PAKI HEBERU MAGA 7
7
1Nalakena Melkisedek wanogoe, nawota ni Salem, tea viri ki Sup̃e Vakilagi mau, waina e sua Abraham ragi waina e do liliu pae naatugiana ni nawota maga, po pasa p̃ia ki nia, 2go waina Abraham e maneana p̃otawotae kekerualima sikai ni naleo maga mamau puti (e pea pei Nawota ni namarinaleoleanaana pae navasadoaana, go edaku ki tea wanogoe e pei Nawota ni Salem, waina e pei Nawota ni natam̃ateana; 3tamana e dika, p̃ilana e dika, p̃auna maga eu dika, e da peani naatulakeana ni naaleatia maga mau, go e da peani nanopuana ni namauriana mau, ma e pei tea mariana e dakiusi Sup̃e Natuna), e pei tea viri doko pa pa e du mau du.
4Ma kuga midoaki punusi naatamoli wanogoe e p̃arua pa, waina Abraham, patriarke, e dua e kekerualima sikai m̃elu naleo tapepavakotoana wia liu maga. 5Go tea maga ni Levi natuna maga waina eu dape naveiteaviriana eu peani natip̃akiana naga euga kekerualima ki narei pae nawotaeana, tea wanogoe e pei ki taida maga, go nara eu dave m̃elu naware ni Abraham: 6ma tea waina p̃auna maga eu da pei tea veveana m̃elu ara mau e kekerualima ki Abraham, go e pasap̃ia ki tea waina e peani nasaiana maga. 7Ma masale ki te navululuana, tea kiki e pei tea vasap̃iakiana pae tea wia liu sa. 8Go tokora waia naatam̃oli waina eu do mate eu dape kekerualima maga; ma tokora wanogoe sikai e dape a waina e pei tea noasokisokiana nalo kakana naga e mauri. 9Go dapala waina aga noa e, Levi ma, waina e do dape kekerualima maga, e pei tea kekerualimakiana pae Abraham; 10nalakena e ko doko naware ni tamana, ragi waina Melkisedek e sua e.
11Ma nawialuaana e pe toko pae naveiteaviriana ni naworawora ni Levi (nalakena narei eu dape nawotaeana doko asa), natikaana ni nasava e ko doko naga tea viri p̃ota sikai ega vakilina pae natakiusiana ni Melkisedek, go naga ega ta pei tea noaana pae natakiusiana ni Aaron mau? 12Nalakena ragi waina naveiteaviriana e pei tea mariana e panop̃ota, navanop̃otaana sikai ni nawotaeana ma e one asa one naga ega vei tea mariana. 13Nalakena tea waina tea maga wanogoe eu pei tea noaana nalo kakana e pei tea ni naworawora p̃ota sikai, waina te naata kakada e da doko raki wede ni naviriana mau. 14Nalakena e doko lina naga Nawota anigida e m̃elu Yudah pakilina; nalo ni naworawora wanogoe Moses e da noa te navatuna nalo ni tea viri maga mau. 15Go tea waina au noae edoko lina p̃arua liu, nalakena tea viri p̃ota sikai pae natakiusiana ni Melkisedek e pakilina, 16waina e pei tea mariana, e da pae nawotaeana ni natip̃akiana sikai ni nap̃okasi mau, ma e pae nakasuana ni namauriana sikai waina ega wo da makoto mau: 17nalakena e pei tea noasokisokiana nalo kakana,
Nigo ku pei tea viri sikai pa pa ega tu mau du
Pae natakiusiana ni Melkisedek.
18Nalakena namaripuolikiana ni natip̃akiana sikai waina e pea e doko nalakena namanainaiana kakana go natikaana ni nasilaeana 19(nalakena nawotaeana e da mari te navatuna e p̃ia lua mau), go naviragiana umai paki asa ni naleogoroana wia liu sa sikai, waina tu pae asa paki m̃aladigi ki Sup̃e. 20Go dapala waina e da doko masale ki navivisaana mau 21(nalakena nara eu pei tea mariana eu pei tea viri maga masale ki navivisaana, ma nae e pilake navivisaana pae tea waina e noa ki nia, e naga,
Yehovah e pivisa go ega wo da midoakidoa mau,
Nigo ku pei tea viri sikai pa pa ega tu mau du);
22Dapala nogoe ma Yesu e pei tea mariana e pei tea tu oli ni navasasokiana wia liu sikai. 23Go nara eu pei tea mariana eu pei tea viri laapa, nalakena eu pei tea tugoroana ki namateana naga euga ta doko mau doko mau: 24ma nae, nalakena e du mau du, e peani naveiteaviriana waina e pe ta panop̃ota mau. 25Nalakena tea wanogoe e mari atae mautipauri pa pa paki ragi edaku mau tea maga waina eu pae asa paki m̃aladigi ki Sup̃e, nalakena e mauri doko sara ragi naga ega madeada pavara.
26Nalakena tea viri warua liu dapala nogoe e pataka gida, tea tautau, tea ta mari sa ki mau, tea ta loa mau, tea marimasalekiana m̃elu dua ki tea mari naleo sa maga, go tea mariana e pakilagi liu nakoroatelagi maga; 27waina e da one asa one sara naaleatia mau, dakiusi waina e one tea viri warua liu wanogoe maga, naga ega vitua ki naviriana maga, pea nalakena namarinaleosaana aneana maga, go edaku ki tea wanogoe nalakena namarinaleosaana maga ki narei: nalakena e paka sikai maau mari tea wanogoe ragi waina e dum̃ana pitua ki nia. 28Nalakena nawotaeana e lawo ki naatam̃oli maga waina eu pilake namanainaiana, naga euga vei tea viri warua liu maga; ma navasaana ni navivisaana, waina e edakugoro nawotaeana, e lawo ki Natuna waina e pei tea mariana e p̃ia lua pa pa e du mau du.
Currently Selected:
PAKI HEBERU MAGA 7: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
