EKSODAS 21
21
1Go tea maga waia eu pei navasap̃otaeana maga waina p̃a wo lawo ki da naraeda.
2Ragi waina ku pakotovi tea suasua Heberu sikai, ega suasua natau latesa: go natau kelarua ega m̃elu pano pei tea veresi‐m̃oli‐ki‐ana. 3E pe sikina umai, ega sikina m̃elu pano: e pe veani nagoroi sikai, nagoroi aneana ega m̃elu sikoti a pano. 4Nawota aneana e pe tua e nagoroi sikai, go e pe maneana dape natuna naanoai maga kite natuna nagoroi maga; nagoroi wanogoe go natuna maga euga vei tea ki nawota aneana, go nae ega sikina m̃elu pano. 5Ma tea suasua wanogoe e pe naga, A dodomi nawota aginau, go nagoroi aginau, go natugu maga; aga ta m̃elu pano pei tea veresiana mau: 6Go nawota aneana ega viragi a umai punusi tea vasap̃otae maga, po piragi a paki namata, kite paki nakautu ni namata; go nawota aneana ega turisai nadaligana ki tea turisai sikai; go ega maneana suasua ega tu du po du mau du.
7Go ragi waina naatam̃oli sikai e sori natuna nagoroi naga ega vei tea suasua, ega ta m̃elu pano mau dakiusi waina tea suasua naanoai maga eu m̃elu pano. 8E pe sa namata ni nawota aneana, waina e dum̃ana maneana pasasoki a, ega mari naga ega vei tea tauluaana: ega ta peani naveinawotaana mau naga ega sori a paki nalauna p̃ota pilake namarimalauwelukiana aneana paki nia. 9Go e pe magi natuna naanoai pasasoki a, ega mari paki nia ega tapala waina eu mari paki natuda nagoroi maga. 10E pe tum̃ana maneana piragi tea p̃ota sikai; navinaga aneana, go tea suniana aneana, go tea waina e peani a nalakena e pei anagoroi, ega ta tape lua seara kakana mau. 11Go e pe ta mari tea tolu wanogoe paki nia mau, ega m̃elu m̃oli pano, m̃ane ega tika.
12Tea waina e p̃okati naatam̃oli sikai, dapala e mate asa, ega vei tea maripunueana lomau. 13Go tea waina e da kusugoro mau, ma Sup̃e e mari a e sua nam̃elearuna; aga wo manigo dawona ki tokora sikai waina ega sava paki asa pano. 14Ma ragi waina naatam̃oli sikai e mari madaga paki tea ni m̃aladigi ki nia naga ega mari punue a ki nasurueana; p̃a viragi lua e ega m̃elu dua ki wede ni naviriana aginau naga ega mate.
15Go tea waina e p̃okati tamana, kite p̃ilana, ega vei tea maripunueana lomau.
16Go tea waina e panako naatam̃oli sikai, po sori a, kite e pe vei tea vap̃aiana doko nam̃elearuna, ega vei tea maripunueana lomau.
17Go tea waina e pasa sa ki tamana, kite p̃ilana, ega vei tea maripunueana lomau.
18Go ragi waina naatam̃oli maga eu pululu, go sikai e nadi sikai ki vatu sikai, kite e duki a ki nam̃elearuna weluakiana, go e da mate mau, ma e one nawewelena one: 19E pe moro duleana po surata paki katama ki tiko aneana, sogi ega vuoli ki tea waina e p̃okati a ma ega lagati dua e ragi ni natokom̃oliana aneana, po mari naga ega apu p̃ia.
20Go ragi waina naatam̃oli sikai e p̃okati tea suasua naanoai aneana, kite tea suasua nagoroi aneana, ki nakau varati, go e mate etano ni nam̃elearuna, ega vei tea sikoana lomau. 21Ma e pe toko naaleatia sikai kite e pe rua ega ta pei tea sikoana mau: nalakena nae e pei m̃ane aneana.
22Go ragi waina naatam̃oli maga eu dum̃ada mari ra, po diesiva ki nagoroi tiena sikai, go pipia aneana e m̃elu, go namarisakiana p̃ota e dika; euga mari tea waina e mari a ega vitua ki m̃ane, ega tapala waina nagoroi anawota ega wo doropusi a asa; go ega vitua ega tapala waina tea vasap̃otae maga euga wo noap̃otae a. 23Ma namarisakiana e pe toko, p̃a vitua ki namauriana ega tip̃a namauriana, 24Namatana ega tip̃a namatana, napatina ega tip̃a napatina, nam̃elearuna ega tip̃a nam̃elearuna, natuana ega tip̃a natuana, 25Naasoana ega tip̃a naasoana, wotu ega tip̃a wotu, navaratiana ega tip̃a navaratiana.
26Go ragi waina naatam̃oli sikai e duki namata ni tea suasua naanoai aneana, kite namata ni tea suasua nagoroi aneana, po mari sa ki nia; ega suasua ki nia naga ega m̃elu pei tea veresiana pano ega tip̃a namatana. 27Go e pe tuki lesue napati sikai ni tea suasua naanoai aneana, kite napati sikai ni tea suasua nagoroi aneana; ega suasua ki nia naga ega m̃elu pei tea veresiana pano ega tip̃a napatina.
28Go ragi waina oks sikai e dip̃a naatam̃oli sikai naanoai kite nagoroi, go e mate, oks wanogoe ega vei tea nadiana lomau ki vatu, go nap̃okasina ega ta pei tea kaniana mau; ma talakea ni oks ega ta pei tea vasatip̃aana mau. 29Ma oks wanogoe e pe vivitip̃a sala vea, go e pe vei tea noasokisokiana paki talakeana, go e pe ta pavaigoro e mau, go e mari punue naatam̃oli sikai naanoai kite nagoroi; oks wanogoe ega vei tea nadiana ki vatu, go talakeana ma ega vei tea maripunueana. 30Naulu ni natap̃augoroana e pe vei tea toropusiana asa, ega vitua ki naulu ni natauluaana ni namauriana aneana ega tapala tea mamau puti waina euga wo pei tea toropusiana asa. 31E pe tip̃a piakiki naanoai, kite e pe tip̃a piakiki nagoroi, euga mari paki nia ega tapala navasap̃otaeana wanogoe. 32Oks wanogoe e pe tip̃a tea suasua naanoai kite tea suasua nagoroi; ega tua nawota adeada shekel ni silver rualima dolu, go oks wanogoe ega vei tea nadiana ki vatu.
33Go ragi waina naatam̃oli sikai e lagai m̃orutano sikai, kite ragi waina naatam̃oli sikai e kili m̃orutano sikai po da p̃ogoro e mau, go oks sikai kite ass sikai e dowo paki asa, talakea ni m̃orutano ega lagati a; 34Ega vitua ki m̃ane liliu paki talakeana, go tea mate ega vei tea aneana.
35Go ragi waina oks ki naatam̃oli sikai e mari sa ki oks ki tea p̃ota sikai, go e mate; eroga sori tea mauri, po dap̃otae m̃ane kakana; go eroga moro dap̃otae tea mate. 36Kite e pe vei tea ataeana naga oks wanogoe e pivitip̃a sala vea, go talakeana e da pavaigoro e mau; ega lagati lomau ki oks sikai ega tip̃a oks wanogoe, go tea mate ega vei tea aneana.
Currently Selected:
EKSODAS 21: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
