a ta lagai pakasa ki nam̃alam̃alaana ki sulim̃a mau: nae e pei nagoroi ki natum̃a naanoai; p̃a ta lagai pakasa ki nam̃alam̃alaana aneana mau. 16P̃a ta lagai pakasa ki nam̃alam̃alaana ki taim̃a anagoroi: e pei nam̃alam̃alaana ki taim̃a. 17P̃a ta lagai pakasa ki nam̃alam̃alaana ki nagoroi sikai go ki natuna nagoroi; p̃a ta puati natu nagoroi ki natuna naanoai, kite natu nagoroi ki natuna nagoroi, naga p̃a lagai pakasa ki nam̃alam̃alaana aneana; nalakena nara eu pei tea ni namatarau garagaara ni m̃aladigi ki da: e pei nasigisigileoana lomau. 18P̃a ta saisai sikoti tai ni am̃agoroi, po lagai pakasa ki nam̃alam̃alaana aneana mau, ragi waina am̃agoroi e ko mauri doko. 19Go p̃a ta paki m̃aladigi ki nagoroi sikai naga p̃a lagai pakasa ki nam̃alam̃alaana aneana, ragi waina e doko p̃aova nalo ni naloaana aneana. 20Go p̃a ta one sikoti nagoroi ki tea ni m̃aladigi ki‐go mau, po dum̃am̃a mari ko ku loa sikoti a. 21Go p̃a ta pitua ki te naworam̃a sikai ega vei tea tap̃arakiana pulemauri paki Molok mau, go p̃a ta mari m̃oli ki nagisa ni Sup̃e anigo mau: kinau a pei Yehovah. 22P̃a ta one sikoti naanoai dakiusi eu one sikoti nagoroi: e pei namamaragokiana. 23Go p̃a ta one sikoti te nalo tuavati mau, po dum̃am̃a mari ko ku loa sikoti a: go te nagoroi sikai ega ta lawodu narae ni te nalo tuavati, naga ega ta one sikoti a mau: e pei nawosiana sa lomau.
24Kuga ta dum̃amu mari mu kuga loa ki te navatuna sikai ni naleo maga waia mau: nalakena nalauna maga waina kinau a kopasi lua ra padua ki naraemu, nara eu pei tea mariana eu loa ki naleo maga mamau puti wanogoe: 25Go navanua e po loa: nalakena tea wanogoe a do parati a namarinaleotageleana aneana, go navanua e do lua ki tea maga waina eu doko asa. 26Nalakena tea wanogoe nimu kuga vavaigoro parati ki natawonakiana aginau maga, go navasap̃otaeana aginau maga, go kuga ta mari namamaragokiana maga wanogoe sikai kakada mau; nimu naatatoko maga, kite tea ni nalauna p̃ota waina e m̃enaki‐atatoko sikoti mu: 27(Nalakena naatam̃oli maga ni navanua waina eu pea ki mu, nara eu mari namamaragokiana maga mamau puti wanogoe, go navanua e po loa;) 28Go nimu kuga ta mari navanua ega loa mau, mase e pe moro lua ki mu pano, dapala waina e lua ki nalauna waina e doko pea ki mu. 29Nalakena naata waina e pe mari namamaragokiana maga wanogoe sikai kakada, naata wanogoe ega vei tea taeluaana m̃elu dua ki narei aneana. 30Nalakena tea wanogoe kuga rogo parati ki navasaparatikiana aginau, naga kuga ta mari natomariana mamaragokiana maga wanogoe sikai kakada mau, waina nara eu pea do mari a pea ki mu, go naga kuga ta dum̃amu mari mu kuga loa asa mau: kinau a pei Yehovah Sup̃e animu.
Currently Selected:
LEVITIKO 18: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
